Ɛzɛkiyɛlɛ

1 Lo ngɔndɔ ka 4 nshi 5, l’ɔnɔnyi wa 30, etena kakimi l’atei w’ase mfumbe+ suke la ɔkɛdi wa Kebara,+ olongo wakadihɔ ko lakatatɛ mɛna waɛnɛlɔ waki Nzambi. 2 Lo ngɔndɔ kakɔ nshi 5, mbuta ate lo ɔnɔnyi wa 5 wa lɔhɔmbɔ la nkumekanga Jɛhɔyakina,+ 3 ɔtɛkɛta wa Jehowa wakaye le Ɛzɛkiyɛlɛ* ɔna omvutshi Buzi suke la ɔkɛdi wa Kebara lo wodja w’ase Kaladiya.+ Lonya la Jehowa lakawahema+ lɛkɔ.

4 Lam’akamendaka, dimi lakɛnyi lɔpɛpɛ la wolo+ layaye oma lo nɔrdɛ, ndo dinge dia woke la angadimu wa dja*+ wodingami la osase wa wolo wakikɔ, ndo oma l’atei wa dja akikɔ ɛngɔ kɛmɔtshi kafɔna la mfɛsa kosanganyi la paonyi.+ 5 L’etei katɔ kaki kɛnɛ kakɛnamaka oko ditongami 4 diasɛna,+ ndo ɔmɔmɔ l’atei adiɔ aki la ɛnamelo kele oko k’onto. 6 Ɔmɔmɔ l’atei adiɔ aki la dungi 4 ndo ahafu 4.+ 7 Ekolo adiɔ wakasembɔ tɔɔ ndo akaka adiɔ waki oko wa ɔsɔngɔ wa ngɔmbɛ, ndo vɔ wakahɛtaka oko ngaingai ka nkonga ka pudipudi.+ 8 Diɔ diaki la anya w’onto l’ɛse ka ahafu adiɔ lo bɛkɛ diakɔ 4 tshɛ, ndo diɔ diakɔ 4 diaki la dungi ndo la ahafu. 9 Ahafu adiɔ wakasakanaka lam’asawɔ. Diɔ kokadimɔka etena kakadiatshɔka; etongami la etongami kakasembɔka tɔɔ otsha la ntondo.+

10 Dungi diadiɔ diaki la ɛnamelo ka nganɛ: Ɔmɔmɔ l’atei adiɔ 4 aki la elungi k’onto la elungi ka ntambwɛ+ lo lɛkɛ la lonya l’omi, elungi ka ngɔmbɛ+ lo lɛkɛ la lonya la lɔmɔsɔ ndo ɔmɔmɔ l’atei adiɔ 4 aki la elungi+ ka mpongo.+ 11 Ngasɔ mbaki dungi diadiɔ. Ahafu adiɔ wakasandjɔ la diko diadiɔ. Ɔmɔmɔ aki la ahafu 2 wakasakanaka lam’asawɔ ndo ahafu 2 wakakombaka alemba adiɔ.+

12 Diɔ tshɛ diakatshɔka nsembɔ tɔɔ otsha la ntondo, lo ntshɔ otsha lo dihole tshɛ diakalangaka nyuma dia diɔ ntshɔ.+ Diɔ kokadimɔka etena kakadiatshɔka. 13 Ditongami diasɛna sɔ diaki la ɛnamelo ka akalanga wa dja wahɛta, ndo ɛngɔ kɛmɔtshi kafɔna la ewa wa dja yahɛta kaketetaka katshɔ kakalola lam’asa ditongami diasɛna, ndo dingadimu diakangadimɔka oma lo dja.+ 14 Etena kakatombaka ditongami diasɛna ndo kakadiakalolaka, weteto adiɔ waki la ɛnamelo ka esase wa dingadimu.

15 Etena kakamendaka ditongami diasɛna sɔ, dimi lakɛnyi otshimbi 1 la nkɛtɛ l’omamu wa etongami tshɛ kasɛna kaki la dungi 4.+ 16 Etshimbi ndo woho wakawasalema akɛnamaka oko ngaingai ka krizɔlitɛ, ndo wakɔ 4 wakafɔnaka. Ɛnamelo ndo woho wakasalema etshimbi akɔ aki oko otshimbi waki l’etei ka otshimbi. 17 Etena kakawatshɔka, vɔ wakakokaka ntshɔ lo bɛkɛ diakɔ 4 aha la nkadimɔ etena katawatshu. 18 Engangɔ awɔ waki atanga efula lo yɛdikɔ yakokiyaka wɔma, ndo engangɔ w’etshimbi akɔ 4 wakalole tɔɔ la washo l’otshimbedi w’otondo.+ 19 Etena tshɛ kakatshɔka ditongami diasɛna, etshimbi wakatshɔka kaamɛ la diɔ, ndo etena kakadiyamaka ditongami diasɛna oma la nkɛtɛ, ndo etshimbi wakadiyamaka.+ 20 Diɔ diakatshɔka lɛnɛ akalangaka nyuma dia diɔ ntshɔ, dihole tshɛ diakatshɔka nyuma. Etshimbi wakadiyamaka kaamɛ la diɔ, nɛ dia nyuma kakakambaka le ditongami diasɛna* mbaki ndo lo etshimbi. 21 Etena kakadiatshɔka, vɔ wakatshɔka; ndo etena kakadiemalaka, vɔ wakemalaka; ndo etena kakadiadiyamaka oma la nkɛtɛ, etshimbi wakadiyamaka kaamɛ la diɔ, nɛ dia nyuma kakakambaka le ditongami diasɛna mbaki ndo lo etshimbi.

22 La diko dia ɛtɛ wa ditongami diasɛna mbaki efanelo ka loowa la ngaingai oko ashi wambokama washa wɔma, lonanwe la diko dia ɛtɛ adiɔ.+ 23 L’ɛse ka loowa lakɔ, ahafu adiɔ wakasembɔ tɔɔ,* dimɔtshi mbɛlɛnganɛ la dikina. Ɔmɔmɔ l’atei adiɔ aki la ahafu 2 dia kombaka wedi ɔmɔtshi wa demba diadiɔ ndo 2 dia kombaka wedi okina. 24 Lam’akamoke lohelo la ahafu adiɔ, aki oko londjo la ashi wakɛla, oko londjo la Kanga-Wolo-Tshɛ.+ Etena kakadietetaka, aki oko londjo la asɔlayi. Etena kakadiemalaka, diɔ diakaholoyaka ahafu adiɔ.

25 Dui dimɔtshi diaki la diko dia loowa laki la diko dia ɛtɛ adiɔ. (Etena kakadiemalaka, diɔ diakaholoyaka ahafu adiɔ.) 26 La diko dia loowa laki la diko dia ɛtɛ adiɔ mbaki ɛngɔ kakɛnamaka oko dive+ dia safirɛ, ndo tɔ kakafɔnaka la kiti ka lowandji.+ Onto ɔmɔtshi lele ɛnamelo kande fɔnaka la k’onto+ akadjasɛ la diko lo kiti kakɔ ka lowandji. 27 Dimi lakɛnyi ɛngɔ kɛmɔtshi kahɛta ngaingai oko mfɛsa kosanganyi la paonyi+ kaki oko dja katondja esase oma lo kɛnɛ kakɛnama dia kekɔ lokende lande ndo polo la diko; ndo oma lo lokende lande oya l’ɛse, dimi lakɛnyi ɛngɔ kɛmɔtshi kafɔna la dja.+ Ngaingai kaki lo otshimbedi ande tshɛ 28 oko ka ngolo+ lo dinge lushi la mvula. Ngasɔ mbakɛnama esase wa ngaingai wakoodinge. Aki oko ɛnamelo ka lotombo la Jehowa.+ Lam’akamɛnyi ngasɔ, dimi lakakɔ ekukumadi ndo lakatatɛ mboka dui dia onto ɔmɔtshi atɛkɛta.