Etsha
23 Pɔɔlɔ akende ase tominadi ta laadiko t’ase Juda tɛɛ ko akate ate: “Analengo, polo lushi l’ɛlɔ, dimi lekɔ la nkum’otema ka pudipudi+ lo washo wa Nzambi.” 2 Lam’akandoke ngasɔ, ɔlɔmbɛdi a laadiko Ananiya akasha wanɛ wakemala suke la nde dikimɔ dia mbɔkɔmɔla l’onyɔ. 3 Ko Pɔɔlɔ akawotɛ ate: “Nzambi ayokɔkɔmɔla wɛ kanga dungi pende. Onde wɛ ambodjasɛ lo kilombo dia nomboshami lo ndjela Ɛlɛmbɛ ko etena kakɔ kaamɛ wɛ ekɔ lo nsekola Ɛlɛmbɛ lo mbidjanga dia vɔ kɔmɔlami?” 4 Wanɛ wakemala laawɔ wakate vate: “Wɛ ekɔ lo ntɛnga ɔlɔmbɛdi a laadiko waki Nzambi?” 5 Ko Pɔɔlɔ akate ate: “Analengo, dimi hambeyi dia nde ekɔ ɔlɔmbɛdi a laadiko. Nɛ dia akafundama ɔnɛ: ‘Tɔtɛkɛtake kɔlɔ lo dikambo dia owandji wa wodja anyu.’”+
6 Lam’akeye Pɔɔlɔ dia amɔtshi l’atei awɔ waki Asadukɛ ndo akina Afarisɛ, nde akate la dui dia wolo lo tominadi ta laadiko t’ase Juda ate: “Analengo, dimi lekɔ Ofarisɛ,+ ɔna Afarisɛ. Dimi lekɔ lo nomboshama lanɛ l’ɔtɛ wemi la mbetawɔ lo eolwelo k’anto wakavu.” 7 Lam’ele nde akate ngasɔ, owanu wakatombe lam’asa Afarisɛ la Asadukɛ, ko olui w’anto wakakakitɔna. 8 Nɛ dia Asadukɛ wakataka dia eolwelo keema, andjelo keema ndo ditongami dia lo nyuma keema, koko Afarisɛ waketawɔka* akambo asɔ tshɛ.+ 9 Ɔnkɔnɛ, anto wakade ekoko wa wolo ndo afundji amɔtshi wakasukɛka Afarisɛ wakemala ndo wakatatɛ mana la nkɛlɛ tshɛ, wata vate: “Sho hatɛnyi ndooko kɔlɔ kosadi pami kɛnɛ. Naka etongami ka lo nyuma kana ondjelo ɔmɔtshi akatɛkɛtshi la nde.+ . . .” 10 Lam’ele owanu wakatalekaka mfula, kɔmanda k’asɔlayi akoke wɔma ɔnɛ watokoyatshatsha Pɔɔlɔ, ko nde akatome olui w’asɔlayi dia vɔ mpolɔ dia tonya Pɔɔlɔ oma l’atei awɔ ko ndja la nde lo mpango k’asɔlayi.
11 Koko l’otsho, Nkumadiɔndjɔ akemala suke la Pɔɔlɔ ndo akawotɛ ate: “Onga la dihonga!+ Nɛ dia oko wakayasambisha dimɛna dimɛna akambo wendana la mi la Jɛrusalɛma, mbahombayɛ nsambisha ndo la Rɔmɔ.”+
12 Lam’akahotɔ wonya, ase Juda wakɔtɔ sheke ndo wakatshibe wata vate: Hatole ndo hatɔnɔ paka tambodiaka Pɔɔlɔ. 13 Apami ndekana 40 mbakatshibe ndo mbakadje sheke shɔ. 14 Apami asɔ wakatshu le ewandji w’ɛlɔmbɛdi la dikumanyi ndo wakate vate: “Tambosanga lolemi ndo tambotshiba ɔnɛ hatole paka tambodiaka Pɔɔlɔ. 15 Ɔnkɔnɛ, nyu l’ase tominadi ta laadiko t’ase Juda pombaka mbutɛ kɔmanda k’asɔlayi dia nde pombaka mbotoma oya le nyu oko nyekɔ lo nanga nyomoleka nsɛdingola dikambo diande dimɛna. Koko la ntondo ka nde nkoma, tayonga suke dia mbodiaka.”
16 Koko, ɔnaki kadiyɛ Pɔɔlɔ akoke sheke yawɔ ko nde akɔtɔ lo mpango k’asɔlayi ndo akatewoya Pɔɔlɔ. 17 Ko Pɔɔlɔ akelɛ owandji ɔmɔtshi w’asɔlayi ndo akawotɛ ate: “Tɔla ɔlɔngɔ a pami ɔnɛ le kɔmanda k’asɔlayi, nɛ dia nde ekɔ la dui dimɔtshi dia mbotɛ.” 18 Ko nde akawɔshi, akɔɔtɔlɛ le kɔmanda k’asɔlayi ndo akate ate: “Pɔɔlɔ lele lo lokanu kombele ndo kɔnɔmbi dia dimi mbela ɔlɔngɔ a pami ɔnɛ le yɛ nɛ dia nde ekɔ la dui dimɔtshi dia kotɛ.” 19 Ko kɔmanda k’asɔlayi akokimɛ lo lonya, akatshu la nde lo sheke ndo akawombola ate: “Kakɔna kalangayɛ mbutɛmi?” 20 Nde akate ate: “Ase Juda wambosanga lolemi dia ndjokɔlɔmba dia wɛ nkimɔ Pɔɔlɔ loyi le ase tominadi ta laadiko t’ase Juda oko vɔ wekɔ lo nanga menda dikambo diande dimɛna.+ 21 Koko tetawɔke kɛnɛ kayowokɔlɔmba, nɛ dia apami ndekana 40 l’atei awɔ wamboshila mpolama dia mbokonga ndo vɔ wakatshibe diaha vɔ ndɛ kana nnɔ paka wamboodiaka;+ ndo kakianɛ vɔ wekɔ suke ndo wokongaka paka lotshungɔ l’oma le yɛ.” 22 Ko kɔmanda k’asɔlayi akatɛ ɔlɔngɔ a pami ɔsɔ dia nde nkalola, l’ɔkɔngɔ wa nde mbotɛ ate: “Totɛke ndooko onto dia wɛ akambute akambo asɔ.”
23 Ko nde akelɛ ewandji 2 w’asɔlayi ndo akate ate: “Nyosukanya asɔlayi 200 dia vɔ ntshɔ la Kayisariya ndo ambahemi wa mfalasa 70 ndo amboki w’akɔnga 200 dia vɔ monɛ lo wonya wa 3* w’otsho. 24 Nyosukanya ndo mfalasa dia vɔ mbahenya Pɔɔlɔ ndo mbokonya demba ki polo le nguvɛrnɛrɛ Feliksɛ.” 25 Ko nde akafunde mukanda wata ɔnɛ:
26 “Dimi Klodiyo Lusiya lambokofundɛ wɛ Shakasaka nguvɛrnɛrɛ Feliksɛ nte: Mɔyɔ! 27 Ase Juda wakande pami kɛnɛ ndo waki suke la mbodiaka, koko lakaye esadi eto la asɔlayi ami ndo lakooshimbɛ,+ nɛ dia lakeye dia nde ekɔ ose Rɔmɔ.+ 28 Lo nyanga dia mbeya lande na koofundawɔ, lakootome le ase tominadi ta laadiko t’ase Juda.+ 29 Dimi lakɛnyi dia wekɔ lo mbofunda l’ɔtɛ w’akambo wendana l’Ɛlɛmbɛ awɔ,+ koko ndooko dikambo diawofundawɔ diakokande ndjakema kana mbidjama lo lokanu. 30 Koko lam’ele lakeye+ sheke yakawɔtwɛ pami kɛnɛ, lambokotomɛnde aha la ntshimbatshimba ndo lambotɛ wanɛ woofunda dia vɔ ndjokotɛ kɛnɛ kofundawɔ.”
31 Ɔnkɔnɛ, asɔlayi asɔ wakɔshi Pɔɔlɔ+ lo ndjela kɛnɛ kakawawadjangɛ, ko wakatshu la nde l’otsho otsha la Atipatiri. 32 La wedi a pindju, vɔ wakatshike ambahemi wa mfalasa dia vɔ ntshɔ la nde, koko asɔlayi akina wakakalola lo mpango k’asɔlayi. 33 Ambahemi wa mfalasa wakakome la Kayisariya, wakasha nguvɛrnɛrɛ mukanda ndo wakatshike Pɔɔlɔ l’anya ande. 34 Ko nde akadia mukanda akɔ ndo akambola dia mbeya ose prɔvɛnsɛ kakɔna kende ndo akeye dia Pɔɔlɔ aki ose Kilikiya.+ 35 Ko nde akate ate: “Layokohokamɛ dimɛna lam’ayoya+ wanɛ wakofunda.” Ndo nde akate dia vɔ mbolama lo luudu* l’owandji Hɛrɔdɛ.