Ɛzɛkiyɛlɛ

10 Etena kakamendaka, dimi lakɛnyi la diko dia loowa laki la diko dia ɛtɛ wa akɛruba ɛngɔ kɛmɔtshi kele oko dive dia safirɛ kakɛnama la diko diawɔ, ndo ɛnamelo katɔ kakafɔnaka la kiti ka lowandji.+ 2 Ko nde akatɛ pami kakalɔtɛ dihɔndɔ dia linɛnɛ+ ate: “Ɔtɔ l’atei wa etshimbi watshimba,+ l’ɛse ka akɛruba ndo lodia anya ayɛ akɔ 2 la akalanga+ wa dja wahɛta wele lam’asa akɛruba kele okawɔ la diko dia osomba.”+ Ko nde akɔtɔ etena kakamendaka.

3 Lam’akɔtɔ pami kakɔ, akɛruba wakemala lo lɛkɛ la lonya l’omi la luudu, ko dinge diakalole lo sɛkɛ dia l’etei. 4 Ko lotombo la Jehowa+ lakonɛɛ oma le akɛruba otsha lo mbɔtwɛlɔ ka soko dia luudu, ko yema yema luudu lakɔ lakalole la dinge+ ndo sɛkɛ diakalole tɔɔ la esase wa lotombo la Jehowa. 5 Ndo lohelo la ahafu wa akɛruba lakakokaka mbokɛ lo sɛkɛ dia l’andja, oko wondjo wa Nzambi Kanga-Wolo-Tshɛ etena katɛkɛtande.+

6 Oma laasɔ, nde akadjangɛ pami kakalɔtɛ dihɔndɔ dia linɛnɛ ate: “Ɔsa dja yele lam’asa etshimbi watshimba, oma lam’asa akɛruba,” ko nde akɔtɔ ndo akemala l’omamu wa otshimbi. 7 Ko ɔkɛruba ɔmɔtshi akasembola lonya lande otsha lo dja yaki lam’asa akɛruba+ akɔ. Nde akɔshi yema ya dja ndo akayidje lo anya akɔ 2 wa ɔnɛ lakalɔtɛ dihɔndɔ dia linɛnɛ,+ ko nde akayiɔshi ndo akatombe. 8 Akɛruba akɔ waki la kɛnɛ kaki oko efanelo ka anya w’onto l’ɛse ka ahafu+ awɔ.

9 Etena kakamendaka, dimi lakɛnyi etshimbi 4 suke la akɛruba, otshimbi 1 suke la ɔkɛruba tshɛ ndo etshimbi akɔ waki ngaingai oko lɔwɔkɔ la krizɔlitɛ.+ 10 Lo kɛnɛ kendana la ɛnamelo kawɔ, wakɔ 4 wakafɔnaka, wate kana oko otshimbi waki l’etei ka otshimbi. 11 Lam’akawetetaka vɔ wakakokaka ntshɔ lo bɛkɛ diakɔ 4 aha la nkadimɔ, nɛ dia vɔ wakatshɔka otsha lo dihole diakɛlɛka ɔtɛ aha la nkadimɔ. 12 Alemba awɔ tshɛ, ɛkɔngɔ awɔ, anya awɔ, ahafu awɔ ndo etshimbi, etshimbi awɔ vɔ akɔ 4 wakalole tɔɔ la washo lo otshimbedi w’otondo.+ 13 Lo kɛnɛ kendana la etshimbi, dimi lakoke dui diawelɛ ɔnɛ: “Etshimbi nyonee!”

14 Ɔmɔmɔ l’atei awɔ* aki la dungi 4. Elungi ka ntondo kaki elungi ka ɔkɛruba, elungi ka 2 kaki elungi ka onto, elungi ka 3 kaki elungi ka ntambwɛ ndo ka 4 kaki elungi ka mpongo.+

15 Ko akɛruba wakadɛka, vɔ waki ditongami diasɛna diamɛ* diakamɛnyi suke la ɔkɛdi wa Kebara,+ 16 ndo etena kaketetaka akɛruba, etshimbi waketetaka kaamɛ la wɔ; ndo etena kakahohanyaka akɛruba ahafu awɔ dia mbidɛ etale la diko dia nkɛtɛ, etshimbi kokadimɔka ndo komimɔka oma lalewɔ.+ 17 Etena kakawemalaka, etshimbi wakemalaka; ndo etena kakawonɛɛka, etshimbi wakonɛɛka kaamɛ la wɔ, nɛ dia nyuma kakakambaka le ditongami diasɛna* mbaki ndo lo etshimbi.

18 Oma laasɔ, lotombo la Jehowa+ lakamɔ oma lo mbɔtwɛlɔ ka soko dia luudu ndo lakatemala laadiko dia akɛruba.+ 19 Oma laasɔ, akɛruba wakahohanya ahafu awɔ ndo wakonyiyama oma la nkɛtɛ etena kakamendaka. Ndo etshimbi waki kaamɛ la wɔ etena kakawonɛɛ. Vɔ wakatemala lo ɛɔtwɛlɔ ka soko diele lo ɛstɛ dia lo luudu la Jehowa, ndo lotombo la Nzambi ka Isariyɛlɛ laki laadiko diawɔ.+

20 Ɔsɔ aki ditongami diasɛna* diakamɛnyi l’ɛse ka Nzambi ka Isariyɛlɛ suke la ɔkɛdi wa Kebara,+ ko dimi lakayeya dia vɔ waki akɛruba. 21 Vɔ akɔ 4 waki la dungi 4, ahafu 4 ndo kɛnɛ kakɛnamaka oko anya w’onto kaki l’ɛse ka ahafu+ awɔ. 22 Ndo ɛnamelo ka dungi diawɔ kaki oko dungi diakamɛnyi suke la ɔkɛdi wa Kebara.+ Vɔ tshɛ wakatshɔka nsembɔ tɔɔ otsha la ntondo.+