1 Nkumi ya dikanga

4 Nkumekanga Sɔlɔmɔna akolɛ Isariyɛlɛ+ w’otondo. 2 Ewandji ande wa weke vɔ ɛnɛ: Azariya ɔna Zadɔka+ aki ɔlɔmbɛdi; 3 Elihɔrɛfu nde la Ahidja, ana wa Shisha mbaki afundji;+ Jɛhɔshafata+ ɔna Ahiludɛ aki ɔkɔndɔdi; 4 Bɛnaya+ ɔna Jɛhɔyada aki owandji w’asɔlayi; Zadɔka nde la Abiyatara+ waki ɛlɔmbɛdi; 5 Azariya ɔna Natana+ aki owandji wa topita; Zabuda ɔna Natana aki ɔlɔmbɛdi ndo ɔngɛnyi wa nkumekanga;+ 6 Ahishara aki ɔnɔmbɔdi w’ase luudu; ndo Adɔnirama+ ɔna Abida aki owandji wa wanɛ wakawakandjaka elimu la wolo.+

7 Sɔlɔmɔna aki la topita 12 taki la ɔkɛndɛ lo Isariyɛlɛ w’otondo dia mbishaka nkumekanga nde l’ase luudu lande mbo ya ndɛ. Onto l’onto aki la ɔkɛndɛ wa mbelaka mbo ya ndɛ ngɔndɔ 1 lo ɔnɔnyi.+ 8 Nkombo yawɔ yɔ nyɛ: Ɔna Hura, lo lɛkɛ l’akona la Efrayimɛ; 9 ɔna Dɛkɛrɛ, lo Makaza, lo Shalabima,+ lo Bɛtɛ-Shɛmɛshɛ ndo lo Elɔna-Bɛtɛ-Hanana; 10 ɔna Hesɛdɛ, lo Arubota (nde aki kanga Sɔko ndo ɛtshi ka nkɛtɛ k’otondo ka Hefɛrɛ); 11 ɔna Abinadaba, lo eholola tshɛ wa Dɔra (Tafata ɔna Sɔlɔmɔna la womoto akayonga wadɛnde); 12 Baana ɔna Ahiludɛ, lo Tanaka, lo Mengido+ ndo lo Bɛtɛ-Sheana+ k’otondo kele suke la Zarɛtana l’ɛse ka Jezɛrɛlɛ, oma la Bɛtɛ-Sheana polo lo Abɛlɛ-Mehola, polo l’ɛtshi ka nkɛtɛ ka Jɔkɛmeamɛ;+ 13 ɔna Ngebɛrɛ, lo Ramɔta-Ngiliyadɛ+ (nde aki la ngelo yaki la mvudu y’apɛma ya Jayira+ ɔna Manase yele la Ngiliyadɛ;+ nde aki ndo l’ɛtshi ka nkɛtɛ ka Arangoba+ kele la Bashana:+ Esomba 60 wa weke wele la mpele ndo la tokengete ta nkonga); 14 Ahinadaba ɔna Ido, lo Mahanayima;+ 15 Ahimaza, lo Nafɛtali (nde akatshuke Basɛmatɛ, ɔna Sɔlɔmɔna okina la womoto); 16 Baana ɔna Hushai, lo Ashɛrɛ ndo Bealɔta; 17 Jɛhɔshafata ɔna Parua, lo Isakara; 18 Shimei+ ɔna Ela, lo Bɛnjamina;+ 19 Ngebɛrɛ ɔna Uri, lo ɛtshi ka nkɛtɛ ka Ngiliyadɛ,+ ɛtshi ka nkɛtɛ ka Sihɔna+ nkumekanga k’ase Amɔra ndo ka Onga+ nkumekanga ka Bashana. Ndo nto, kapita kɛmɔtshi aki owandji wa topita tokina tɔsɔ tshɛ lo wodja.

20 Juda la Isariyɛlɛ waki l’anto efula oko nsɛkɛ ya lɔkɔngɔ la l’omamu wa ndjale;+ vɔ wakalɛka, wakanɔka ndo wakangɛnangɛnaka.+

21 Sɔlɔmɔna akolɛ waolelo tshɛ, oma lo Ɔkɛdi*+ polo lo ɛtshi ka nkɛtɛ k’ase Filistiya ndo polo l’olelo w’Edjibito. Vɔ wakelaka olambo ndo wakakambɛka Sɔlɔmɔna lo nshi tshɛ ya lɔsɛnɔ lande.+

22 Mbo ya ndɛ ya Sɔlɔmɔna ya lushi la lushi yaki la tɛdikɔ ta kɔra* 30 t’ofushi wa dimɛna, ndo tɛdikɔ ta kɔra 60 t’ofushi, 23 ngɔmbɛ ya wata 10, ngɔmbɛ yaleshawɔ adiyo l’oswe 20, ndo ɛkɔkɔ 100 aha la mbidja waa mpele, mboloko, mangana ndo tofudu ta wata. 24 Nɛ dia nde akalɔmbɔlaka akambo tshɛ lo wedi ɔnɛ w’Ɔkɛdi,*+ oma la Tifisa polo la Ngaza,+ mbidja ndo nkumi ya dikanga tshɛ ya lo wedi ɔnɛ w’Ɔkɛdi, ndo nde aki la wɔladi lo bɛtshi dia nkɛtɛ tshɛ lo wedi akɔ tshɛ.+ 25 Juda la Isariyɛlɛ wakasɛnaka lo lotui tshitshi, onto l’onto l’ɛse k’ɔkɔdi ande wa vinyɔ ndo l’ɛse k’osongo ande wa fingo, oma la Danɛ polo la Bɛrɛ-Shɛba, lo nshi tshɛ ya Sɔlɔmɔna.

26 Sɔlɔmɔna aki la nkoto ya mfalasa nunu nɛi (4 000)* dikambo dia pusupusu yande ndo mfalasa* nunu dikumi la pende (12 000).+

27 Topita tɔsɔ wakelaka nkumekanga Sɔlɔmɔna ndo wanɛ tshɛ wakalɛka lo mɛsa wa nkumekanga Sɔlɔmɔna mbo ya ndɛ. Onto l’onto aki l’ɔkɛndɛ wa ngɔndɔ kande ndo nsala diaha kaanga ɛngɔ pombama.+ 28 Vɔ wakelaka ndo asami la adiyo dihole tshɛ diaki ohomba dikambo dia mfalasa ndo dikambo dia mfalasa ya lokakatanya, onto l’onto lo ndjela yɛdikɔ yakandahombaka nkimɔ.

29 Nzambi akasha Sɔlɔmɔna lomba ndo shɛnɔdi lo yɛdikɔ y’efula ka mamba ndo otema wele la yimba efula* oko nsɛkɛ ya lɔkɔngɔ la l’omamu wa ndjale.+ 30 Lomba la Sɔlɔmɔna lakaleke lomba l’anto tshɛ wa lo Ɛstɛ ndo lomba tshɛ la l’Edjibito.+ 31 Nde aki la lomba loleki anto akina tshɛ, lomba loleki Etana+ oseka Ɛzɛra ndo Hemana,+ Kalakɔla+ ndo Darada, ana wa Mahola. Lokumu lande lakakokanɛ lo wedja tshɛ wakaadinge.+ 32 Nde akakongɛ* tokedi+ nunu sato (3 000) ndo lofulo la esambo+ ande laki kinunu la etanu (1 005). 33 Nde akatɛkɛtaka dikambo di’esongo, ntatɛ oma le olondo wa la Lɛbanɔna polo le diyo dia izɔpɛ+ diatomba l’ehele; nde akatɛkɛtaka dikambo dia nyama,+ tofudu,*+ diangɔ diele elui elui*+ ndo nse. 34 Anto w’oma lo wedja tshɛ wakayaka ndjohokamɛ lomba la Sɔlɔmɔna, mbidja ndo nkumi ya dikanga y’oma lo nkɛtɛ k’otondo yakoke lokumu la lomba+ lande.