2 Samuɛlɛ

12 Ko Jehowa akatome Natana+ le Davidɛ. Nde akɔtɔ le nde+ ko akate ate: “Apami 2 waki lo osomba ɔmɔtshi, ɔmɔtshi kanga ɔngɔnyi ndo okina ose wola. 2 Pami k’ɔngɔnyi aki l’ɛkɔkɔ ndo ngɔmbɛ efula ka mamba,+ 3 koko pami k’ose wola aki paka la yana y’ɔkɔkɔ 1 ya tshitshɛ ya wadi yakandasombe.+ Nde akayilamaka ndo yɔ yakayolaka lalende kaamɛ l’anande. Yɔ yakalɛka yema ya mbo ya ndɛ tshitshɛ yaki la nde, yakanɔka kɛnɛ kaki lo dikɔhɔ diande ndo yaketamaka lo dihɛlɔ diande. Yɔ yakayonga oko ɔnande la womoto. 4 L’ɔkɔngɔ diko, ɔngɛndangɛnda ɔmɔtshi akaye laka kanga ɔngɔnyi, koko nde kɔmbɔsa ɔkɔkɔ ande kana ngɔmbɛ kande kɛmɔtshi dia katɛ ombetshi a mboka wakaye lakande. Nde akɔshi ɔkɔkɔ waki ose wola, ko akookatɛ pami kakaye le nde.”+

5 Ko Davidɛ akoke pami kɛsɔ nkɛlɛ k’efula ndo akatɛ Natana ate: “Lo mɛtɛ oko wele Jehowa la lɔsɛnɔ,+ pami kakasale dikambo sɔ sunganaka mvɔ! 6 Ndo nde pombaka mfuta ɛkɔkɔ 4 l’ɔtɛ+ wakandasale dikambo sɔ ndo l’ɔtɛ wakinde komonga la kɛtshi.”

7 Ko Natana akatɛ Davidɛ ate: “Wɛ kele pami kɛsɔ! Jehowa Nzambi k’Isariyɛlɛ kata ate: ‘Dimi lakakokite esɔ oko nkumekanga dia wɛ mbolɛ Isariyɛlɛ+ ndo lakakohandja oma l’anya wa Saolo.+ 8 Dimi lakakosha luudu la nkumɛyɛ,+ lakakodjɛ wadi wa nkumɛyɛ+ lo anya ayɛ ndo lakakosha nkumbo k’Isariyɛlɛ ndo ka Juda.+ Ndo nto, dimi laki suke dia nyomokosalɛ+ akambo akina efula. 9 Lande na kakayɔnyɔla ɔtɛkɛta wa Jehowa lo nsala kɛnɛ kele kɔlɔ lo washo ande? Wɛ akadiakisha Uriya ose Hiti la lokuwa la ta!+ Oma laasɔ, wɛ akɔshi wadɛnde+ dia nde monga wadɛyɛ l’ɔkɔngɔ wa wɛ mbodiakisha la lokuwa la ta l’ase Amɔna.+ 10 Ɔnkɔnɛ, lokuwa la ta halomɔki pondjo oma lo luudu layɛ,+ nɛ dia wɛ akamɔnyɔla lo woho wakayɔshi wadi aki Uriya ose Hiti dia nde monga wadɛyɛ.’ 11 Jehowa kata ate: ‘Dimi layanga kela asui oma l’etei ka luudu layɛ,+ ndo dimi layɔsa wadiɛyɛ lo washo ayɛ, ko dimi mbasha pami kekina*+ ndo nde ayeyana la wadiɛyɛ la yanyi ya tɛɛ.*+ 12 Wɛ akasale akambo akɔ lo woshɛshɛ,+ koko dimi layosala akambo asɔ la ntondo k’ase Isariyɛlɛ tshɛ ndo la yanyi ya tɛɛ.’”*

13 Ko Davidɛ akatɛ Natana ate: “Dimi lambosalɛ Jehowa pɛkato.”+ Natana akakadimola Davidɛ ate: “Jehowa lo wedi ande ambokodimanyiya pɛkato kayɛ.*+ Wɛ hatovɔ.+ 14 Koko lam’ele wɛ akɔnyɔla Jehowa lo yɛdikɔ y’efula lo dikambo nɛ, lo mɛtɛ ɔna lamboyota ayovɔ.”

15 Oma laasɔ, Natana akakalola lakande.

Jehowa akakɔmɔla ɔna lakote Davidɛ nde la wadi aki Uriya, ko ɔnakɔ akatate hemɔ. 16 Davidɛ akasɛngasɛnga Nzambi ka mɛtɛ dikambo dia ɔna. Davidɛ akakile mbo ya ndɛ tshɛ ko akɔtɔ lo luudu ndo akalalaka otsho w’otondo l’odihe.+ 17 Ɔnkɔnɛ, dikumanyi dia lo luudu lande wakemala lalende ko wakayange dia mboonyiya oma l’odihe, koko nde akatone ndo nde kɔɔndɛ ndooko ɛngɔ kaamɛ la wɔ. 18 Lushi la 7, ɔnakɔ akavu, koko ekambi wa Davidɛ wakoke wɔma mbotɛ dia ɔna ambovɔ. Vɔ wakate vate: “Lam’aki ɔna eke la lɔsɛnɔ, sho takawotɛ, koko nde kotokɛ. Ko ngande wakokaso mbotɛ dia ɔna ambovɔ? Nde mbeyaka nsala dikambo dimɔtshi dia kɔlɔ efula.”

19 Lam’akɛnyi Davidɛ ekambi ande watɛkɛta tɔhɔtɛhɔtɛ lam’asawɔ, nde akeye dia ɔna ambovɔ. Davidɛ akambola ekambi ande ate: “Ɔna ambovɔ?” Vɔ wakakadimola vate: “Nde ambovɔ.” 20 Ɔnkɔnɛ Davidɛ akonɛɛ oma l’odihe, akɔkɛ, akashinola esɔ,+ akengola ahɔndɔ, ko akatshu lo luudu la Jehowa ndo akatokusama. L’ɔkɔngɔ diko, nde akatshu lo luudu lande,*+ akalɔmbɛ dia vɔ mbeela mbo ya ndɛ, ko nde akale. 21 Ekambi ande wakawombola vate: “Lande na kamboyosala nganɛ? Lam’aki ɔna eke la lɔsɛnɔ, wɛ akakile mbo ya ndɛ ndo akatetemalaka ndela; koko kam’ovwe ɔna, wɛ ambemala ndo ambɔlɛ diangɔ.” 22 Nde akakadimola ate: “Lam’aki ɔna eke la lɔsɛnɔ, dimi lakakile mbo ya ndɛ+ ndo lakatetemalaka ndela, nɛ dia lakataka l’otema nte: ‘Eeya kana Jehowa ayokoka mbokami kɛtshi ko nde ntshika ɔna la lɔsɛnɔ?’+ 23 Wonya ɔnɛ wele ɔna ambovɔ, lande na kahombami nkila mbo ya ndɛ? Onde dimi layokoka mboolola?+ Dimi kayotshɔ le nde,+ koko nde hatokalola le mi.”+

24 Oma laasɔ, Davidɛ akasambe Batɛ-Shɛba ka wadɛnde.+ Nde akɔtɔ le nde ko akateyana la nde. L’ɔkɔngɔ diko, nde akote ɔna pami ko akawɔlɛ Sɔlɔmɔna.*+ Jehowa akalangaka ɔnakɔ,+ 25 ko nde akatome dui lo tshimbo y’omvutshi Natana+ dia towɔlɛ ɔnɛ Jɛdidiya,* lo dikambo dia Jehowa.

26 Jɔaba akatetemala ndɔsha Raba+ w’ase Amɔna,+ ko nde akɔshi osomba wa nkumekanga.*+ 27 Ko Jɔaba akatomɛ Davidɛ akɛndji dia towotɛ ɔnɛ: “Lambɔlɔsha Raba+ ndo lambɔsa osomba w’ashi.* 28 Laasɔ, sanganya asɔlayi wotshikadi, ka mpango dia ndɔsha osomba akɔ kele ɔsawɔ. Naka aha ngasɔ, kete dimi kayɔsa osomba akɔ, ko ayeyama dia dimi kakalɛndja osomba akɔ.”*

29 Ɔnkɔnɛ, Davidɛ akasanganya asɔlayi tshɛ ko akatshu dia tɔlɔsha Raba ndo akawɔshi. 30 Ko nde akɔshi dɛmbɔ dia nkoso diaki l’ɔtɛ wa Malakama. Diɔ diaki la wotsho wa lotalata* 1 la paonyi, kaamɛ la mbɔkɔ y’oshinga wolo, ko diɔ diakakitshama l’ɔtɛ wa Davidɛ. Nde akɔshi ndo diangɔ dia dimbo+ efula oma l’osomba akɔ.+ 31 Nde akaye l’anto waki lɔkɔ, ko akawadje l’olimu wa mbataka ave, wa salaka diangɔ dia mbolo dia mpɛmɔ, tɔshɔka ta mbolo ndo l’olimu wa salaka atafadi. Ngasɔ mbakandasalɛ esomba tshɛ w’ase Amɔna. L’ekomelo, Davidɛ nde l’elui tshɛ w’asɔlayi wakakalola la Jɛrusalɛma.