Ɛzɛkiyɛlɛ

40 Lo ɔnɔnyi wa 25 wakiso lo lɔhɔmbɔ,+ lo etatelo ka ɔnɔnyi, ngɔndɔ nshi 10, ɔnɔnyi wa 14 l’ɔkɔngɔ wa osomba nkɔ,+ lushi lakɔ laamɛ, lonya la Jehowa lakikɔ le mi ndo nde akambɔshi otsha lo osomba.+ 2 Lo ekimanyielo ka waɛnɛlɔ w’oma le Nzambi, nde akantɔlɛ otsha lo wodja wa Isariyɛlɛ ndo akatonkitsha lo dikona+ di’otale efula, lɛnɛ aki ɛngɔ kele oko osomba lo sidɛ.

3 Etena kakandantɔlɛ lɛkɔ, dimi lakɛnyi pami kaki la ɛnamelo kele oko ka nkonga.+ Nde aki la ɔkɔdi wa djɛwɛlɛwɛ ndo la shongo* ya yɛdikɔ lo lonya lande+ ndo nde akemala la soko. 4 Pami kakɔ akambutɛ ate: “Ɔna onto, enda dimɛna, hokamɛ la yambalo tshɛ ndo dja yimba* lo kɛnɛ tshɛ kakɛnyami, nɛ dia l’ɔtɛ ɔsɔ mbakawakela lanɛ. Kote luudu la Isariyɛlɛ kɛnɛ tshɛ kɛnayɛ.”+

5 Dimi lakɛnyi ehele kɛmɔtshi kakadinge tɛmpɛlɔ* l’andja. Lo lonya la pami kakɔ kaki shongo ya yɛdikɔ yaki la otale wa kubita 6 (kubita tshɛ kakakotshama etambe 1 ka lonya).* Nde akatatɛ mbɛdika ehele, ndo nkeka katɔ kaki shongo tshɔi ndo tanga diatɔ diaki shongo tshɔi.

6 Oma laasɔ, nde akaye lo soko diakɛlanɛ la ɛstɛ+ ndo akadɛ lo wadelo adiɔ. Lam’akandɛdika ɛɔtwɛlɔ ka soko, woke atɔ waki shongo tshɔi ndo woke wa ɛɔtwɛlɔ kekina waki shongo tshɔi. 7 Luudu tshɛ la alami laki la otale wa shongo tshɔi ndo woke wa shongo tshɔi, kubita 5 yakikɔ lam’asa mvudu ya alami.+ Ɛɔtwɛlɔ ka soko diele suke la tshoto y’otale ya soko diɛlane la l’etei aki la woke wa shongo tshɔi.

8 Nde akɛdika tshoto y’otale ya soko di’otsha l’etei, ko yaki shongo tshɔi. 9 Oma laasɔ, nde akɛdika tshoto y’otale ya soko, ko yaki la kubita 8; ndo nde akɛdika dikundji diayɔ dia l’omamu ko diɔ diaki la kubita 2; ndo tshoto y’otale ya la soko yaki l’omamu mbɛlanɛ la l’etei.

10 Aki mvudu 3 y’alami lo wedi tshɛ wa soko dia ɛstɛ. Yakɔ 3 yaki popo ndo dikundji dia l’emamu akɔ tshɛ diaki popo.

11 Oma laasɔ, nde akɛdika woke wa ɛɔtwɛlɔ ka soko, ko aki kubita 10; ndo soko diaki l’otale wa kubita 13.

12 Dihole diakakitola diele la ntondo ka mvudu y’alami lo wedi akɔ tshɛ diaki la kubita 1. Mvudu y’alami ya lo wedi akɔ 2, luudu la luudu laki la kubita 6.

13 Oma laasɔ, nde akɛdika soko oma lo nsambe ka luudu lɔmɔtshi l’alami* polo lo nsambe kekina, ko aki kubita 25 lo woke; ɛɔtwɛlɔ kɛmɔtshi mbɛlanɛ la ɛɔtwɛlɔ+ kekina. 14 Oma laasɔ, nde akɛdika dikundji dia l’omamu, ko diaki la otale wa kubita 60, mbidja ndo dikundji dia l’omamu dia lo asoko wa l’otshimbedi w’otondo wa sɛkɛ. 15 Oma la ntondo ka ɛɔtwɛlɔ ka soko polo la ntondo ka tshoto y’otale lo wedi wa l’etei wa soko aki kubita 50.

16 Adidishi wele la kadrɛma yele oko weolɔ+ wakikɔ dikambo dia mvudu y’alami ndo dikambo dia dikundji dia l’omamu dia l’etei ka soko lo wedi tshɛ. Adidishi wakikɔ lo wedi tshɛ wa l’etei ka tshoto tshɛ ya l’etei ndo asango wa atoko+ waki lo dikundji dia l’omamu.

17 Oma laasɔ, nde akantɔlɛ lo sɛkɛ dia l’andja, ko dimi lakɛnyi mvudu y’oleelo*+ ndo odihe lo otshimbedi w’otondo wa sɛkɛ. Mvudu y’oleelo 30 yaki lo odihe. 18 Odihe wa l’omamu wa asoko wakɔtɔnɛka l’otale wa asoko, ɔsɔ aki odihe wa l’ɛse.

19 Oma laasɔ, nde akɛdika otale oma la ntondo ka soko dia l’ɛse polo l’ohembo wa sɛkɛ dia l’etei. Aki kubita 100 lo ɛstɛ ndo lo nɔrdɛ.

20 Sɛkɛ dia l’andja diaki la soko diakɛlanɛ la lɛkɛ la nɔrdɛ ndo nde akɛdika otale adiɔ ndo woke adiɔ. 21 Mvudu 3 y’alami yakikɔ lo wedi tshɛ. Dikundji diadiɔ dia l’omamu ndo tshoto y’otale yaki yɛdikɔ yaamɛ la soko dia ntondo. Diɔ diaki l’otale wa kubita 50 ndo woke wa kubita 25. 22 Adidishi adiɔ, tshoto yadiɔ y’otale ndo asango w’atoko+ adiɔ waki woke waamɛ la wanɛ wa lo soko dia lo ɛstɛ. Anto wakakokaka nkoma lɔkɔ lo mbidɛ wadelo 7 ndo tshoto yadiɔ y’otale yaki la ntondo kawɔ.

23 Soko dimɔtshi diaki lo sɛkɛ dia l’etei mbɛlanɛ la soko dia lo nɔrdɛ ndo la soko dia lo ɛstɛ. Nde akɛdika otale wa lam’asa soko la soko ko aki kubita 100.

24 Oma laasɔ, nde akantɔlɛ otsha lo sidɛ, ko dimi lakɛnyi soko lo lɛkɛ la sidɛ.+ Nde akɛdika dikundji diadiɔ dia l’omamu ndo tshoto yadiɔ y’otale, ko vɔ waki popo la asoko akina. 25 Adidishi wa l’emamu adiɔ tshɛ ndo lo tshoto yadiɔ y’otale waki oko adidishi akina. Diɔ diaki l’otale wa kubita 50 ndo woke wa kubita 25. 26 Akikɔ wadelo 7 wakonya lɔkɔ,+ ndo tshoto yadiɔ y’otale yaki la ntondo kawɔ. Asango w’atoko wakikɔ lo wedi wa dikundji diadiɔ, sango 1 lo wedi tshɛ.

27 Sɛkɛ dia l’etei diaki la soko diɛlane la lɛkɛ la sidɛ; nde akɛdika otale wa lam’asa soko la soko otsha lo w’ekeke wa sidɛ, ko aki kubita 100. 28 Oma laasɔ, nde akambɔtshiya lo sɛkɛ dia l’etei oma lo soko dia lo sidɛ; lam’akandɛdika soko dia lo sidɛ, diɔ diaki popo la asoko akina. 29 Mvudu yadiɔ y’alami, dikundji diadiɔ dia l’omamu ndo tshoto yadiɔ y’otale yaki popo la asoko akina. Adidishi wakikɔ lo wedi adiɔ tshɛ ndo lo tshoto yadiɔ y’otale. Diɔ diaki l’otale wa kubita 50 ndo woke wa kubita 25.+ 30 Totshoto t’etale taki lo bɛkɛ tshɛ; tɔ taki l’otale wa kubita 25 ndo woke wa kubita 5. 31 Tshoto yadiɔ y’otale yakɛlanɛ la sɛkɛ dia l’andja ndo asango w’atoko wakikɔ lo dikundji+ diadiɔ dia l’emamu ndo wadelo 8 wakakonyaka lɔkɔ.+

32 Etena kakandambɔtshiya lo sɛkɛ dia l’etei oma lo ɛstɛ, nde akɛdika soko, ko diɔ diaki popo la asoko akina. 33 Mvudu yadiɔ y’alami, dikundji diadiɔ dia l’emamu ndo tshoto yadiɔ y’otale aki popo la asoko akina, ndo adidishi wakikɔ lo wedi adiɔ tshɛ ndo lo tshoto yadiɔ y’otale. Diɔ diaki l’otale wa kubita 50 ndo woke wa kubita 25. 34 Tshoto yadiɔ y’otale yakɛlɛ otsha lo sɛkɛ dia l’andja ndo asango w’atoko wakikɔ lo dikundji diakɔ pende dia l’emamu ndo wadelo 8 wakakonyaka lɔkɔ.

35 Oma laasɔ, nde akantɔlɛ lo soko dia lo nɔrdɛ+ ko nde akadiɛdika ko diɔ diaki popo la asoko akina. 36 Mvudu yadiɔ y’alami, dikundji diadiɔ dia l’emamu ndo tshoto yadiɔ y’otale aki popo la asoko akina. Diɔ diaki la adidishi lo wedi tshɛ. Diɔ diaki l’otale wa kubita 50 ndo woke wa kubita 25. 37 Dikundji diadiɔ dia l’omamu diakɛlanɛ la sɛkɛ dia l’andja, ndo asango w’atoko waki lo dikundji diakɔ pende dia l’emamu ndo wadelo 8 wakakonyaka lɔkɔ.

38 Luudu l’oleelo la soko dialɔ aki suke la dikundji dia l’omamu wa asoko, lɛnɛ akawasolaka olambo w’otondo wa lotshumba.+

39 Mɛsa 2 wakikɔ lo wedi tshɛ wa tshoto y’otale ya la soko lɛnɛ akawadiakaka nyama y’elambo w’otondo wa lotshumba,+ y’elambo wa pɛkato+ ndo y’elambo w’onongo.+ 40 Lo mboka k’otsha lo soko dia lo nɔrdɛ, akikɔ mɛsa 2 l’andja wa mbɔtwɛlɔ. Akikɔ nto mɛsa 2 lo wedi okina wa tshoto y’otale ya la soko. 41 Mɛsa 4 wakikɔ lo wedi tshɛ wa soko, tshɛ tshɛ mɛsa 8 lɛnɛ akawadiakaka nyama y’elambo. 42 Mɛsa 4 w’olambo wa lotshumba w’otondo wakasalema la ave wa lɔkɔlɔnga. Vɔ wakikɔ l’otale wa kubita ɔtɔi la etenyi ndo la woke wa kubita ɔtɔi la etenyi ndo tanga dia kubita 1. Lɔkɔ mbakawakitshaka diangɔ diakawakambaka la diɔ dia ndjaka nyama y’elambo wa lotshumba ndo woshasha. 43 Tɔkɔhɔ tele la woke w’etambe ka lonya takahanemaka l’otshimbedi wa mpele dia l’etei; ndo emunyi w’elambo wa woshasha wakahombe kitshamaka lo mɛsa.

44 Mvudu y’oleelo dikambo dia amembi+ yakikɔ l’andja wa soko dia l’etei; yɔ yakikɔ lo sɛkɛ dia l’etei suke la soko dia lo nɔrdɛ, mbɛlanɛ la lɛkɛ la sidɛ. Luudu lokina l’oleelo lakikɔ suke la soko dia lo ɛstɛ, mbɛlɛnganɛ la lɛkɛ la nɔrdɛ.

45 Nde akambutɛ ate: “Luudu l’oleelo lɛlane la lɛkɛ la sidɛ lɔnɛ lekɔ dikambo dia ɛlɔmbɛdi wele l’ɔkɛndɛ w’elimu wa lo tɛmpɛlɔ.+ 46 Luudu l’oleelo lɛlɛ otsha lo lɛkɛ la nɔrdɛ lekɔ dikambo di’ɛlɔmbɛdi wele l’ɔkɛndɛ w’elimu wa lo elambwelo.+ Vɔ wekɔ ana waki Zadɔka,+ l’atei wa ase Lɛwi waki la ɔkɛndɛ wa sukanaka la Jehowa dia mbookambɛ.”+

47 Oma laasɔ, nde akɛdika sɛkɛ dia l’etei. Diɔ diaki l’otale wa kubita 100 ndo woke wa kubita 100, atshuku adiɔ 4 mbɛdima. Elambwelo kaki la ntondo ka tɛmpɛlɔ.

48 Oma laasɔ, nde akantɔlɛ lo tshoto y’otale ya lo tɛmpɛlɔ,+ ko nde akɛdika ekundji ka l’omamu ka tshoto y’otale, ko tɔ kaki la kubita 5 lo wedi ɔmɔtshi ndo kubita 5 lo wedi okina. Woke wa soko wakikɔ kubita 3 lo wedi ɔmɔtshi ndo kubita 3 lo wedi okina.

49 Tshoto y’otale yaki l’otale wa kubita 20 ndo woke wa kubita 11.* Anto wakakokaka nkoma lɔkɔ lo mbidɛ lo wadelo. Dikundji diakikɔ suke la dikɔhɔ, ekundji 1 lo wedi tshɛ.+