Rɔmɔ
2 Ɔnkɔnɛ, wɛ lalombosha anto akina, oyadi onto akɔna eeyɛ,+ wɛ ndooko l’ɔkɔkɔ wa mbisha tɛkɛ nɛndɛ, etena kalomboshayɛ anto akina, wɛ ekɔ lo ndjaanya wɛmɛ dikambo wɛ ekɔ lo nsala akambo akɔ waamɛ+ walomboshayɛ anto akina. 2 Koko sho mbeyaka dia kilombo kaki Nzambi kekɔ lo yoho yɔtɔnɛ la mɛtɛ, otsha le wanɛ wasala akambo wa ngasɔ.
3 Wɛ onto le, onde wɛ fɔnyaka dia, etena kalomboshayɛ wanɛ wasala akambo asɔ, koko wɛmɛ ekɔ lo mbasala, wɛ ayohandɔ lo kilombo kaki Nzambi? 4 Kana onde wɛ mɔnyɔlaka ɔngɔnyi w’ɔlɔlɔ ande w’otema,+ wa ndjakimɛ+ kande ndo wa solo diande dia lotutsha+ nɛ dia wɛ heye dia Nzambi, oma lo ɔlɔlɔ ande w’otema ekɔ lo nanga kokonya lo ndjatshumoya?+ 5 Koko, lo ndjela ɔtɛ wolo ayɛ ndo weyɛ la otema wele bu la ndjatshumoya, wɛ ekɔ lo ndjayangɛ nkɛlɛ lo lushi la nkɛlɛ ndo layɛnama kilombo+ ka losembwe kaki Nzambi. 6 Nde ayofuta onto l’onto lo ndjela etsha ande:+ 7 Lɔsɛnɔ la pondjo le wanɛ wayanga lotombo, kɛnɛmɔ ndo demba diahahɔndɛ+ oma lo etete kawɔ l’olimu w’ɔlɔlɔ, 8 koko nkɛlɛ+ la odudu le wanɛ wele la yimba y’esolanyi ndo wahakitanyiya akambo wa mɛtɛ, koko wekɔ lo nsala akambo wa kɔlɔ. 9 Asui la lɔkɔnyɔ wayonga le onto tshɛ* lasala kɛnɛ kele kɔlɔ, ntondo le ase Juda ko ndo le ase Ngirika. 10 Koko lotombo, kɛnɛmɔ ndo wɔladi le onto tshɛ lasala kɛnɛ kele ɔlɔlɔ, ntondo+ le ase Juda ko ndo le ase Ngirika.+ 11 Nɛ dia Nzambi+ keema la shɔnɔdi.
12 Nɛ dia wanɛ tshɛ wakasale pɛkato aha la mbeya ɛlɛmbɛ+ wayolanyema aha la ɛlɛmbɛ. Koko wanɛ tshɛ weya ɛlɛmbɛ ko wakasale pɛkato wayolomboshama oma l’ɛlɛmbɛ.+ 13 Nɛ dia aha wanɛ woka tsho ɛlɛmbɛ mbele anto w’ɛlɔlɔ lo washo wa Nzambi, koko wanɛ wakitanyiya ɛlɛmbɛ mbayɔsama oko anto w’ɛlɔlɔ.+ 14 Nɛ dia etena katosalaka ase wedja waheye ɛlɛmbɛ,+ lo vɔamɛ akambo wɔtɔnɛ la ɛlɛmbɛ, kaanga mbewɔ bu la ɛlɛmbɛ, vɔamɛ wekɔ ɛlɛmbɛ le wɔ. 15 Vɔ mbɛnya dia akambo wa lo ɛlɛmbɛ fundama l’etema awɔ etena kele nkum’otema kawɔ shikikɛka kaamɛ la wɔ ndo oma lo* tokanyi tawɔ hita dia vɔ wekɔ lo manyema kana wekɔ lo nyindjama. 16 Kɛsɔ kayosalema lushi layolombosha Nzambi lo tshimbo ya Kristo Yeso akambo woshɛmi w’anto+ lo ndjela lokumu l’ɔlɔlɔ lasambishami.
17 Naka wɛ mbelamɛka+ ose Juda ndo ndjaɛkɛka lo ɛlɛmbɛ, ko wɛ ekɔ l’ofunu lo dikambo dia Nzambi, 18 ndo wɛ mbeyaka lolango lande ndo mbetawɔka akambo wele ohomba efula nɛ dia wɛ ekɔ lo mbetshama* Ɛlɛmbɛ,+ 19 ndo wɛ ambetawɔ dia wɛ ekɔ ɔnɔmbɔdi w’akanga wa totshungu, osase le wanɛ wele lo wodjima, 20 omingudi w’anto wele bu l’ekanelo k’ɔlɔlɔ, ombetsha wa ana w’akɛnda, wɛ amboshihodia lokongɛ la ewo ndo la akambo wa mɛtɛ wa lo Ɛlɛmbɛ . . . 21 ko wɛ ɔnɛ letsha onto okina, wɛ hayaetsha wɛmɛ?+ Wɛ lasambisha ɔnɛ: “Tovake,”+ ko wɛmɛ mbivaka? 22 Wɛ lata wate: “Tosalake loseka,”+ ko wɛmɛ salaka loseka? Wɛ onto lahetsha dikishi, ko wɛmɛ mimbaka diangɔ dia lo tɛmpɛlɔ? 23 Wɛ onto layafuna dikambo dia ɛlɛmbɛ, ko wɛmɛ mɔnyɔlaka Nzambi lo mpindola Ɛlɛmbɛ? 24 Nɛ dia “lokombo la Nzambi lekɔ lo tɛngama le ase wedja l’ɔtɛ anyu,” oko wakadiafundama.+
25 Lo mɛtɛ, wonyelo wa mpota+ wekɔ la nɛmɔ paka naka wɛ ekɔ lo nkitanyiya ɛlɛmbɛ.+ Ko naka wɛ ekɔ ɔmɔnyɔdi w’ɛlɛmbɛ, kete wonyelo ayɛ wa mpota waya oko onto laki kominyɛma mpota. 26 Ko naka onto laki kominyɛma mpota+ ekɔ lo nkitanyiya wadjango wosembwe wa lo Ɛlɛmbɛ, kete woho wakinde kominyɛma mpota ayɔsama oko onto lakanyɛma mpota, shi mɛtɛ?+ 27 Ndo onto laki kominyɛma mpota lo demba, lakitanyiya Ɛlɛmbɛ ayokolombosha wɛ lele ɔmɔnyɔdi w’ɛlɛmbɛ kaanga mbeyayɛ ɛlɛmbɛ ndo kaanga mbakayanyɛma mpota. 28 Nɛ dia aha ɛnamelo ka l’andja+ kana wonyelo wa mpota wa l’andja, lo demba+ kalembetshiya monga ose Juda. 29 Koko ɔnɛ lele ose Juda ekɔ la l’etei+ ndo wonyelo ande wa mpota wekɔ wa l’etei k’otema+ oma le nyuma, koko aha oma lo Ɛlɛmbɛ.+ Lotombo l’onto ɔsɔ ndja oma le Nzambi, koko aha oma le anto.+