Ruta
3 Ko Naɔmi k’okilo ande wa womoto akawotɛ ate: “Ɔnami, shi dimi pombaka koyangɛ dia wɛ monga la lakayɛ*+ dia wɛ mɛnaka ɔlɔ? 2 Shi Bɔaza ekɔ owotɔ aso?+ Nde kakanga ekambi wa wamato waki kaamɛ la yɛ. L’otsho w’ɛlɔ nde ayofufola asami lo dihole di’esuswelo. 3 Ɔnkɔnɛ, ɔka ndo shinola esɔ ka nsolo kele lɔta ahɔndɔ* ko wɛ mpolɔ otsha lo dihole di’esuswelo. Kosale tshɛ diaha pami kakɔ mbeya dia wɛ ekɔ laawɔ polo ndo lam’ayondoshidiya ndɛ la nnɔ. 4 Lam’ayondetama, kolembete dihole diayondetama. Oma laasɔ kotshu, kotokombole dihɔndɔ diayondokomba ekolo ande ko wɛ ndala laawɔ. Nde ayokotɛ kɛnɛ kahombayɛ nsala.”
5 Ko nde akakadimola ate: “Dimi layosala kɛnɛ tshɛ kambutɛyɛ.” 6 Ko nde akaholɔ otsha lo dihole di’esuswelo ndo akatosala kɛnɛ tshɛ kakawotɛ okilo ande wa womoto. 7 L’etena kɛsɔ, Bɔaza akalɛka, akanɔka ndo aki l’ɔngɛnɔngɛnɔ l’otema. Oma laasɔ, nde akatshu tetama l’omamu wa tota di’asami. L’ɔkɔngɔ wa laasɔ, Ruta akɔtɔ ɔkɔkɛ ɔkɔkɛ, akawokombola dihɔndɔ diakandakombe ekolo ande, ko aketama laawɔ. 8 La midi k’otsho, pami kakɔ akatatɛ didima, ko nde akakotama ndo akɛnyi womoto ɔmɔtshi etami l’ekolo ande. 9 Nde akate ate: “Wɛ na?” Nde akakadimola ate: “Dimi Ruta, okambi ayɛ. Komba okambi ayɛ yema ya dihɔndɔ, nɛ dia wɛ ekɔ otshungodi.”+ 10 Ko nde akate ate: “Jehowa akɔtshɔkɔlɛ, ɔnami. Wɛ ambɛnya ngandji kayɛ ka kɔlamelo nto mbala kɛnɛ oleki mbala ka ntondo+ lo woho wahayayedi ɛlɔngɔ w’apami, oyadi ase wola kana akanga w’ɛngɔnyi. 11 Ɔnkɔnɛ tokake wɔma, ɔnami. Dimi layokosalɛ kɛnɛ tshɛ katayɛ,+ nɛ dia anto tshɛ wa l’osomba* mbeyaka dia wɛ ekɔ womoto l’ɔlɔlɔ efula. 12 Ekɔ mɛtɛ dia dimi lekɔ otshungodi,+ koko otshungodi okina wele owotɔ woleki suke suke ekɔ.+ 13 Tshikala lanɛ l’otsho ɔnɛ ndo naka nde ayokotshungola la pindju, kaawɔ nde kakotshungole. Ko naka nde halangi kotshungola,+ kete lo mɛtɛ oko wele Jehowa la lɔsɛnɔ, dimɛ layokotshungola. Etama lanɛ polo la pindju.”
14 Ko nde aketama l’ekolo ande polo la pindju ndo oma laasɔ, nde aketɔ wonya eke hiotshihotshi yahakoke onto mbeyama. Bɔaza akate ate: “Aha onto mbeya dia womoto ɔmɔtshi akaye lo dihole di’esuswelo.” 15 Nde akate nto ate: “Ela dihɔndɔ diɔlɔtshiyɛ ndo sandjoladiɔ.” Ko nde akadisandjola ndo Bɔaza akawodjɛ tɛdikɔ 6* t’asami lɔkɔ ko akawɛndja. L’ɔkɔngɔ wa laasɔ, nde akatshu otsha l’osomba.
16 Nde akakalola otsha le okilo ande wa womoto, ko okilo ande akawombola ate: “Ngande waketshi akambo na,* ɔnami?” Nde akawotɛ kɛnɛ tshɛ kakoosalɛ pami kakɔ. 17 Nde akakotsha ate: “Nde akambisha tɛdikɔ 6 tɔnɛ t’asami ndo akambute ate: ‘Tokalolake anyanya le okilo ayɛ.’” 18 Ko okilo ande akate ate: “Ɔnami, djasɛ lanɛ polo ndo lam’ayoyeya woho wayeta akambo, nɛ dia pami kakɔ hatolala djɔ paka nde ambokandola dikambo diakɔ ɛlɔ.”