Rɔmɔ
10 Analengo, ɔlɔlɔ w’otema ami ndo kɛnɛ kasɛngasɛngami Nzambi lo dikambo diawɔ ele dikambo dia panda+ kawɔ. 2 Nɛ dia dimi lambota dia vɔ wekɔ la ohetoheto le Nzambi,+ koko aha lo ndjela ewo k’oshika. 3 Nɛ dia lam’ele vɔ haweye losembwe laki Nzambi,+ koko vɔ nyangaka dia nshikikɛ losembwe lawɔ hita,+ vɔ kombetawɔ losembwe laki Nzambi.+ 4 Nɛ dia Kristo kele ekomelo k’Ɛlɛmbɛ+ dia onto tshɛ longa la mbetawɔ monga la losembwe.+
5 Nɛ dia Mɔsɛ akafunde lo dikambo dia losembwe l’oma lo Ɛlɛmbɛ ate: “Onto lasala akambo asɔ ayonga la lɔsɛnɔ lo tshimbo yawɔ.”+ 6 Koko losembwe laya oma lo mbetawɔ mbutaka ɔnɛ: “Totake l’otema ayɛ wate:+ ‘Akɔna ayodɛ l’olongo?’+ mbuta ate dia mpoloya Kristo, 7 kana ɔnɛ: ‘Akɔna ayoholɔ lo difuku diaha l’ekomelo?’+ mbuta ate dia mbolola Kristo oma lo nyɔi.” 8 Ko kakɔna kata afundelo? “Ɔtɛkɛta wekɔ suke la yɛ, lo onyɔ ayɛ ndo lo otema ayɛ,”+ mbuta ate “ɔtɛkɛta” wa mbetawɔ wasambishaso. 9 Nɛ dia naka wɛ mbewoya lo sɛkɛ la onyɔ ayɛ dia Yeso ekɔ Nkumadiɔndjɔ+ ndo wɛ monga la mbetawɔ l’otema ayɛ dia Nzambi akawolola oma lo nyɔi, kete wɛ ayoshimbamɛ. 10 Nɛ dia la otema mbonga onto la mbetawɔ dikambo dia losembwe, koko la onyɔ mbasala onto wotelo wa lo sɛkɛ+ dikambo dia panda.
11 Nɛ dia afundelo mbutaka ɔnɛ: “Ndooko onto longa la mbetawɔ le nde layɛmba ɛkɔndjɔ.”+ 12 Dikambo ndooko otshikitanu lam’asa ose Juda la ose Ngirika.+ Ekɔ Nkumadiɔndjɔ kaamɛ laadiko diawɔ tshɛ, ɔnɛ lele ɔngɔnyi* otsha le wanɛ tshɛ welɛ* lokombo lande. 13 Nɛ dia “onto tshɛ lelɛ* lokombo la Jehowa* ayoshimbamɛ.”+ 14 Ko ngande wayowelɛ* ɔnɛ lewɔ watetawɔ? Ngande wayowetawɔ ɔnɛ lewɔ watokaka dikambo diande? Ngande wayowoka aha la onto ɔmɔtshi mbasambisha? 15 Ngande wayowosambisha naka watatomama?+ Oko wakadiafundama ɔnɛ: “Ande amɛna wele ekolo wa wanɛ wewoya lokumu l’ɔlɔlɔ l’akambo w’ɛlɔlɔ lee!”+
16 Koko aha vɔ tshɛ mbakakitanyiya lokumu l’ɔlɔlɔ. Nɛ dia Isaya akate ate: “Jehowa* le, akɔna akonge la mbetawɔ lo kɛnɛ kakawoke oma le so?”*+ 17 Ɔnkɔnɛ, mbetawɔ ndjaaka oma lo kɛnɛ koka onto.+ Kɛnɛ koka onto ndjaaka oma l’ɔtɛkɛta wendana la Kristo. 18 Koko dimi lambombola nte: Vɔ wakoke, shi mɛtɛ? Ko enda “londjo ladjawɔ lambokɛma lo nkɛtɛ k’otondo, ndo losango+ lawɔ polo ndo lo tokoma ta nkɛtɛ k’otondo.” 19 Koko, dimi lambombola nte: Ase Isariyɛlɛ wakeye, shi mɛtɛ?+ Mɔsɛ akate ntondo ate: “Dimi layonyotshutshuya dia monga la kandjema lo tshimbo ya kɛnɛ kele bu wodja; dimi layonyotshutshuya lo nkɛlɛ ka ngala lo tshimbo ya wodja+ w’akanga wa dinginya.” 20 Koko Isaya aki la dihonga di’efula ndo akate ate: “Dimi lakatanema le wanɛ waki konyangakami;+ dimi lakayaeyanya le wanɛ waki komimbolami.”+ 21 Koko nde akate lo dikambo dia Isariyɛlɛ ate: “Lushi l’otondo dimi lakasandjola anya ami otsha le anto wele bu la okitanyiya ndo wele ɛtɛ wolo.”+