2 Nkumi ya dikanga
7 Ko Elisha akate ate: “Nyohokame ɔtɛkɛta wa Jehowa. Jehowa kata ate: ‘Loyi oya lo wonya wa nganɛ, la soko* dia Samariya, yɛdikɔ 1 ya sea* k’ofushi wa dimɛna yayonga lo oshinga wa shɛkɛlɛ* 1 ndo tɛdikɔ 2 ta sea k’asami tayonga lo oshinga wa shɛkɛlɛ 1.’”+ 2 Ko owandji w’asɔlayi wele nkumekanga akayaɛkɛka le nde akatɛ okambi wa Nzambi ka mɛtɛ ate: “Oyadi kaanga Jehowa ayodihola asoko wa l’olongo, onde kɛsɔ* kayokoka salema?”+ Ko nde akate ate: “Wɛ ayɛna diangɔ sɔ la washo ayɛ,+ koko wɛ hatodilɛ.”+
3 Akanga wa sudi 4 waki la soko di’osomba+ ndo vɔ wakatanɛ vate: “Lande na kadjasɛso lanɛ polo lam’ayotovɔ? 4 Naka sho mbuta shate: ‘Tɔtɔ l’etei k’osomba etena kele ndjala l’osomba,+ tayotovɔ lɛkɔ. Ko naka sho mbidjasɛ lanɛ, tayovɔ paka mvɔ. Ɔnkɔnɛ, nyɛsɔ totshu otsha lo mpango k’ase Suriya. Naka vɔ totshika la lɔsɛnɔ, kete tayɔsɛna; ko naka vɔ todiaka, ko sho mvɔ.” 5 Ɔnkɔnɛ, vɔ wakonɛɛ la dikɔlɔ dia tosho ta shimba, ko wakɔtɔ lo mpango k’ase Suriya. Lam’akawakome suke la mpango k’ase Suriya, wɛnyi ko ndooko onto lɔkɔ.
6 Dikambo Jehowa akasale dia wanɛ waki lo mpango k’ase Suriya mboka londjo la pusupusu ya ta kaamɛ la mfalasa, londjo la olui w’asɔlayi.+ Ko vɔ wakatanɛ vate: “Eenda, nkumekanga k’Isariyɛlɛ ambotɔsa nkumi ya dikanga y’ase Hiti ndo nkumi ya dikanga ya l’Edjibito dia ndjotɔlɔsha!” 7 Mbala kakɔ ɔtɔi vɔ wakonɛɛ ndo wakalawɔ la dikɔlɔ dia tosho ta shimba, ko wakatshike mvudu yawɔ y’apɛma, mfalasa yawɔ, mponda yawɔ ndo mpango k’otondo oko wakitɔ, ko vɔ wakalawɔ dia mbitsha nsɛnɔ* yawɔ.
8 Lam’akakome akanga wa sudi lo ɛɔtwɛlɔ ka mpango kakɔ, vɔ wakɔtɔ lo luudu lɔmɔtshi la dipɛma, ko wakatatɛ ndɛ ndo nnɔ. Vɔ wakɔshi mfɛsa, paonyi ndo ahɔndɔ oma lɔkɔ, ko wakatowashɛ. Oma laasɔ, vɔ wakakalola, wakɔtɔ lo luudu lokina la dipɛma, ko wakɛmbɛ diangɔ oma lɔkɔ ndo wakatodishɛ.
9 L’ekomelo, vɔ wakatanɛ vate: “Kɛnɛ kasalaso bu dimɛna. Ɛlɔ ekɔ lushi la lokumu l’ɔlɔlɔ! Naka sho mengenga ndo nkonga polo la pindju, kete tayosungana nongola dilanya. Ɔnkɔnɛ, totshu kele totote ase luudu la nkumekanga dikambo nɛ.” 10 Ko vɔ wakatshu, wakawelɛ alami wa soko di’osomba ndo wakawatɛ vate: “Sho takatshwe lo mpango k’ase Suriya, koko ndooko onto laki lɛkɔ, ndo hatoki kaanga dui di’onto 1. Paka mfalasa la mponda tsho mbakatatanyi kelekama ndo mvudu y’apɛma yele woho wakiyɔ.” 11 Ko alami wa soko wakawelɛ ndo wakatɛ ase luudu la nkumekanga dui diakɔ.
12 Aha la ntshimbatshimba, nkumekanga aketɔ l’otsho ko akatɛ ekambi ande ate: “Lam’alanganyu, dimi nte nyote kɛnɛ kambotosalɛ ase Suriya. Vɔ mbeyaka dia tekɔ la ndjala,+ ɔnkɔnɛ vɔ wakatshiki mpango kawɔ ko wakatshwe l’oswe dia toyashɛ, wata vate: ‘Vɔ wayotomba oma l’osomba, ko tayowanda wasɛna ndo tayɔtɔ l’osomba.’”+ 13 Ko okambi ande ɔmɔtshi akate ate: “Lam’alangayɛ, etawɔ dia apami amɔtshi mbɔsa mfalasa 5 l’atei wa nyɛ yambotshikala l’osomba. Kɛnɛ kayotaakomɛ mbayokomɛ ndo olui w’ase Isariyɛlɛ tshɛ wotshikadi lanɛ. Kɛnɛ kayotaakomɛ mbambokomɛ olui w’ase Isariyɛlɛ tshɛ wakavu. Ɔnkɔnɛ, taatome kele vɔ watende.” 14 Ko vɔ wakɔshi pusupusu 2 kaamɛ la mfalasa, ko nkumekanga akaatome otsha lo mpango k’ase Suriya, ata ate: “Nyotshu, nyotende.” 15 Vɔ wakaayele polo lo Jɔrdana ko mboka k’otondo kakalole la ahɔndɔ ndo la diangɔ diakatakɔshaka ase Suriya lam’akawatalawɔka la wɔma. Akɛndji akɔ wakakalola ko wakayotɛ nkumekanga dui sɔ.
16 Oma laasɔ, anto wakatombe, wakambe diangɔ lo mpango k’ase Suriya, ko yɛdikɔ 1 ya sea k’ofushi wa dimɛna yakonge lo oshinga wa shɛkɛlɛ 1 ndo tɛdikɔ 2 ta sea k’asami takonge lo oshinga wa shɛkɛlɛ 1, lo ndjela ɔtɛkɛta wa Jehowa.+ 17 Nkumekanga akasɔnɛ owandji w’asɔlayi wakandayaɛkɛka le nde dia nde monga olami wa soko, koko anto wakɔɔhɔtshahɔtsha polo nde mvɔ la soko, oko wakatɛ okambi wa Nzambi ka mɛtɛ nkumekanga lam’akandaye le nde. 18 Awui wakasalema paka oko wakatɛ okambi wa Nzambi ka mɛtɛ nkumekanga ɔnɛ: “Tɛdikɔ 2 ta sea k’asami tayonga lo oshinga wa shɛkɛlɛ 1 ndo yɛdikɔ 1 y’ofushi wa dimɛna yayonga lo oshinga wa shɛkɛlɛ 1 loyi lo wonya wa nganɛ la soko dia Samariya.”+ 19 Koko owandji w’asɔlayi akatɛ okambi wa Nzambi ka mɛtɛ ate: “Oyadi kaanga Jehowa ayodihola asoko wa l’olongo, onde kɛsɔ* kayokoka salema?” Ko Elisha akate ate: “Wɛ ayɛna diangɔ sɔ la washo ayɛ, koko wɛ hatodilɛ.” 20 Kɛsɔ mbakookomɛ, nɛ dia anto wakɔɔhɔtshahɔtsha polo nde mvɔ la soko.