2 Nkumi ya dikanga

5 Namana owandji w’asɔlayi wa nkumekanga ka Suriya aki pami ka lokumu kakɔsamaka la nɛmɔ le nkumɛnde, nɛ dia Jehowa akasha ase Suriya otshumba* lo tshimbo yande. Nde aki ɔndɔshi wa ta wa wolo kaanga mbakinde kanga sudi.* 2 Lo ta dimɔtshi, ase Suriya wakande yana ya yimato mɔtshi mfumbe oma lo wodja w’Isariyɛlɛ ko nde akayonga okambi waki wadi aki Namana. 3 Nde akatɛ nkumɛnde ka womoto ate: “Nkumɛmi otondotshɔ tɛnana la omvutshi+ wele la Samariya, tshike nde otowɔkɔnɔla sudi+ kande.” 4 Ko nde* akatshu, akatotɛ nkumɛnde, awotɛ kɛnɛ kakate yana ya yimato y’oma lo Isariyɛlɛ.

5 Oma laasɔ, nkumekanga ka Suriya akate ate: “Tshɔka! Dimi layotomɛ nkumekanga k’Isariyɛlɛ mukanda.” Ko nde akatshu kaamɛ la talata* 10 ya mfɛsa, ekenga nunu samalo (6000) wa paonyi ndo ahɔndɔ 10. 6 Nde akatɔlɛ nkumekanga k’Isariyɛlɛ mukanda wakawafunde ɔnɛ: “Dimi lambotoma okambi ami Namana kaamɛ la mukanda ɔnɛ dia wɛ mbɔkɔnɔla sudi kande.” 7 Kam’akadia nkumekanga k’Isariyɛlɛ mukanda akɔ, nde akaatshatsha ahɔndɔ ande ko akate ate: “Onde dimi Nzambi kemi dia ndjaka kana ntshika la lɔsɛnɔ?+ Nɛ dia nde ambontomɛ pami kɛnɛ, dia ndjombutɛ dia dimi mbɔkɔnɔla sudi kande! Nyuamɛ nyekɔ lo mɛna woho wanyangande la esolanyi.”

8 Koko lam’akoke Elisha okambi wa Nzambi ka mɛtɛ dia nkumekanga k’Isariyɛlɛ ambatshatsha ahɔndɔ ande, mbala kakɔ ɔtɔi nde akatomɛ nkumekanga dui ate: “Lande na kamboyatshatsha ahɔndɔ ayɛ? Lam’alangayɛ, etawɔ dia nde ndja le mi, kele nde eye dia omvutshi ɔmɔtshi ekɔ lo Isariyɛlɛ.”+ 9 Ko Namana akaye kaamɛ la mfalasa yande ndo pusupusu yande ya ta, ko akayemala la soko dia luudu laki Elisha. 10 Koko Elisha akatome ɔkɛndji dia ndjowotɛ ɔnɛ: “Tshɔka tɔkɛ mbala+ 7 lo Jɔrdana,+ ko demba diayɛ diayokalola woho wakidiɔ ntondo ndo wɛ ayɔkɔnɔ.” 11 Ko Namana akomala ndo akatatɛ mbikɔ, ata ate: “Lakakanyiyaki nte: ‘Nde ayotomba oya le mi, ayemala lanɛ ndo ayeelɛ* lokombo la Jehowa Nzambi kande, ayetshetsha lonya lande ahole wele sudi dia kikɔnɔla.’ 12 Onde Abana la Farapara, ɛkɛdi wa la Damasɛkɛ+ hawoleki ashi tshɛ wa lo Isariyɛlɛ amɛna? Onde dimi haakoke mbɔka lɔkɔ ko nkɔnɔ?” Ko nde akakadimɔ ndo akatshu la nkɛlɛ k’efula.

13 Ko ekambi ande wakasukana lalende ndo wakate vate: “Papa, otondonga omvutshi akakote dia wɛ nsala dui dimɔtshi dia diambo, onde totoyodisala? Kete hoke nde kotɛ tsho ate: ‘Tɔkɛ kele kɔnɔ’?” 14 Ko nde akaholɔ ndo akatombɛ* mbala 7 lo Jɔrdana, lo ndjela ɔtɛkɛta w’okambi wa Nzambi ka mɛtɛ.+ Ko demba diande diakakalola woho wakidiɔ ntondo oko demba dia ɔna dikɛnda+ ndo nde akakɔnɔ.+

15 L’ɔkɔngɔ wa laasɔ, nde akakalola otsha le okambi wa Nzambi ka mɛtɛ+ nde l’anto tshɛ wakaye la nde,* ko nde akemala la ntondo kande ndo akate ate: “Kakianɛ lambeya dia lo nkɛtɛ k’otondo, ndooko dihole dikina diele Nzambi paka lo Isariyɛlɛ.+ Ɔnkɔnɛ lam’alangayɛ, longola woshasha* ɔnɛ w’oma le okambi ayɛ.” 16 Koko Elisha akate ate: “Lo mɛtɛ oko wele Jehowa lakambɛmi* la lɔsɛnɔ, dimi hantolongola.”+ Nde akɔɔsɛngasɛnga dia nde nongola, koko nde akatetemala ntona. 17 L’ekomelo, Namana akate ate: “Lam’alangayɛ, naka wɛ halongola, etawɔ dia dimi okambi ayɛ nongola eshikɔ wa nkɛtɛ y’oma lo wodja ɔnɛ wakoka mfalo 2 mɛmba, nɛ dia dimi okambi ayɛ hantolambola olambo wa lotshumba kana olambo okina nto le jambizambi kina laadiko dia Jehowa. 18 Koko Jehowa adimanyiya dimi okambi ayɛ l’ɔtɛ wa dikambo nɛ: Lam’ɔtɔ nkumɛmi lo luudu* la Rimɔna dia nkusama lɛkɔ, nde mbɛkamaka lo lonya lami, ko dimi nɔmbamaka dia nkusama lo luudu la Rimɔna. Lam’akusamami lo luudu la Rimɔna, Jehowa adimanyiya okambi ayɛ lo dikambo sɔ.” 19 Ko nde akate ate: “Tshɔka la ki.” L’ɔkɔngɔ wa nde nkakitɔna la nde ndo wa nde ntshɔ yema tshale, 20 Ngɛhazi+ okimanyedi waki Elisha okambi wa Nzambi ka mɛtɛ+ akate l’otema ande ate: ‘Wonya ɔnɛ nkumɛmi ambɔkɛndja Namana+ pami k’ose Suriya kɛnɛ aha la nongola kaanga ɛngɔ 1 kakandawela. Lo mɛtɛ oko wele Jehowa la lɔsɛnɔ, layanga mboyela la lowango kele ntɔshi yangɔ mɔtshi oma le nde.’ 21 Ko Ngɛhazi akayele Namana. Lam’akɛnyi Namana onto ɔmɔtshi ayalawɔ l’ɔkɔngɔ ande, nde akaholɔ oma lo pusupusu kande dia tohomana la nde ko akate ate: “Onde lengo tshɛ ki?” 22 Nde akakadimola ate: “Tshɛ ki. Nkumɛmi kontomi ate: ‘Ɛlɔngɔ 2 w’apami l’atei w’ana w’amvutshi wambokoma oma lo lɛkɛ l’akona la Efrayimɛ. Lam’alangayɛ, shawɔ lotalata 1 la mfɛsa la ahɔndɔ 2.’”+ 23 Namana akate ate: “Ɔsa talata 2.” Nde akatetemala mbɔsɛngasɛnga+ ndo akakeleka talata 2 ya mfɛsa lo atapa 2 kaamɛ la ahɔndɔ 2, ko akasha ekambi ande 2 dia vɔ mɛmba la ntondo kande.

24 Lam’akandakome la Ɔfɛlɛ,* nde akɔshi diangɔ sɔ oma le wɔ ndo akadidje lo luudu ko akakɛndja apami akɔ. L’ɔkɔngɔ wa vɔ ntshɔ, 25 nde akɔtɔ ko akatemala lale nkumɛnde. Ko Elisha akawombola ate: “Oma lende ayaye na, Ngɛhazi?” Koko nde akakadimola ate: “Okambi ayɛ hatshwe ndooko dihole.”+ 26 Elisha akawotɛ ate: “Onde otema ami hawongi kaamɛ la yɛ etena kakaholwe pami kakɔ oma lo pusupusu dia ndjohomana la yɛ? Onde ɔnɛ ekɔ etena ka nongola mfɛsa kana ka nongola ahɔndɔ kana dikambɔ dia ɔlivɛ kana dikambɔ dia vinyɔ kana ɛkɔkɔ kana ngɔmbɛ kana ekambi w’apami kana ekambi wa wamato?+ 27 Kakianɛ sudi+ kaki Namana kayotshikala le yɛ ndo le tokanula tayɛ pondjo pondjo.” Kam’akandamɔ oma la ntondo kande, nde akayala la sudi ka wɛma oko loonge l’ekama.+