2 Samuɛlɛ
16 Lam’akalekana Davidɛ shɔdi ya dikona yema tshitshɛ,+ Ziba+ okambi waki Mefibɔshɛtɛ+ akaye ndjohomana la nde, ele la mponda 2 yele la dee ndo yayɛmbɛ mapa 200, ekate 100 w’elowa wa vinyɔ, ekate 100 w’elowa wa nshi y’ɔwɔ* ndo mbaka ka woke ka wanu.+ 2 Ko nkumekanga akatɛ Ziba ate: “Lande na kamboyela diangɔ nɛ?” Ziba akakadimola ate: “Mponda yekɔ di’ase luudu la nkumɛmi mbahema lɔkɔ; mapa la elowa wa nshi y’ɔwɔ dia ɛlɔngɔ w’apami ndɛ, ndo wanu dia wanɛ wambɔlɛmba l’oswe wa shɛnga nnɔ.”+ 3 Ko nkumekanga akate ate: “Lende ele ɔna* nkumɛyɛ?”+ Ko Ziba akatɛ nkumekanga ate: “Nde akatshikadi la Jɛrusalɛma, nɛ dia nde akatshi ate: ‘Ɛlɔ nkumbo k’Isariyɛlɛ wayokaloya lowandji la papa le mi.’”+ 4 Oma laasɔ, nkumekanga akatɛ Ziba ate: “Eenda, kɛnɛ tshɛ kele la Mefibɔshɛtɛ kaya kayɛ.”+ Ziba akakadimola ate: “Dimi lambokusama la ntondo kayɛ. Etawɔ dia dimi mpomɔ lokolo l’ɔlɔ lo washo ayɛ, wɛ nkumɛmi nkumekanga.”+
5 Lam’akakome nkumekanga Davidɛ la Bahurima, pami kɛmɔtshi ka lo nkumbo ka Saolo, lokombo lande Shimei,+ ɔna Ngɛra akaye ko akatadjaka Davidɛ mananu la dui dia wolo.+ 6 Nde akatokaka Davidɛ ndo ekambi tshɛ wa nkumekanga Davidɛ ave, kaamɛ la anto tshɛ ndo apami wa wolo waki lo lonya lande l’omi ndo la lɔmɔsɔ. 7 Shimei akayawodjaka mananu, ata ate: “Tshɔka, tshɔka wɛ ondjakanyi! Wɛ pami k’anyanya! 8 Jehowa ambokofuta l’ɔtɛ wakayadiake ase luudu la Saolo, ɔnɛ lele wɛ ekɔ lo mbolɛ oko nkumekanga lo dihole diande, koko Jehowa ambokimɔ lowandji lo anya wa ɔnayɛ Abisalɔma. Kakianɛ, mpokoso kambokokomɛ dikambo wɛ ekɔ ondjakanyi!”+
9 Ko Abishai ɔna Zeruya+ akatɛ nkumekanga ate: “Lande na kahomba odo wa mfɔ+ ɔnɛ mbidja nkumɛmi nkumekanga mananu?+ Lam’alangayɛ, ontshike ntshu kele toohembole ɔtɛ.”+ 10 Koko nkumekanga akate ate: “Kasami la nyu, nyu ana wa Zeruya?+ Nyootshike ambidje mananu,+ nɛ dia Jehowa kakawote+ ate: ‘Dja Davidɛ mananu!’ Laasɔ, akɔna akoka mbuta ɔnɛ: ‘Lande na kasalayɛ nganɛ?’” 11 Ko Davidɛ akatɛ Abishai ndo ekambi ande tshɛ ate: “Naka ɔnami lakamote dimɛ, lakatombe oma lo demba diami ekɔ lo nyanga lɔsɛnɔ*+ lami, kete hoke oseka Bɛnjamina!+ Nyootshike ambidje mananu, nɛ dia Jehowa kakawote dia nsala dui sɔ! 12 Ondo Jehowa ayɛna ɔkɛyi ami+ ko Jehowa ayonkaloyɛ ɔlɔlɔ lo dihole dia mananu yadjamami la dui dia wolo ɛlɔ.”+ 13 Davidɛ nde l’anto ande wakatatetemalaka la lɔkɛndɔ lawɔ lo mboka etena kakatatshɔka Shimei l’omamu wa dikona suke la Davidɛ, atawodje mananu la dui dia wolo,+ atawoke ave ndo atawotɛ ditshu efula.
14 L’edjedja ka wonya, nkumekanga nde l’anto tshɛ waki kaamɛ la nde wakakome lɛnɛ akawatatshɔka, wakalɛmbɛ ko wakatomuya.
15 L’etena kɛsɔ, Abisalɔma nde l’apami tshɛ w’ase Isariyɛlɛ wakakome la Jɛrusalɛma ndo Ahitɔfɛlɛ+ aki kaamɛ la nde. 16 Lam’akakome Hushai+ ose Araka,+ ɔngɛnyi wa Davidɛ le Abisalɔma, Hushai akatɛ Abisalɔma ate: “Nkumekanga alombe!+ Nkumekanga alombe!” 17 Ko Abisalɔma akatɛ Hushai ate: “Ɔnɛ kele ngandji kayɛ ka kɔlamelo otsha le ɔngɛnyi ayɛ? Lande na kakiyɛ kontshɔ kaamɛ l’ɔngɛnyi ayɛ?” 18 Ko Hushai akatɛ Abisalɔma ate: “Keema, dimi lekɔ lo wedi wa ɔnɛ lambɔsɔnama oma le Jehowa, le anto anɛ ndo ase Isariyɛlɛ tshɛ. Dimi layotshikala kaamɛ la nde. 19 Dimi lambota nto nte: Ahombami kambɛ? Shi ɔnande? Oko wakamakambɛ shɔ kayomokokambɛ.”+
20 Oma laasɔ, Abisalɔma akatɛ Ahitɔfɛlɛ ate: “Ombisha dako.+ Ahombaso nsala?” 21 Ko Ahitɔfɛlɛ akatɛ Abisalɔma ate: “Eyana la eseka wa shɔ+ wakandatshike dia namaka luudu.*+ Oma laasɔ, ase Isariyɛlɛ tshɛ wayoka dia wɛ amboyaetɛ nyama nsolo le shɔ, ko wanɛ wakosukɛ wayokeketshama.” 22 Ɔnkɔnɛ, vɔ wakakɛ Abisalɔma luudu la dipɛma l’ɔtɛ wa luudu,+ ko Abisalɔma akeyana la eseka wa she+ lo washo w’ase Isariyɛlɛ tshɛ.+
23 Lo nshi shɔ, dako diakashaka Ahitɔfɛlɛ+ diakɔsamaka oko* ɔtɛkɛta wa Nzambi ka mɛtɛ. Ngasɔ mbakɔsamaka alako tshɛ waki Ahitɔfɛlɛ oyadi le Davidɛ kana le Abisalɔma.