Ɛzɛkiyɛlɛ
17 Ɔtɛkɛta wa Jehowa wakaye le mi nto ɔnɛ: 2 “Ɔna onto, ta ɔkɛla ndo oka yokedi lo dikambo dia luudu la Isariyɛlɛ.+ 3 Ta wate: ‘Nkum’Olongo Nkumadiɔndjɔ Jehowa kata ate: “Mpongo+ ka woke kele la ahafu wa weke, la nsala y’etale ndo la nsala ya totshitshɛ ya asango asango kakatshu la Lɛbanɔna+ ndo kakahatola shɔdi y’osongo w’olondo.+ 4 Tɔ kakahatola shɔdi ya lotahe loleki la diko, ko kakalitɔlɛ lo wodja wa amundji w’okanda* ndo kakatolikitsha l’osomba wa amundji w’okanda.+ 5 Oma laasɔ, tɔ kakɔshi yema ya ntɔngɔ ya lo wodja+ ndo kakayikitsha lo nkɛtɛ ya ɛtɛtɔ. Tɔ kakayionɛ oko osongo wa solɛ suke la ashi w’efula. 6 Ko yɔ yakatombe ndo yakayala ɔkɔdi wa vinyɔ+ wa mondo, wosandjwe ndo akatshi awɔ wakɛlɛka otsha l’etei ndo edio awɔ wakole l’ɛse kawɔ. Ko vɔ wakayala ɔkɔdi wa vinyɔ wakatondja nsɔngusɔngu ndo wakatondja ntahe.+
7 “‘“Ko mpongo+ kekina ka woke kaki la ahafu wa weke ndo la nsala y’etale+ kakaye. Ko ɔkɔdi wa vinyɔ wakasandjola edio awɔ la waasaso tshɛ otsha le tɔ, etale oma lo nkɛtɛ y’ekambɔ lɛnɛ akawonɛma ndo wakatome akatshi awɔ otsha le tɔ dia tɔ mbotɛka ashi.+ 8 Vɔ wakashile monɛma lo nkɛtɛ ya dimɛna suke la ashi w’efula dia vɔ ntondja ntahe, ntɔ elowa ndo monga ɔkɔdi wa vinyɔ+ wa woke.”’
9 “Ta wate: ‘Nkum’Olongo Nkumadiɔndjɔ Jehowa kata ate: “Onde vɔ wayɔngɔna? Onde onto ɔmɔtshi hatokundola edio+ awɔ ko mpɔndja elowa awɔ ndo nsala dia vɔ nɛngɛ?+ Vɔ wayoma to lo yoho yele hatonga ohomba wa lonya la wolo kana anto efula dia mbokundola oma lo edio. 10 Kaanga mbakawasangɔma, onde vɔ wayɔngɔna? Onde vɔ hawotoma to lam’ayɔpɛpa lɔpɛpɛ l’oma lo ɛstɛ lɔkɔ? Vɔ wayoma lo nkɛtɛ y’ekambɔ lɛnɛ akawatombe.”’”
11 Ɔtɛkɛta wa Jehowa wakaye le mi nto ɔnɛ: 12 “Lam’alangayɛ, tɛ luudu la atɔmbɔki wate: ‘Onde nyu hanyeye kɛnɛ kalembetshiya akambo anɛ?’ Ta wate: ‘Nyende, nkumekanga ka Babilɔna akaye la Jɛrusalɛma ko akɔshi nkumekanga kayɔ la ewandji ayɔ ko akakalola la wɔ otsha la Babilɔna.+ 13 Ndo nto, nde akɔshi ɔna*+ ɔmɔtshi oma lo dioho dia nkumekanga ko akadje sheke la nde ndo akootshibia.+ Oma laasɔ, nde akatshu la apami wa lokumu wa lo wodja,+ 14 dia diolelo nkitshakitshama, woho wahadiakoke mbidiyama, kele paka lo nama sheke yande mbakokadiɔ ntetemala monga.+ 15 Koko l’edjedja ka wonya nkumekanga akayɔɔtɔmbɔkwɛ+ lo ntoma akɛndji ande otsha lo Edjibito dia tɔsa mfalasa+ ndo olui wa woke wa asɔlayi oma le wɔ.+ Onde nde ayotondoya? Onde ɔnɛ lasala akambo asɔ ayohandɔ dilanya? Onde nde koka mbitola sheke ko ntetemala mpandɔ?’+
16 “‘“Lo mɛtɛ oko wemi la lɔsɛnɔ,” mbata Nkum’Olongo Nkumadiɔndjɔ Jehowa, “nde ayovɔ la Babilɔna lɛnɛ adjasɛ nkumekanga* kakawetɛ* nkumekanga, ɔnɛ lakanga etshibelo kakandɔnyɔla ndo lakanga sheke yakandatola.+ 17 Ndo olui wa woke wa asɔlayi ndo nyemba nyemba y’anto waki Farawɔ hawotosha ndooko ekimanyielo lo ta,+ etena kayokama mpango ndo mpele dia odingelo dia ndanya nsɛnɔ* efula. 18 Nde akɔnyɔla etshibelo ndo akatola sheke. Kaanga mbakandatshike daka,* nde ambosala akambo asɔ tshɛ, ndo nde hatohandɔ.”’
19 “‘Ɔnkɔnɛ, Nkum’Olongo Nkumadiɔndjɔ Jehowa kata ate: “Lo mɛtɛ oko wemi la lɔsɛnɔ, dimi layela lo ɔtɛ ande etombelo wa kɔlɔ w’oma lo woho wamondɔnyɔla etshibelo+ kami ndo wamondotola sheke yami. 20 Dimi layosandjola ɔtɛyi ami laadiko diande ndo nde ayondama lo ɔtɛyi+ ami wa wenga. Dimi layowɔtɔla la Babilɔna ko layotɔɔtɔ la nde lo kilombo lɛkɔ l’ɔtɛ wakinde komonga la kɔlamelo le mi.+ 21 Asɔlayi ande tshɛ wayolawɔ wayodiakema la lokuwa la ta ndo wanɛ wayotshikala wayodianganyema lo bɛkɛ* tshɛ.+ Ko nyayohomba mbeya dia dimi dimɛ Jehowa mbakatɛkɛta.”’+
22 “‘Nkum’Olongo Nkumadiɔndjɔ Jehowa kata ate: “Dimi layɔsa lotahe oma lo shɔdi ya olondo+ w’otale ndo layolionɛ, oma lo shɔdi ya nsɔngusɔngu yayɔ, dimi layohembola lotahe leke wɔdu+ ndo dimi dimɛ layolionɛ lo dikona+ dia tanga ndo di’otale. 23 Lo dikona dia tanga dia lo Isariyɛlɛ kayomolionɛ; ko ntahe yalɔ yayola ndo yayɔtɔ elowa ndo yayokoma olondo wa woke. Weho tshɛ wa fudu wayahemaka lɔkɔ ndo wayodjasɛka lo dɛdi dia akatshi awɔ. 24 Ndo esongo tshɛ wa l’okonda wayohomba mbeya dia dimi dimɛ Jehowa mbakakitshakitsha osongo w’otale ndo mbakadiya osongo wa mondo;+ dimi lakoonya osongo w’oyoyo ndo lakasale dia osongo wamboma mɔnga.+ Dimi dimɛ Jehowa kakatɛkɛta ndo kakadisale.”’”