2 Samuɛlɛ

7 Lam’akadjasɛ nkumekanga lo luudu*+ lande hita ko Jehowa mbosha momuya oma le atunyi ande tshɛ wakoodinge, 2 nkumekanga akatɛ omvutshi Natana+ ate: “Dimi ɔnɛ adjasɛ lo luudu lakakama l’esongo w’elondo,+ koko Ɔshɛtɛ wa Nzambi ka mɛtɛ wekɔ l’atei w’ahɔndɔ w’apɛma.”+ 3 Natana akakadimola nkumekanga ate: “Tshɔka tosale kɛnɛ tshɛ kele l’otema ayɛ, nɛ dia Jehowa ekɔ kaamɛ la yɛ.”+

4 L’otsho akɔ waamɛ, ɔtɛkɛta wa Jehowa wakaye le Natana ndjowotɛ ɔnɛ: 5 “Tshɔka tote okambi ami Davidɛ wate: ‘Jehowa kata ate: “Onde wɛ pombaka mbikɛmi luudu la dimi mbidjasɛ?+ 6 Nɛ dia dimi kombidjasɛ lo luudu oma ko lushi lakamatondja ase Isariyɛlɛ oma l’Edjibito polo ndo ɛlɔ,+ koko lekɔ lo tasɛkɔsɛkɔ* lo luudu la dipɛma ndo lo tabɛrnaklɛ.+ 7 L’edja tshɛ kakamatatshɔka kaamɛ l’ase Isariyɛlɛ* tshɛ, onde lambotɛka ɔnɔmbɔdi wa dioho dimɔtshi dia Isariyɛlɛ wakamasɔnɛ dia namaka wodja ami Isariyɛlɛ nte: ‘Lande na kakinyu kombikɛmi luudu l’esongo w’elondo?’”’ 8 Ɔnkɔnɛ, tote okambi ami Davidɛ wate: ‘Jehowa kanga lolembelembe kata ate: “Dimi lakakɔshi oma lɛnɛ akayaleshaka dongalonga,+ oma lɛnɛ akayatayelanaka l’ɛkɔkɔ dia wɛ monga ɔnɔmbɔdi wa wodja ami Isariyɛlɛ.+ 9 Dimi layonga kaamɛ la yɛ lɛnɛ tshɛ ayoyotshɔ+ ndo dimi layonya* atunyi ayɛ tshɛ oma la ntondo kayɛ.+ Dimi layetɛ lokombo layɛ woke+ oko lokombo l’anto wa weke wa la nkɛtɛ. 10 Dimi layɔsɔna dihole dikambo dia wodja ami Isariyɛlɛ, ko layowadjashiya ndo vɔ wayodjasɛ lɛkɔ, ko ndooko onto layowafutanya nto. Anto wa kɔlɔ hawotowahɛnyahɛnya nto oko wakawasalaka lo nshi yakete,+ 11 oma ko lushi lakamasɔnɛ toshushi+ dia nɔmbɔla wodja ami Isariyɛlɛ. Dimi layokosha momuya oma le atunyi ayɛ tshɛ.+

“‘“Ndo nto, Jehowa akakotɛ dia Jehowa ayokosalɛ luudu.*+ 12 Lam’ayokomɛ nshi yayɛ+ ko wɛ ambetama dia momuya kaamɛ la watshɛyɛ, dimi layotondja ɔnayɛ* l’ɔkɔngɔ ayɛ, ɔnayɛ hita la pami,* ko dimi layoshikikadia diolelo diande nge.+ 13 Nde kayoyoka luudu dikambo dia lokombo lami+ ndo dimi layoshikikadia kiti kande ka lowandji pondjo pondjo.+ 14 Dimi layonga she ndo nde ayonga ɔnami.+ Naka nde ambosala kɔlɔ, dimi layowongola la ɔhɛhɛla w’anto ndo la mfimbɔ y’ana w’anto.*+ 15 Ngandji kami ka kɔlamelo hatomɔ oma le nde woho wakamakinya oma le Saolo+ lakamanya oma la ntondo kayɛ. 16 Luudu layɛ ndo diolelo diayɛ diayoshikikala pondjo pondjo la ntondo kayɛ. Kiti kayɛ ka lowandji kayoshikikala nge pondjo pondjo.”’”+

17 Natana akatɛ Davidɛ awui asɔ tshɛ ndo ɛnɛlɔ kɛsɔ k’otondo.+

18 Ko nkumekanga Davidɛ akɔtɔ, akadjasɛ la ntondo ka Jehowa ko akate ate: “Nkum’Olongo Nkumadiɔndjɔ Jehowa le, dimi eemi? Ndo luudu lami eelɔ dia wɛ salɛmi akambo anɛ tshɛ?+ 19 Laadiko dia laasɔ, Nkum’Olongo Nkumadiɔndjɔ Jehowa le, wɛ ambɔtɛkɛta ndo dikambo dia luudu l’okambi ayɛ polo ndo nshi yayaye yeke etale efula. Nkum’Olongo Nkumadiɔndjɔ Jehowa le, ɔsɔ ekɔ wetshelo* le anto tshɛ. 20 Nkum’Olongo Nkumadiɔndjɔ Jehowa le, okambi ayɛ Davidɛ akokande kotɛ nto lam’ele wɛ mbeyakami dimɛna?+ 21 L’ɔtɛ w’ɔtɛkɛta ayɛ ndo oma lo kɛnɛ kalanga otema ayɛ* kamboyosala akambo anɛ tshɛ wa weke ndo kamboyowasholɛ okambi ayɛ.+ 22 Diakɔ dieyɛ mɛtɛ woke,+ wɛ Nkum’Olongo Nkumadiɔndjɔ Jehowa. Ndooko lele oko wɛ+ ndo ndooko Nzambi kekina paka wɛ.+ Kɛnɛ tshɛ kambotoka l’atoyi aso shikikɛka dui sɔ. 23 Naa wodja okina wele la nkɛtɛ wele oko wodja ayɛ Isariyɛlɛ?+ Nzambi akatshu ko akataatshungola oko wodja ande,+ akayatongɛ lokombo+ lo mbasalɛ akambo wa weke ndo wa diambo efula.+ Wɛ akatshanya wedja la tozambizambi tawɔ lo wahɔ wa wodja ayɛ wakayayatshungolɛ wɛmɛ oma l’Edjibito. 24 Wɛ akashikikadia wodja ayɛ Isariyɛlɛ oko wodja ayɛ hita pondjo pondjo.+ Jehowa le, wɛ aya Nzambi kawɔ.+

25 “Jehowa Nzambi le, wonya ɔnɛ, aya wɛ kotshaka daka diamboyolaka lo dikambo di’okambi ayɛ ndo luudu lande lo tena tshɛ ndo wɛ mbeyaka nsala paka oko wamboyolaka.+ 26 Lokombo layɛ latombɔmake pondjo pondjo,+ kele anto kawote vate: ‘Jehowa kanga lolembelembe ekɔ Nzambi lo Isariyɛlɛ,’ ndo luudu l’okambi ayɛ Davidɛ lashikimale nge la ntondo kayɛ.+ 27 Nɛ dia, Jehowa kanga lolembelembe, Nzambi k’Isariyɛlɛ le, wɛ ambɛnya okambi ayɛ ɛnɛlɔ lo mbuta ɔnɛ: ‘Dimi layokokɛ luudu.’*+ Diakɔ diambonga okambi ayɛ la dihonga* dia nsala dɔmbɛlɔ nɛ le yɛ. 28 Diakɔ diele, Nkum’Olongo Nkumadiɔndjɔ Jehowa le, wɛ ekɔ Nzambi ka mɛtɛ ndo ɛtɛkɛta ayɛ wekɔ mɛtɛ+ ndo wɛ ambolaka okambi ayɛ akambo w’ɛlɔlɔ asɔ. 29 Ɔnkɔnɛ, ɔngɛnɛngɛnɛ dia ntshɔkɔla luudu l’okambi ayɛ ndo lɔ latetemale monga pondjo pondjo la ntondo kayɛ,+ nɛ dia, Nkum’Olongo Nkumadiɔndjɔ Jehowa le, wɛ ambolaka, ndo la ɔtshɔkɔ ayɛ, luudu l’okambi ayɛ latshɔkwame pondjo pondjo.”+