1 Samuɛlɛ
24 Kam’akakalola Saolo oma la toyelana l’ase Filistiya, wakayowotɛ ɔnɛ: “Eenda, Davidɛ ekɔ l’oswe wa Ɛnɛ-Ngɛdi.”+
2 Ko Saolo akɔshi apami nunu sato (3000) wakasɔnama oma lo Isariyɛlɛ w’otondo ko akatshu toyanga Davidɛ nde la anto ande lo ave, lɛnɛ ele mbudi ya lo akona. 3 Saolo akakome suke la nkoto y’ɛkɔkɔ ya la ave yaki l’omamu w’otadimbo, lam’aki wooko ɔmɔtshi ko nde akɔtɔ l’etei dia tɛɛta* etena kele Davidɛ la anto ande wakadjasɛ la koma ya wooko+ akɔ. 4 Anto waki Davidɛ wakawotɛ vate: “Ɛlɔ, Jehowa ekɔ lo kotɛ ate: ‘Eenda, dimi lambokimɔ otunyi ayɛ lo anya+ ayɛ, wɛ mbeyaka mbosalɛ kɛnɛ kɛnayɛ ɔlɔlɔ.’” Ko Davidɛ akemala ndo akahembola ɔkɔkɛ ohembo w’okutu wele bu la anya waki Saolo. 5 Koko l’ɔkɔngɔ diko, otema* wa Davidɛ wakatetemala mbaanya,+ nɛ dia nde akahembola ohembo w’okutu wele bu la anya waki Saolo. 6 Nde akatɛ anto ande ate: “Haafɔnya dia lo ndjela kanyi ya Jehowa, dimi pombaka salɛ nkumɛmi, okitami wa Jehowa dikambo dia nganɛ lo mbaahɛ lonya lami, nɛ dia nde ekɔ okitami wa Jehowa.”+ 7 Ko Davidɛ akashimbe* anto ande la ɛtɛkɛta ɛsɔ ndo nde kombetawɔ dia vɔ ndɔsha Saolo. Saolo lo wedi ande, akatombe oma lo wooko ko akatshu.
8 Oma laasɔ, Davidɛ akonɛɛ, akatombe oma lo wooko akɔ ko akawelɛ Saolo ate: “Nkumɛmi nkumekanga+ le!” Lam’akɛwɔ Saolo, Davidɛ akakɔlama elungi polo la nkɛtɛ ndo akakusama. 9 Davidɛ akatɛ Saolo ate: “Lande na kahokamɛyɛ anto wakotɛ vate: ‘Davidɛ ekɔ lo nyanga dia kosalɛ kɔlɔ’?+ 10 Ɛlɔ, washo ayɛ hita wambɛna woho wakakokimwe Jehowa lo anya ami lo wooko. Koko lam’akatshi onto ɔmɔtshi dia kodiaka,+ dimi lakakooki kɛtshi ndo lakatshi nte: ‘Dimi hantahɛ nkumɛmi lonya, nɛ dia nde ekɔ okitami wa Jehowa.’+ 11 Papa le, eenda ohembo w’okutu ayɛ wele bu l’anya vɔ ɔnɛ lo lonya lami, nɛ dia lam’akamahembodi ohembo w’okutu ayɛ wele bu la anya, dimi hankodiaki. Wonya ɔnɛ wɛ koka mɛna ndo nshihodia dia dimi bu la kanyi ya kosalɛ kɔlɔ+ kana ya ntɔmbɔkɔ ndo dimi hankosale ndooko kɔlɔ kaanga mbatayayange lɔsɛnɔ*+ lami oko onto latatshe wenga. 12 Jehowa asambole lam’asami+ la yɛ ndo Jehowa akɔsɔmbɔya lo dikambo diami,+ koko dimi hantokahɛ lonya lami.+ 13 Oko wata yokedi y’edjedja ɔnɛ: ‘Oma le kanga kɔlɔ katoyaka kɔlɔ,’ koko dimi hantokahɛ lonya lami. 14 Nkumekanga k’Isariyɛlɛ onto akɔna atandayange? Onto akɔna atayatshanya? Onde mfɔ kambovɔ? Onde tshambi?+ 15 Jehowa ayale shushi ndo nde ayosambola lam’asami la yɛ, nde ayɛna ndo ayɔnswɛlɛ,+ ayonombosha ndo ayontshungola oma l’anya ayɛ.”
16 Lam’akashidiya Davidɛ mbotɛ awui asɔ, Saolo akate ate: “Davidɛ+ ɔnami le, ɔsɔ dui diayɛ?” Ko Saolo akatatɛ ndela la dui dia wolo. 17 Nde akatɛ Davidɛ ate: “Wɛ ndekami losembwe, nɛ dia wɛ akansalɛ ɔlɔlɔ, koko dimi lambokokaloya kɔlɔ.+ 18 Mɛtɛ ɛlɔ wɛ ambombutɛ ɔlɔlɔ wosadiyɛ diaha ndjakami etena kakankimwe Jehowa l’anya+ ayɛ. 19 Dikambo onto akɔna akoka mɛna otunyi ande ko nde mbotshika aha la mbosalɛ kɔlɔ? Jehowa ayokofuta lo kosalɛ ɔlɔlɔ+ l’ɔtɛ wa kɛnɛ konsaleyɛ ɛlɔ. 20 Ndo hokamɛ kakianɛ! Dimi mbeyaka mɛtɛ dia wɛ ayonga nkumekanga+ ndo diolelo dia Isariyɛlɛ diayolomba lo anya ayɛ. 21 Ontshibe kakianɛ lo lokombo la Jehowa+ dia wɛ hatoshila tokanula* tami oshiki l’ɔkɔngɔ ami ndo dia wɛ hatonya lokombo lami oma lo luudu+ la papa.” 22 Davidɛ akatshibɛ Saolo, ko Saolo akakalola lakande.+ Koko Davidɛ l’anto ande wakadɛ otsha lo longele.+