Ɛzɛkiyɛlɛ
28 Ɔtɛkɛta wa Jehowa wakaye le mi nto ɔnɛ: 2 “Ɔna onto, tɛ ɔnɔmbɔdi wa Tura wate: ‘Nkum’Olongo Nkumadiɔndjɔ Jehowa kata ate:
“Lam’ele otema ayɛ waya la lotamanya,+ wɛ ekɔ lo ntetemala mbuta wate: ‘Dimi lekɔ nzambi kɛmɔtshi.
Dimi mbidjasɛ lo kiti ka lowandji ka nzambi kɛmɔtshi l’atei wa ndjale.’+
Koko wɛ ekɔ tsho onto, aha nzambi kɛmɔtshi,
Kaanga mbɔsayɛ lo otema ayɛ dia wɛ ekɔ nzambi kɛmɔtshi.
3 Eenda, wɛ ekɔ la lomba ndeka Danyɛlɛ.+
Ndooko toseke takashɛma le yɛ.
4 Wɛ amboyaetɛ ɔngɔnyi oma lo lomba layɛ ndo oma lo shɛnɔdi yayɛ,
Ndo wɛ ekɔ lo ntetemala mɔtshanya paonyi la mfɛsa lo waombelo+ ayɛ.
5 Okanda wasalayɛ la diewo tshɛ wambokɔngɔnya efula,+
Ndo otema ayɛ waya la lotamanya l’ɔtɛ w’ɔngɔnyi ayɛ.”’
6 “‘Diakɔ diata Nkum’Olongo Nkumadiɔndjɔ Jehowa ate:
“Lam’ele lo otema ayɛ wɛ ndjaɔsaka dia wɛ ekɔ nzambi kɛmɔtshi,
7 Dimi layanga mbela angɛndangɛnda dia kɔlɔsha, wodja woleki tshɛ esehe l’atei wa wedja,+
Vɔ wayɔsɔmɔla tokuwa tawɔ ta ta dia ndɔsha olangala wa lomba layɛ
Ndo mbidja lɔnɛnɛ la lotombo+ layɛ mindo.
9 Onde wɛ ayotetemala mbutɛ ɔnɛ lakodiaka wate: ‘Dimi lekɔ nzambi kɛmɔtshi’?
Wɛ ayonga onto k’onto, aha nzambi kɛmɔtshi lo anya wa wanɛ wakodja mindo.”’
10 ‘Oma lo anya w’angɛndangɛnda, wɛ ayovɔ nyɔi ka wanɛ waki kominya mpota,
Nɛ dia dimi dimɛ kambɔtɛkɛta,’ mbata Nkum’Olongo Nkumadiɔndjɔ Jehowa.”
11 Ɔtɛkɛta wa Jehowa wakaye le mi nto ɔnɛ: 12 “Ɔna onto, emba lembo l’otanda* dikambo dia nkumekanga ka Tura ndo tɛnde wate: ‘Nkum’Olongo Nkumadiɔndjɔ Jehowa kata ate:
13 Wɛ aki lo Ɛdɛna, ekambɔ ka Nzambi.
Wɛ akalɛngama la weho tshɛ wa mbɔkɔ y’oshinga wolo,
Rubi, topazɛ ndo jaspɛ;
Krizɔlitɛ, ɔniksɛ ndo jadɛ; safirɛ, tirikwazɛ+ ndo emɛrɔdɛ;
Didjaselo diayɔ ndo ekimedi ayɔ wakasalema la paonyi.
Yɔ yakalɔngɔsɔma lushi lakayatongama.
14 Dimi lakakokitsha oko ɔkɛruba, okitami w’esɔ wakomba.
Wɛ aki lo dikona di’ekila dia Nzambi+ ndo wɛ akakɛndakɛndaka l’atei wa mbɔkɔ ya dja.
15 Wɛ komonga ndooko la ɛkɔmɔ lo ditshelo diayɛ ntatɛ lushi lakayatongama
Polo lam’akayotanemaka kɔlɔ le yɛ.+
16 L’ɔtɛ wa lokema la diangɔ diayɛ di’okanda,+
Wɛ akalole tɔɔ la awui wa ngala ndo wɛ akatatɛ nsala pɛkato.+
Diakɔ diayomokokasha oko ɛngɔ kambɔnyɔma oma lo dikona dia Nzambi ndo mbayomokolanya,+
Wɛ ɔkɛruba wakomba, etale oma lo mbɔkɔ ya dja.
17 Otema ayɛ wakonge la lotamanya l’ɔtɛ wa olangala ayɛ.+
Wɛ akalanya lomba layɛ l’ɔtɛ wa lɔnɛnɛ la lotombo+ layɛ.
Dimi layokokasha la nkɛtɛ.+
Dimi layoketɛ ɛngɔ katanganɛwɔ la ntondo ka nkumi ya dikanga.
18 L’ɔtɛ w’onongo ayɛ wa woke ndo lokeso la okanda ayɛ, wɛ akɔnyɔla ahole ayɛ w’ekila.
Dimi layotondja dja oma l’atei ayɛ, ko yɔ yayokotshumba.+
Dimi layoketɛ otoko oto la nkɛtɛ la ntondo ka wanɛ tshɛ wakenda.
19 Wanɛ tshɛ wakakeyaka l’atei w’anto wayokenda la diambo.+
Ekomelo kayɛ kayonga la shashimoya ndo kɔlɔ efula,
Ko wɛ hongaki nto pondjo pondjo.”’”+
20 Ko ɔtɛkɛta wa Jehowa wakaye le mi nto ɔnɛ: 21 “Ɔna onto, kadimola elungi kayɛ otsha la Sidɔna+ ndo ta prɔfɛsiya lo dikambo diatɔ. 22 Ta wate: ‘Nkum’Olongo Nkumadiɔndjɔ Jehowa kata ate:
“Sidɔna le, dimi layanga kɔlɔsha ndo dimi layotombɔma l’atei ayɛ;
Anto wayohomba mbeya dia dimi kele Jehowa etena kayomela elombwelo le tɔ ndo dimi layoyakidia le tɔ.
23 Dimi layotoma elando le tɔ ndo dikila diayɔkɛla lo toshinga tatɔ.
Edo wayokalema l’atei atɔ etena kayoya lokuwa la ta le tɔ oma lo bɛkɛ tshɛ;
Ko vɔ wayohomba mbeya dia dimi kele Jehowa.+
24 “‘“Oma laasɔ, luudu la Isariyɛlɛ halotodingama nto la adiyo w’atɛndɛ wa kɔlɔ ndo la atɛndɛ+ wa kandji, wanɛ wawaɔnyɔla; ko anto wayohomba mbeya dia dimi kele Nkum’Olongo Nkumadiɔndjɔ Jehowa.”
25 “‘Nkum’Olongo Nkumadiɔndjɔ Jehowa kata ate: “Etena kayomotshumanya luudu la Isariyɛlɛ oma l’atei w’anto wa lɛnɛ akawadiangana,+ dimi layokidiama l’atei awɔ lo washo wa wedja.+ Ko vɔ wayodjasɛ lo nkɛtɛ+ yawɔ yakamasha okambi ami Jakɔbɔ.+ 26 Vɔ wayodjasɛ lɔkɔ lo lotui tshitshi+ ndo wayohika mvudu ndo wayokamba dikambɔ dia vinyɔ,+ ndo wayodjasɛ lo lotui tshitshi etena kayomela kilombo le wanɛ tshɛ waadingi wawaɔnyɔla;+ ko vɔ wayohomba mbeya dia dimi kele Jehowa Nzambi kawɔ.”’”