2 Nkumi ya dikanga
12 L’ɔnɔnyi wa 7 w’ɛlɔmbwɛlɔ ka Jehu,+ Jɛhɔashi+ akayala nkumekanga ndo nde akolɛ l’edja k’ɛnɔnyi 40 la Jɛrusalɛma. Nyango lokombo lande Zibiya ose Bɛrɛ-Shɛba.+ 2 Jɛhɔashi akatetemala nsala kɛnɛ kaki ɔlɔlɔ lo washo wa Jehowa nshi tshɛ yakawetshaka ɔlɔmbɛdi Jɛhɔyada. 3 Koko ahole wa la diko+ kominyɛma ndo anto wakatetemala nambola ndo ntshumba elambo lo ahole wa la diko.
4 Jɛhɔashi akatɛ ɛlɔmbɛdi ate: “Kanyɔsake falanga tshɛ yelawɔ lo luudu la Jehowa dikambo dia weshasha w’ekila,+ falanga yakashikikɛma dia onto l’onto kimɔka,+ falanga yakimɔma oko yɛdikɔ ya nɛmɔ di’onto* ndo falanga yakimɔ onto tshɛ latshutshuyama la otema ande dia mbela lo luudu la Jehowa.+ 5 Ɛlɔmbɛdi vɔamɛ kawoyiɔsake oma le anto wayikimɔ* ndo kawokambake la yɔ dia nɔngɔsɔla luudu dihole tshɛ diayololanaka.”*+
6 Polo lo ɔnɔnyi wa 23 w’ɛlɔmbwɛlɔ ka nkumekanga Jɛhɔashi ko ɛlɔmbɛdi watalɔngɔsɔla ahole wakalana luudu+ lakɔ. 7 Ko nkumekanga Jɛhɔashi akelɛ ɔlɔmbɛdi Jɛhɔyada+ ndo ɛlɔmbɛdi ekina ko akawatɛ ate: “Lande na kahanyalɔngɔsɔla ahole wakalana luudu? Ɔnkɔnɛ, tanyɔsake nto falanga nkina oma le wanɛ wayikimɔ, onyake naka nyayokamba la yɔ dia nɔngɔsɔla luudu.”+ 8 Ko ɛlɔmbɛdi kombetawɔ mbɔsa falanga nkina oma le anto ndo wakatone monga la ɔkɛndɛ wa nɔngɔsɔlaka luudu lakɔ.
9 Oma laasɔ, ɔlɔmbɛdi Jɛhɔyada akɔshi shɛtɛshɛtɛ,+ akatondola wosho lo ofidi ayɔ, ko akayikitsha suke la elambwelo lo lonya l’omi laki onto latɔtɔ lo luudu la Jehowa. Lɔkɔ mbakadjaka ɛlɔmbɛdi wakakambaka oko alami w’asoko falanga tshɛ yakawelaka lo luudu la Jehowa.+ 10 Etena tshɛ kakawɛnaka dia falanga yaya efula lo shɛtɛshɛtɛ, ofundji wa nkumekanga ndo ɔlɔmbɛdi a laadiko wakayaka ko wakasanganyaka* ndo wakadiaka falanga yaki lo luudu la Jehowa.+ 11 Vɔ wakashaka wanɛ wakasɔnama dia mendaka elimu wakasalemaka lo luudu la Jehowa falanga yakawadiaka. Vɔ lawɔ lo wedi awɔ wakafutaka etshudi w’abaya ndo ambiki wakakambaka lo luudu la Jehowa,+ 12 kaamɛ ndo waa masɔ ndo ambatshi w’ave. Vɔ wakasombaka ndo esongo la ave wa lɔkɔlɔnga dia nɔngɔsɔla ahole wakalana lo luudu la Jehowa ndo wakakambe la falanga lo elimu ekina tshɛ w’ɔlɔngɔswɛlɔ wa luudu lakɔ.
13 Koko vɔ kokamba la falanga yakawela lo luudu la Jehowa dia nsala dɔnga dia woke dia mfɛsa, diangɔ dia nyimaka dja, alɔnga w’afuku, amama+ kana ɛngɔ kekina tshɛ ka paonyi kana ka mfɛsa ka lo luudu la Jehowa.+ 14 Vɔ wakayishaka paka wanɛ wakakambaka olimu ndo la yɔ mbakawalɔngɔsɔla luudu la Jehowa. 15 Vɔ kosalaka owadi la apami wakawashaka falanga dia tofuta ase olimu, nɛ dia wakɛkɛka otema le wɔ.+ 16 Koko falanga yendana la elambo w’onongo+ ndo falanga yendana la elambo wa pɛkato kɔtɔlamaka lo luudu la Jehowa. Yɔ yaki y’ɛlɔmbɛdi.+
17 L’etena kɛsɔ mbakaye Hazaɛlɛ+ nkumekanga ka Suriya dia ndjɔlɔsha Ngata+ ndo nde akakiɔshi; l’ɔkɔngɔ wa laasɔ, nde akɔshi yɛdikɔ ya ndɔsha* Jɛrusalɛma.+ 18 Ko Jɛhɔashi nkumekanga ka Juda akɔshi weshasha tshɛ w’ekila wakakidia watshɛnde, mbuta ate Jɛhɔshafata, Jɛhɔrama ndo Ahaziya, nkumi ya dikanga ya Juda, kaamɛ ndo weshasha ande ndamɛ w’ekila la paonyi tshɛ yakatanema lo waombelo wa lo luudu la Jehowa ndo wa lo luudu* la nkumekanga, ko akatomɛ Hazaɛlɛ nkumekanga ka Suriya.+ Ɔnkɔnɛ nde akamɔ oma la Jɛrusalɛma.
19 Lo kɛnɛ kendana l’etenyi kekina k’ɔkɔndɔ wa Jɛhɔashi ndo kɛnɛ tshɛ kakandasale, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 20 Koko ekambi ande wakasangana dia mbowɔtwɛ sheke,+ ko wakadiake Jɛhɔashi lo luudu la Milo*+ lo mboka kaholɔ otsha la Sila. 21 Ekambi ande Jɔzakara ɔna Shimeatɛ nde la Jɛhɔzabada ɔna Shomɛrɛ mbakɔɔkɔmɔla ko vɔ mbodiaka.+ Vɔ wakookundɛ kaamɛ la watshɛnde l’Osomba wa Davidɛ, ko ɔnande Amaziya akayala nkumekanga lo dihole diande.+