Rɔmɔ
15 Sho wanɛ wele wolo pombaka mɛmba wɛɔdu wa wanɛ wele bu wolo,+ koko aha ndjangɛnyangɛnya shoamɛ.+ 2 Sho tshɛ onto l’onto angɛnyangɛnya wonyande lo mbosalɛ ɔlɔlɔ, lo mbokeketsha.+ 3 Nɛ dia kaanga Kristo kondjangɛnyangɛnya ndamɛ,+ koko oko wakadiafundama ɔnɛ: “Ntɛngɔ yakawakɔtɛngaka, dimi kakawatɛngaka.”+ 4 Nɛ dia akambo tshɛ wakafundama lo nshi y’edjedja wakafundama dia tosha wetshelo,+ dia oma lo ekikelo+ kaso ndo oma lo esambelo k’oma lo Afundelo, sho monga la elongamelo.+ 5 Ɔnkɔnɛ, Nzambi kasha ekikelo ndo esambelo anyokimanyiya dia nyu tshɛ monga la woho wa yimba yaki la Kristo Yeso, 6 dia nyu tshɛ kaamɛ,+ la dui* ɔtɔi ntombola Nzambi, She Nkumɛso Yeso Kristo.
7 Oma lɔkɔ, nyolongɔnake*+ oko wakatolongola+ Kristo, dia Nzambi tombɔma. 8 Nɛ dia dimi lambonyotɛ nte: Kristo mɛtɛ akayala okambi wa wanɛ wakanyɛma mpota+ dia mɛnya dia Nzambi mbutaka mɛtɛ, dia nshikikɛ alaka wakandalake watshɛwɔ,+ 9 ndo dia wedja ntombola Nzambi l’ɔtɛ wa kɛtshi+ kande. Oko wakadiafundama ɔnɛ: “Diakɔ diele dimi layokotombola lo sɛkɛ l’atei wa wedja ndo dimi layembɛ lokombo layɛ esambo wa lotombo.”+ 10 Nde akate nto ate: “Wedja le, nyɔngɛnɛngɛnɛ, ndo anto ande.”+ 11 Ndo nto ɔnɛ: “Nyotombole Jehowa,* nyu wedja tshɛ, ndo anto tshɛ wootombole.”+ 12 Isaya akate nto ate: “Odio wa Jɛse+ wayoyala, ɔnɛ layotomba dia mbolɛ wedja.+ Ase wedja wayokitsha elongamelo+ kawɔ le nde.” 13 Nzambi kasha elongamelo anyolodia l’ɔngɛnɔngɛnɔ tshɛ ndo la wɔladi lo woho wayaɛkɛnyu le nde, dia nyu ndola tɔɔ* la elongamelo oma lo wolo wa nyuma k’ekila.+
14 Analengo le, dimɛ lekɔ l’eshikikelo lo dikambo dianyu nte ndo nyu lawɔ nyambolola tɔɔ la ɔlɔlɔ, nyambolola la ewo tshɛ ndo nyekɔ la akoka wa ndakana* lam’asanyu. 15 Koko dimi lambonyofundɛ lo ndeka nyohonolɛ akambo amɔtshi hwe hwe, oko onto lanyohola akambo akɔ nto l’ɔtɛ wa ɔlɔlɔ waheyama mbɛdika wakansalɛ Nzambi 16 dia dimi monga okambi wa lo sɛkɛ wa Kristo Yeso le ase wedja.+ Dimi lekɔ lo nkamba olimu w’ekila wa lokumu l’ɔlɔlɔ laki Nzambi+ la oyango wa wedja akɔ monga olambo wetawɔma, wokidiami la nyuma k’ekila.
17 Ɔnkɔnɛ, dimi lekɔ la ɔkɔkɔ wa ngɛnangɛna le Kristo Yeso lo akambo wendana la Nzambi. 18 Nɛ dia dimi hatosombɔ nyotɛ dikambo dikina onyake kɛnɛ kambosala Kristo lo tshimbo yami dia ase wedja monga l’okitanyiya l’ɔtɛ w’ɛtɛkɛta ami ndo w’etsha ami, 19 la wolo wa tolembetelo ndo akambo wa diambo,*+ la wolo wa nyuma kaki Nzambi, dia ntatɛ oma la Jɛrusalɛma ndo l’otshimbedi polo la Iluriko, dimi lakasambisha dimɛna dimɛna lokumu l’ɔlɔlɔ lendana la Kristo.+ 20 Lo mɛtɛ, lo yoho shɔ dimi lakasale la wolo diaha nsambisha lokumu l’ɔlɔlɔ lɛnɛ amboshilaka lokombo la Kristo mbeyama, diaha dimi ndjohika lo etshina k’onto okina, 21 koko oko wakadiafundama ɔnɛ: “Wanɛ wakiwɔ kombewoya ndooko dui lo dikambo diande wayɛna ndo wanɛ waki komboka wayoshihodia.”+
22 Diakɔ diele mbala efula dimi lakashimbamaka dia ndja le nyu. 23 Koko kakianɛ dimi laya bu la bɛtshi dia nkɛtɛ diahatasambishama lendo ndo aya ɛnɔnyi efula* wamomokombola dia ndja le nyu. 24 Ɔnkɔnɛ, lam’ayomotetaka otsha la Ɛspanyɛ, dimi nongamɛka dia layonyɛna ndo nyayotshindɛ yema l’ɔkɔngɔ wa dimi ntshikala kaamɛ la nyu tshanda mɔtshi. 25 Koko kakianɛ dimi layanga minda lɔkɛndɔ otsha la Jɛrusalɛma dia tokambɛ ekilami,+ 26 nɛ dia wanɛ wele la Makɛdɔniya ndo la Akaya wakɛnyi dimɛna nkimɔ diangɔ diawɔ oko weshasha dikambo dia ase wola wele l’atei w’ekilami wa la Jɛrusalɛma.+ 27 Eelo, vɔ wakɛnyi dimɛna nsala dikambo sɔ ndo lo mɛtɛ, vɔ waki la dibasa diawɔ; nɛ dia naka ase wedja wakakahana la wɔ diangɔ diawɔ dia lo nyuma, kete vɔ lawɔ pombaka mbakimanyiya la diangɔ diawɔ dia l’emunyi.+ 28 Ɔnkɔnɛ, l’ɔkɔngɔ wa dimi nshidiya nsala dikambo sɔ ndo wa dimi nkonya weshasha* ɛsɔ dimɛna le wɔ, dimi layeta lango otsha la Ɛspanyɛ. 29 Ndo nto, dimi mbeyaka dia lam’ayomoya le nyu, layoya la ɛtshɔkɔ w’oma le Kristo lo yɛdikɔ y’efula.
30 Analengo, dimi lambonyokeketsha lo tshimbo ya Nkumɛso Yeso Kristo ndo lo ngandji koye oma le nyuma dia nyu ndjasha kaamɛ la mi dia nɔmba Nzambi dikambo diami,+ 31 dia dimi ntshungɔ+ oma le anto wele bu ambetawudi wa la Judeya ndo dia olimu walangami tokambɛ ekilami+ wa la Jɛrusalɛma mbetawɔma le wɔ, 32 kele naka Nzambi alanga, kandje le nyu la ɔngɛnɔngɛnɔ ndo kandjokeketshame kaamɛ la nyu. 33 Nzambi kasha wɔladi ayale kaamɛ la nyu nyu tshɛ.+ Aamɛɛ.