1 Samuɛlɛ
8 Lam’akayala Samuɛlɛ osombe, nde akasɔnɛ anande w’apami dia vɔ monga toshushi lo Isariyɛlɛ. 2 Ɔnande la pami l’enondo lokombo lande Jɔɛlɛ ndo la 2 lokombo lande Abidja.+ Vɔ waki toshushi la Bɛrɛ-Shɛba. 3 Koko anande kondjela lokolo lande. Vɔ wakayasha lo oyango wa wahɔ wa lokeso,+ wakalongolaka etshimba+ ndo wakasambolaka dombo wɛngɛngɛ.+
4 L’edjedja ka wonya, dikumanyi tshɛ dia l’Isariyɛlɛ wakasangana ko wakatshu le Samuɛlɛ la Rama. 5 Vɔ wakawotɛ vate: “Wonya ɔnɛ wɛ aya osombe, koko anayɛ hawoyele lokolo layɛ. Laasɔ, otɔsɔnɛ nkumekanga kahomba tolomboshaka oko wasalemadiɔ lo wedja ekina tshɛ.”+ 6 Koko Samuɛlɛ kɔngɛnangɛna* lam’akawate vate: “Otosha nkumekanga kahomba tolomboshaka.” Samuɛlɛ akalɔmbɛ Jehowa, 7 ko Jehowa akatɛ Samuɛlɛ ate: “Etawɔ kɛnɛ tshɛ kakotɛ wodja, nɛ dia aha wɛ katonawɔ, koko dimi kambowotona dia monga nkumekanga+ kawɔ. 8 Vɔ wekɔ lo nsala paka oko wookowosalaka oma ko lushi lakamaatondja oma l’Edjibito polo ndo ɛlɔ. Vɔ wekɔ lo ntetemala mbokami ɔkɔngɔ,+ wekɔ lo kambɛ tozambizambi+ tokina ndo ngasɔ mbakosalɛwɔ. 9 Ɔnkɔnɛ, etawɔ kɛnɛ katawɔ. Koko wɛ pombaka mbahɛmɔla dimɛna. Tɛwɔ akambo wele nkumekanga kayowaolɛ ayonga la lotshungɔ la mbasalɛ.”
10 Ko Samuɛlɛ akatɛ wanɛ wakɔɔlɔmbaka dia mbasha nkumekanga kɛnɛ tshɛ kakate Jehowa. 11 Nde akate ate: “Akambo anɛ mbayonga nkumekanga kayonyolɛ la lotshungɔ la nyosalɛka:+ Nde ayɔsaka ananyu w’apami+ ko ayowadjaka lo pusupusu+ yande ndo ayowaetɛ ambahemi wa mfalasa+ ndo amɔtshi wayohombaka talawɔka la ntondo ka pusupusu yande. 12 Nde ayoyasɔnɛ ewandji w’anto nunu nunu+ ndo ewandji w’anto akumi atanu akumi atanu;+ amɔtshi wayowokambɛka+ dikambɔ, wayowonɛka+ ndo wayowosalɛka dihomɔ dia ta ndo dihomɔ dia pusupusu+ yande. 13 Nde ayɔsaka ananyu wa wamato dia vɔ monga asadi wa bisɔ dia nshinola,* akatshi ndo asadi+ wa mapa. 14 Nde ayɔsaka diangɔ dioleki amɛna di’oma lo dikambɔ dianyu dia ntɔngɔ, dikambɔ dianyu dia vinyɔ+ ndo dikambɔ dianyu di’ɔlivɛ, ko ayodishaka ekambi ande. 15 Nde ayɔsaka tenyi dia dikumi di’oma lo dikambɔ dianyu dia ntɔngɔ ndo dikambɔ dianyu dia vinyɔ, ko nde ayoshaka ɛnɛnɛ wa lakande ndo ekambi ande. 16 Nde ayɔsaka ekambi anyu w’apami ndo wa wamato, ngɔmbɛ yanyu yoleki amɛna ndo mponda yanyu, ko nde ayokambaka la yɔ lo olimu ande.+ 17 Nde ayɔsaka tenyi dia dikumi dia ɛkɔkɔ+ anyu ndo nyayonga ekambi ande. 18 Lushi lekɔ layonyoda ekoko l’ɔtɛ wa nkumekanga kakanyayasɔnɛ nyuamɛ,+ koko lushi lɔsɔ Jehowa hatonyokadimola.”
19 Koko anto kombetawɔ mpokamɛ kɛnɛ kakawatɛ Samuɛlɛ ndo vɔ wakate vate: “Keema, sho nangaka paka monga la nkumekanga. 20 Ko tayonga oko wedja ekina tshɛ, kele nkumekanga kaso katolomboshake, katɔlɔmbɔlake ndo katɔlwɛke ata.” 21 L’ɔkɔngɔ wa Samuɛlɛ mpokamɛ awui tshɛ wakate anto, nde akate ɛtɛkɛta akɔ lo atoyi wa Jehowa. 22 Jehowa akatɛ Samuɛlɛ ate: “Etawɔ kɛnɛ katawɔ ndo sɔna nkumekanga kahomba mbalɔmbɔlaka.”+ Ko Samuɛlɛ akatɛ ase Isariyɛlɛ ate: “Onto l’onto akalole otsha l’osomba ande.”