1 Samuɛlɛ

31 L’etena kɛsɔ, ase Filistiya wakalɔka l’ase Isariyɛlɛ.+ Ko apami w’ase Isariyɛlɛ wakalawɔ oma la ntondo k’ase Filistiya ndo efula wakadiakema lo Dikona dia Ngiliboa.+ 2 Ase Filistiya wakatetemala mbidja Saolo nde l’anande lo shasa, ko ase Filistiya wakadiake ana+ waki Saolo anɛ: Jɔnatana,+ Abinadaba ndo Malaki-Shua. 3 Ta diaki wolo le Saolo ndo amboki wa eta wakawɛnyi, ko amboki wa eta+ akɔ wakoohomuya wolo. 4 Ko Saolo akatɛ ɔmɛmbi ande wa dihomɔ dia ta ate: “Sɔmɔla lokuwa layɛ la ta kele ombikelɔ, diaha apami waki kominya mpota+ ango ndjoya ko ndjombika lokuwa ndo ndjonsalɛ akambo la esehe tshɛ.”* Koko ɔmɛmbi ande wa dihomɔ dia ta konanga, nɛ dia nde akoke wɔma efula. Ko Saolo akɔshi lokuwa la ta ndo akayakɔsha lɔkɔ.+ 5 Lam’akɛnyi ɔmɛmbi ande wa dihomɔ dia ta dia Saolo ambovɔ,+ nde lawɔ akayakɔsha lo lokuwa lande la ta, ko akavu kaamɛ la nde. 6 Ɔnkɔnɛ Saolo, anande w’apami 3, ɔmɛmbi ande wa dihomɔ dia ta ndo apami ande tshɛ wakavu kaamɛ lushi lɔsɔ.+ 7 Lam’akɛnyi ase Isariyɛlɛ waki l’ɛtshi ka nkɛtɛ ka l’okidi* ndo l’ɛtshi ka nkɛtɛ ka Jɔrdana dia apami w’ase Isariyɛlɛ wambolawɔ ndo Saolo nde l’anande w’apami wambovɔ, vɔ wakatatɛ ntshika esomba, ko wakalawɔ.+ Ko ase Filistiya wakaye ko wakadjasɛ lɔkɔ.

8 La wedi a pindju, lam’akaye ase Filistiya dia ndjɔsa diangɔ dia wanɛ wakavu, vɔ wakatane odo wa Saolo ndo w’anande w’apami 3 wokalemi lo Dikona dia Ngiliboa.+ 9 Ko vɔ wakoohembola ɔtɛ ndo wakɔshi dihomɔ diande dia ta, ko wakatome dui l’ɛtshi ka nkɛtɛ k’otondo k’ase Filistiya dia tohandjola lokumu+ lo mvudu* ya dikishi+ diawɔ ndo le anto. 10 Oma laasɔ, vɔ wakadje dihomɔ diande dia ta lo luudu la dikishi dia Ashitɔrɛtɛ ndo wakahanɛ odo ande l’ehele ka Bɛtɛ-Shana.+ 11 Lam’akoke ase Jabɛshɛ-Ngiliyadɛ+ kɛnɛ kakasalɛ ase Filistiya Saolo, 12 andɔshi wa ta tshɛ wakonɛɛ ndo wakande lɔkɛndɔ otsho w’otondo, ko wakayonya odo wa Saolo la edo w’anande w’apami oma lo ehele ka Bɛtɛ-Shana. Vɔ wakakalola la Jabɛshɛ ko wakataatshumba lɛkɔ. 13 Oma laasɔ, vɔ wakɔshi weka awɔ,+ ko wakakundɛ l’ɛse k’osongo wa tamarisɛ wa la Jabɛshɛ+ ndo wakakile mbo ya ndɛ l’edja ka nshi 7.