2 Samuɛlɛ

2 L’ɔkɔngɔ diko, Davidɛ akambola Jehowa+ ate: “Ntshu l’osomba ɔmɔtshi wa la Juda?” Jehowa akawotɛ ate: “Tshɔka.” Ko Davidɛ akambola ate: “Lende ahombami ntshɔ?” Nde akakadimola ate: “La Hɛbɛrɔna.”+ 2 Ko Davidɛ akatshu lɛkɔ nde la wadiɛnde 2, Ahinɔama+ ose Jezɛrɛlɛ la Abigayɛlɛ+ laki wadi aki Nabala ose Karamɛlɛ. 3 Ndo nto, Davidɛ akatshu l’apami waki kaamɛ la nde,+ onto l’onto kaamɛ l’ase luudu lande, ko wakatodjasɛ l’esomba waki suke la Hɛbɛrɔna. 4 Oma laasɔ, ase Juda wakaye ko wakayokita Davidɛ esɔ dia nde monga nkumekanga ka nkumbo ka Juda.+

Vɔ wakatɛ Davidɛ vate: “Ase Jabɛshɛ-Ngiliyadɛ mbakakundɛ Saolo.” 5 Ko Davidɛ akatome akɛndji le ase Jabɛshɛ-Ngiliyadɛ dia towatɛ ɔnɛ: “Jehowa anyɔtshɔkɔlɛ, nɛ dia nyakɛnya ngandji ka kɔlamelo le nkumɛnyu Saolo lo mbokundɛ.+ 6 Jehowa anyɛnya ngandji ka kɔlamelo ndo onge la kɔlamelo le nyu. Dimi lawɔ layonyɛnya ɔlɔlɔ w’otema, nɛ dia nyakasale dikambo sɔ.+ 7 Wonya ɔnɛ, aya nyu nkeketsha anya anyu ndo monga la dihonga, nɛ dia nkumɛnyu Saolo ambovɔ ndo ase nkumbo ka Juda wakankite esɔ dia dimi monga nkumekanga kawɔ.”

8 Koko Abinɛrɛ+ ɔna Nɛrɛ, owandji w’asɔlayi waki Saolo akɔshi Ishi-Bɔshɛtɛ+ ɔna Saolo ko akootehoya otsha la Mahanayima+ 9 ndo akatowetɛ nkumekanga ka Ngiliyadɛ,+ aseka Ashura, Jezɛrɛlɛ,+ Efrayimɛ,+ Bɛnjamina ndo Isariyɛlɛ w’otondo. 10 Ishi-Bɔshɛtɛ ɔna Saolo aki l’ɛnɔnyi 40 lam’akandonge nkumekanga k’Isariyɛlɛ ndo nde akolɛ l’edja k’ɛnɔnyi 2. Koko ase nkumbo ka Juda wakasukɛka Davidɛ.+ 11 Davidɛ aki nkumekanga ka nkumbo ka Juda la Hɛbɛrɔna l’edja* k’ɛnɔnyi 7 la ngɔndɔ 6.+

12 L’ɔkɔngɔ diko, Abinɛrɛ ɔna Nɛrɛ nde l’ekambi waki Ishi-Bɔshɛtɛ ɔna Saolo wakonɛɛ oma la Mahanayima+ otsha la Ngibiyɔna.+ 13 Jɔaba+ ɔna Zeruya+ nde l’ekambi waki Davidɛ vɔ lawɔ wakonɛɛ dia tohomana la wɔ lo difuku di’ashi dia la Ngibiyɔna. Ko olui ɔmɔtshi wakemala lo wedi ɔmɔtshi wa difuku di’ashi ndo olui okina lo wedi okina wa difuku di’ashi. 14 L’ekomelo, Abinɛrɛ akatɛ Jɔaba ate: “Ɛlɔngɔ w’apami wemale kele walɔ* la ntondo kaso.” Ko Jɔaba akate ate: “Wemale.” 15 Ko vɔ wakemala ndo wakatehɔ lo ndjela yɛdikɔ y’anto 12 waki Bɛnjamina nde la Ishi-Bɔshɛtɛ ɔna Saolo ndo anto 12 oma l’atei w’ekambi waki Davidɛ. 16 Vɔ wakakimanɛ l’ɛtɛ ndo onto l’onto akake ɔnɛ lakalɔka la nde lokuwa lande la ta lo lohandju, ko vɔ tshɛ wakakɔ kaamɛ. Ɔnkɔnɛ, wakɔlɛ dihole sɔ diele la Ngibiyɔna ɔnɛ Hɛlɛkatɛ-Hazurima.*

17 Ta diaki wolo efula lushi lɔsɔ, ko Abinɛrɛ nde l’apami w’ase Isariyɛlɛ wakayɔlɛndjamaka la ntondo k’ekambi waki Davidɛ. 18 Ana 3 waki Zeruya+ anɛ waki lɛkɔ: Jɔaba,+ Abishai+ ndo Asahɛlɛ.+ Asahɛlɛ akalawɔka efula oko mboloko l’oswe. 19 Asahɛlɛ akatshanya Abinɛrɛ ndo nde kotshika ndjelana la Abinɛrɛ lo mbɛtɔla lo lonya l’omi kana la lɔmɔsɔ. 20 Lam’akɛwɔ Abinɛrɛ, nde akambola ate: “Asahɛlɛ, ɔnɛ wɛ?” Ko nde akate ate: “Eelo, dimi.” 21 Ko Abinɛrɛ akawotɛ ate: “Tshɔka lo lonya layɛ l’omi kana la lɔmɔsɔ kele nda ɔlɔngɔ a pami ɔmɔtshi ndo kɛnɛ tshɛ kayoyɔsa le nde konge kayɛ.” Koko Asahɛlɛ konanga ntshika mbotshanya. 22 Ko Abinɛrɛ akatɛ Asahɛlɛ nto ate: “Tshika mbitshanyami. Lande na kahombami kodiaka? Ngande wayomokoka tɛnana la ɔnanyɔ Jɔaba elungi l’elungi?” 23 Koko nde kotshika mbotshanya, ko Abinɛrɛ akawoke dikɔnga lo dikundju ko dikɔnga+ diakɔ diakatombe l’ɔkɔngɔ. Nde akakɔ laawɔ ko akavu. Onto tshɛ lakayaka lo dihole diakakɔ Asahɛlɛ ndo diakandavu akemalaka ndo akatshikalaka tshanda laawɔ.

24 Ko Jɔaba nde la Abishai wakayelana la Abinɛrɛ. Wonya akawadjɛ lam’akawakome lo kionakona ya Ama yɛlane la Ngiya kele lo mboka k’otsha l’oswe wa Ngibiyɔna. 25 Aseka Bɛnjamina wakatshumana lɛkɔ l’ɔkɔngɔ wa Abinɛrɛ, ko wakayala olui 1 ndo wakemala lo shɔdi ya kionakona mɔtshi. 26 Ko Abinɛrɛ akawelɛ Jɔaba ate: “Onde lokuwa la ta layotetemala ndjaka tsho? Onde wɛ heye dia paka etombelo wa kɔlɔ eto mbayonga? Akongayɛ dia wɛ mbutɛ anto ayɛ dia vɔ ntshika ndjelana l’anangɛwɔ?” 27 Ko Jɔaba akate ate: “Lo mɛtɛ, oko wele Nzambi ka mɛtɛ la lɔsɛnɔ, otondonga wɛ hatshi, tshike paka la pindju mbotoyotshika anto ami ndjelana l’anangɛwɔ.” 28 Jɔaba akade dimama, ko anto ande wakatshike ndjelana l’ase Isariyɛlɛ ndo ta diakashile.

29 Ko Abinɛrɛ nde l’anto ande wakakɛndakɛnda lo Araba+ otsho ɔsɔ w’otondo, wakatehɔ Jɔrdana, wakakɛndakɛnda lo lowenga* l’otondo ndo wakatokoma la Mahanayima.+ 30 L’ɔkɔngɔ wa Jɔaba nkalola oma la totshanya Abinɛrɛ, nde akasanganya anto tshɛ. L’atei w’ekambi waki Davidɛ, anto 19 mbakashishɔ laadiko dia Asahɛlɛ. 31 Koko ekambi wa Davidɛ wakalɛndja aseka Bɛnjamina l’anto waki Abinɛrɛ ndo apami awɔ 360 wakavu. 32 Vɔ wakɔshi odo wa Asahɛlɛ,+ ko wakookundɛ lo diombo dia she diele la Bɛtɛlɛhɛma.+ Oma laasɔ, Jɔaba l’anto ande wakatshu otsho w’otondo, ko wakatokoma la Hɛbɛrɔna+ la pindju.