Rɔmɔ
14 Nyolongole onto lele la mbetawɔ+ ka wɔdu dimɛna, koko tanyolomboshake lo kɛnɛ kendana la otshikitanu wa tokanyi.* 2 Onto ɔmɔtshi ekɔ la mbetawɔ ka ndɛ oseka ɛngɔ tshɛ, koko onto okina lele wɔdu ndɛka paka afuki ato. 3 Ɔnɛ lalɛ atɔnyɔlake ɔnɛ lahale ndo ɔnɛ lahale atolomboshake ɔnɛ lalɛ+ nɛ dia Nzambi aketawɔ onto ɔsɔ. 4 Eeyɛ kalomboshayɛ okambi w’onto okina?+ Oyadi nde memala kana nde nkɔ,+ nkumɛnde kayɔsa yɛdikɔ. Lo mɛtɛ nde ayemala, nɛ dia Jehowa* kokaka mbeemadia.
5 Onto ɔmɔtshi mbɔsaka dia lushi lɔmɔtshi ndeka nshi nkina+ ndo onto okina mbɔsaka dia nshi tshɛ yekɔ woho ɔtɔi.+ Onto tshɛ onge la eshikikelo dia kɛnɛ ketawɔnde kekɔ dimɛna. 6 Onto lɔsa lushi lɔmɔtshi la nɛmɔ liɔsaka dia ntombola Jehowa.* Ndo nto, onto lalɛ ekɔ lo ndɛ dia ntombola Jehowa,* nɛ dia nde mbishaka Nzambi+ losaka. Onto lahale hale dia ntombola Jehowa,* koko nde mbishaka Nzambi+ losaka. 7 Lo mɛtɛ, ndooko onto la l’atei aso lasɛna dikambo dia lotombo lande ndamɛ+ ndo ndooko onto lavɔ dikambo dia lotombo lande ndamɛ. 8 Nɛ dia naka tekɔ lo nsɛna, kete tekɔ lo nsɛna dikambo dia lotombo la Jehowa*+ ndo naka tambovɔ, kete tambovɔ dikambo dia lotombo la Jehowa.* Ɔnkɔnɛ, oyadi tekɔ lo nsɛna kana tambovɔ, tekɔ anto waki Jehowa.*+ 9 Nɛ dia Kristo akavu ndo akayala nto la lɔsɛnɔ dia nde monga Owandji wa wanɛ wambovɔ ndo wa wanɛ wasɛna.+
10 Ko lande na kalomboshayɛ ɔnanyɔ?+ Kana lande na kɔnyɔlayɛ ɔnanyɔ? Nɛ dia sho tshɛ tayemala la ntondo ka dihole dia kilombo diaki Nzambi.+ 11 Nɛ dia akafundama ɔnɛ: “Jehowa* kata ate: ‘Lo mɛtɛ oko wemi la lɔsɛnɔ,+ adwe tshɛ wayonkusamɛ ndo nemi tshɛ yayetawɔ lo sɛkɛ dia dimi kele Nzambi.’”+ 12 Ɔnkɔnɛ, sho tshɛ onto l’onto ayokoya la Nzambi.+
13 Oma lɔkɔ, tatolomboshanake nto,+ koko nyɔshi yɛdikɔ yaha nkitsha la ntondo k’ɔnangɛso+ otamba wa ntakanya kana mbodjɛ wekamu. 14 Dimi mbeyaka ndo lekɔ la eshikikelo le Nkumadiɔndjɔ Yeso dia ndooko ɛngɔ kele mindo,+ onyake paka naka onto ambɔsa ɛngɔ kɛmɔtshi dia tɔ kekɔ mindo ko tɔ monga mindo le nde. 15 Nɛ dia naka ɔnanyɔ ambonga la lonyangu l’ɔtɛ wa mbo ya ndɛ, kete hanyoyɔkɛndakɛnda lo ndjela ngandji.+ Oma lo mbo ya ndɛ yayɛ, tetawɔke dia onto lele Kristo akavu+ dikambo diande ndanyema. 16 Ɔnkɔnɛ, tanyetawɔke dia anto ntɛkɛta kɔlɔ dikambo dia ɔlɔlɔ wasalanyu. 17 Nɛ dia Diolelo dia Nzambi hadiolembetshiya ndɛ la nnɔ,+ koko diɔ nembetshiyaka losembwe, wɔladi ndo ɔngɛnɔngɛnɔ kaamɛ la nyuma k’ekila. 18 Nɛ dia onto tshɛ lakambɛ Kristo oko ɔhɔmbɔ lo yoho shɔ mbetawɔmaka le Nzambi ndo nɛmiyamaka le anto.
19 Ɔnkɔnɛ, nyɛsɔ towese akambo wakimanyiya dia wɔladi+ monga lam’asaso ndo akambo watokeketsha.+ 20 Tshika dia ndanya olimu waki Nzambi l’ɔtɛ w’ɛngɔ ka ndɛ.+ Lo mɛtɛ diangɔ tshɛ diekɔ pudipudi, koko ekɔ kɔlɔ le onto ladilɛ ko nde mbeyaka dia diɔ diayotakanya+ anto akina. 21 Ndeka dimɛna aha ndɛ onatshi kana nnɔ wanu kana nsala dikambo dikina tshɛ diakoka ntakanya+ ɔnanyɔ. 22 Mbetawɔ kele la yɛ, lamatɔ dikambo diayɛ wɛmɛ la ntondo ka Nzambi. Ɔngɛnɔngɛnɔ le onto lahayalombosha la kɛnɛ ketawɔnde. 23 Koko naka nde ekɔ la taamu, kete nde amboshila manyema naka nde ndɛ, nɛ dia nde hale la mbetawɔ. Lo mɛtɛ, dui tshɛ diahasalemi la mbetawɔ diekɔ pɛkato.