Ɛzɛkiyɛlɛ
22 Ɔtɛkɛta wa Jehowa wakaye le mi nto ɔnɛ: 2 “Wɛ ɔna onto, onde wɛ amboyalɔngɔsɔla dia mbewoya kilombo le* osomba+ wele la onongo wa dikila ndo dia mbeewoya akambo awɔ tshɛ wa wɔnɔnyi?+ 3 Kote wate: ‘Nkum’Olongo Nkumadiɔndjɔ Jehowa kata ate: “Wɛ osomba wakɛdia dikila+ l’etei kayɛ, wele etena kawɔ kekɔ lo ndjaye,+ wasala dikishi dia nyɛtɛɛtɛ* dia ndjadja mindo la diɔ,+ 4 ɔkɛdiɛlɔ ayɛ wa dikila wambokɛndja onongo+ ndo dikishi diayɛ dia nyɛtɛɛtɛ diamboketɛ mindo.+ Wɛ ambosala dia ekomelo ka nshi yayɛ ndja esadi esadi ndo ekomelo ka ɛnɔnyi ayɛ kamboya. Diakɔ diayomokosala ɛngɔ ka diɔnyɔ le wedja ndo ɛngɔ ka lɔsɔkɔ le wedja tshɛ.+ 5 Wedja wosukanyi la yɛ ndo wanganyi la yɛ etale wayokɔla,+ wɛ lele lokombo layɛ ko mindo ndo lambolola la lofunge. 6 Eenda, owandji tshɛ wa lo Isariyɛlɛ wele l’atei ayɛ kambaka la lowandji lande dia nkɛdia dikila.+ 7 L’etei kayɛ, vɔ wekɔ lo mɔnyɔla washɛwɔ la anyangɛwɔ.+ Vɔ kesaka ɔngɛndangɛnda ndo soyaka ɔna etshike* ndo wadi aki odo.”’”+
8 “‘Wɛ mɔnyɔlaka ahole ami w’ekila ndo wɛ mɔnyɔlaka sabato+ yami. 9 L’etei kayɛ, amamanyishi wele la oyango wa nkɛdia dikila+ wekɔ. L’etei kayɛ, vɔ wekɔ lo ndɛ elambo lo akona ndo wekɔ la lɔkɛwɔ la mindo l’atei ayɛ.+ 10 L’etei kayɛ, vɔ wekɔ lo mɔnyɔla mbeto ka shɛwɔ*+ ndo vɔ mbeyanaka la womoto lo nshi yɛnande dikila.+ 11 L’etei kayɛ, pami salaka akambo lo yoho ya wɔnɔnyi la wadi a kana,+ okina mbidjaka wadi ɔnande mindo la lɔkɛwɔ la nsɔnyi+ ndo okina nto mbeyanaka la kadiyɛnde la wolo, ɔna womoto laki she ka pɛtɛ pɛtɛ.+ 12 L’etei kayɛ, vɔ nongolaka etshimba dia nkɛdia dikila.+ Wɛ sɔndjanaka diangɔ la wahɔ+ kana dia nkondja falanga ndo wɛ kɔsɔlaka asukanyi+ ayɛ falanga. Eelo, wɛ amombohɛ tshɛ lo tshɛ,’ mbata Nkum’Olongo Nkumadiɔndjɔ Jehowa.
13 “‘Eenda, dimi lambohomɛ anya ami dia mɛnya woho wahetshami wahɔ wa lokeso wakayakondja ndo l’ɔtɛ wa etsha wa ɛkɛdiɛlɔ ka dikila wele l’atei ayɛ. 14 Onde dihonga* diayɛ diayotshikala edja ndo anya ayɛ wayotetemala monga la wolo lo nshi yayomokɔlɔsha?+ Dimi Jehowa, dimɛ lambɔtɛkɛta ndo dimi layodikotsha. 15 Dimi layokohandjola l’atei wa wedja ndo layokodianganya l’atei wa wedja,+ ndo layokomiya mindo kayɛ.+ 16 Wɛ ayɔnyɔma la ntondo ka wedja, ko wɛ ayohomba mbeya dia dimi kele Jehowa.’”+
17 Ɔtɛkɛta wa Jehowa wakaye le mi nto ɔnɛ: 18 “Ɔna onto, luudu la Isariyɛlɛ laya oko mindo y’anyanya le mi. Vɔ tshɛ wekɔ nkonga, etinɛ, lowolo ndo dive lo nkuka ka dja. Vɔ waya mindo y’oma lo mfɛsa.+
19 “Ɔnkɔnɛ Nkum’Olongo Nkumadiɔndjɔ Jehowa kata ate: ‘Lam’ele nyu tshɛ nyambonga oko mindo y’anyanya,+ dimi layonyotshumanya kaamɛ l’etei ka Jɛrusalɛma. 20 Oko watotshumanyemaka mfɛsa nkonga, lowolo, dive ndo etinɛ l’etei ka nkuka ka dja dia mbafufa dja dia mbalɛlɔla, ɔnkɔnɛ dimi layonyotshumanya kaamɛ lo nkɛlɛ kami ndo lo odudu ami, ko dimi layonyofufa dja ndo layonyɔlɛlɔla.+ 21 Dimi layonyotshumanya kaamɛ ndo layonyofufa dja ya odudu+ ami ndo nyu nyayɔlɛlɔ l’etei kayɔ.+ 22 Oko watɔlɛlɔka mfɛsa lo nkuka ka dja, nyu nyayɔlɛlɔ l’etei kayɔ; ndo nyu nyayohomba mbeya dia dimi Jehowa dimɛ kakanyotshulwɛ nkɛlɛ kami.’”
23 Ɔtɛkɛta wa Jehowa wakaye le mi nto ɔnɛ: 24 “Ɔna onto, tɛnde wate: ‘Wɛ ekɔ wodja wahatɛdiama kana wodja waki mvula kɔndɔ lɔkɔ lo lushi la nkɛlɛ. 25 Amvutshi ande wambɔtɔ sheke kaamɛ la nde,+ oko ntambwɛ kadikita kaatshatsha nyama kondjitɔ.+ Vɔ wekɔ lo ndɛ anto.* Vɔ wekɔ lo mbɔsa diangɔ dia oshinga wolo ndo dia nɛmɔ. Vɔ wambetɛ wamato efula wadi waki edo l’etei kande. 26 Ɛlɔmbɛdi ande wambosekola ɛlɛmbɛ+ ami ndo wekɔ lo ntetemala mɔnyɔla ahole ami w’ekila.+ Vɔ hawosale ndooko otshikitanu lam’asa kɛnɛ kele ekila la kɛnɛ kele bu ekila,+ vɔ haweyanya kɛnɛ kele mindo la kɛnɛ kele pudipudi,+ vɔ wekɔ lo ntona dia nɛmiya sabato yami ndo dimi lambɔnyɔma l’atei awɔ. 27 Ewandji wele l’atei ande wekɔ oko ndjaondo yaatshatsha nyama kondjiyɔ; vɔ kɛdiaka dikila ndo ndjakaka anto* dia vɔ nkondja wahɔ wa lokeso.+ 28 Koko amvutshi ande wambokita mpɛmbɛ laadiko dia ditshelo diawɔ. Vɔ wekɔ lo mɛna waɛnɛlɔ wa kashi, wekɔ lo nsala diendja dia kashi+ ndo wekɔ lo mbuta vate: “Nkum’Olongo Nkumadiɔndjɔ Jehowa kata ɔnɛ,” etena kele Jehowa ndamɛ hatɛkɛtshi. 29 Anto wa lo wodja wekɔ lo nkesa, wekɔ lo mbiva,+ wekɔ lo nsoya onto lele lo dihombo ndo ose wola, wekɔ lo nkesa angɛndangɛnda ndo hawoosalɛ akambo la losembwe.’
30 “‘Dimi lakayangaka onto oma l’atei awɔ lakahombe nɔngɔsɔla ehele ka ave kana memala la ntondo kami lo wosho dia wahɔ wa wodja diaha vɔ ndanyema,+ koko dimi kotana ndooko onto. 31 Ɔnkɔnɛ, dimi layowatsholɛ yɛnyi yami ndo layowashila oshiki la dja ya odudu ami. Dimi layela etombelo wa lɔkɛwɔ lawɔ lo ɛtɛ awɔ hita,’ mbata Nkum’Olongo Nkumadiɔndjɔ Jehowa.”