1 Samuɛlɛ

12 L’ekomelo, Samuɛlɛ akatɛ ase Isariyɛlɛ tshɛ ate: “Dimi lambosala* kɛnɛ tshɛ kakanyanɔmbɛ ndo lambonyɔsɔnɛ nkumekanga dia nyolɛ.+ 2 Nkumekanga kanyɔlɔmbɔla*+ nde ɔnɛ! Dimi laya osombe, lambotomba ndjwe kasaa ndo anami wekɔ lanɛ kaamɛ la nyu.+ Dimi lakanyɔlɔmbɔla oma ko dikɛnda diami polo lushi l’ɛlɔ.+ 3 Dimi ɔnɛ; nyote lo dikambo diami la ntondo ka Jehowa ndo la ntondo ka okitami ande w’esɔ:+ Ngɔmbɛ kana mponda kaki na kakamɔshi?+ Onto akɔna akamakese kana akamasoya? Oma le na akamalongola etshimba* dia ndjihami washo?+ Naka lakasale dui sɔ, dimi layonyokaloya.”+ 4 Ko vɔ wakate vate: “Wɛ kotokesa kana tosoya ndo wɛ konongola ndooko ɛngɔ oma le onto ɔmɔtshi.” 5 Nde akawatɛ ate: “Jehowa ekɔ ɔmɛnyi lo dikambo dianyu ndo okitami ande w’esɔ ekɔ ɔmɛnyi lushi l’ɛlɔ dia nyu hanyotanyi ndooko dikambo dia fundami.”* Ko vɔ wakate vate: “Nde ekɔ ɔmɛnyi.”

6 Ko Samuɛlɛ akatɛ anto ate: “Jehowa lakakambe la Mɔsɛ nde la Arɔna ndo lakatondja watshɛnyu oma lo wodja w’Edjibito+ ekɔ ɔmɛnyi. 7 Kakianɛ, nyemale kele nyolombosha la ntondo ka Jehowa lo ndjela etsha wosembwe tshɛ wakasale Jehowa dikambo dianyu ndo dikambo dia watshɛnyu.

8 “Kam’akakome Jakɔbɔ l’Edjibito+ ndo lam’akatatɛ watshɛnyu nɔmba Jehowa ekimanyielo,+ Jehowa akatome Mɔsɛ+ nde la Arɔna dia totondja watshɛnyu oma l’Edjibito ndo dia ndjowadjashiya lo dihole+ nɛ. 9 Koko vɔ wakohɛ Jehowa Nzambi kawɔ, ko nde akaakimɔ+ l’anya wa Sisɛra,+ owandji w’asɔlayi wa Hazɔra ndo l’anya w’ase Filistiya+ ndo l’anya wa nkumekanga ka Mɔaba,+ ko vɔ wakaalɔsha. 10 Vɔ wakalɔmbɛ Jehowa ekimanyielo+ vate: ‘Sho takasale pɛkato,+ nɛ dia takatshike Jehowa dia kambɛ waa Baala+ ndo dikishi dia Ashitɔrɛtɛ.+ Kakianɛ, ototshungole oma l’anya w’atunyi aso dia sho kokambɛ.’ 11 Ko Jehowa akatome Jerubala,+ Bedana, Jafɛta+ ndo Samuɛlɛ+ ko nde akanyotshungola oma l’anya w’atunyi tshɛ wakanyodinge dia nyu nsɛna lo lotui tshitshi.+ 12 Lam’akanyɛnyi dia Nahashi+ nkumekanga k’ase Amɔna amboya ndjonyɔlɔsha, nyakatetemala mbutɛmi nyate: ‘Keema, sho nangaka paka monga la nkumekanga,’+ kaanga mbele Jehowa Nzambi kanyu ekɔ Nkumekanga+ kanyu. 13 Nkumekanga kakanyasɔnɛ, ɔnɛ lakanyalɔmbɛ, nde ɔnɛ. Nyende, Jehowa ambonyɔsɔnɛ+ nkumekanga. 14 Naka nyu mboka Jehowa+ wɔma, mbokambɛ+ ndo nkitanyiya dui diande,+ ndo naka hanyɔtɔmbɔkwɛ didjango dia Jehowa, ko nyu la nkumekanga kanyolɛ nyamboyela Jehowa Nzambi kanyu, kete dimɛna. 15 Ko naka hanyokitanyiyisha dui dia Jehowa ndo nyambohindola didjango dia Jehowa, kete lonya la Jehowa layonyɔlɔsha nyu la washɛnyu.+ 16 Kakianɛ, nyemale kele nyende dikambo dia woke nɛ diayanga nsala Jehowa lo washo anyu. 17 Keema tekɔ nshi ya dinela di’eponga? Dimi layanga nɔmba Jehowa dia mvula nkungola ndo ndɔ, ko nyayeya ndo nyayoshihodia kɔlɔ kamonyosala lo washo wa Jehowa lo ndjayangɛ nkumekanga nyuamɛ.”+

18 Samuɛlɛ akalɔmbɛ Jehowa, ko Jehowa akasale dia mvula nkungola ndo ndɔ lushi lɔsɔ, ko anto tshɛ wakoke Jehowa nde la Samuɛlɛ wɔma w’efula. 19 Anto tshɛ wakatɛ Samuɛlɛ vate: “Lɔmba Jehowa Nzambi kayɛ dikambo dia ekambi+ ayɛ, nɛ dia sho hatolange mvɔ, dikambo sho tambahatanya kɔlɔ kekina laadiko dia pɛkato yaso tshɛ lo woho wambotɔlɔmba nkumekanga.”

20 Ko Samuɛlɛ akatɛ anto ate: “Tanyokake wɔma. Nyu mɛtɛ nyakasale akambo wa kɔlɔ asɔ tshɛ. Dikambo ɔtɔi ele, tanyotshikake ndjela Jehowa+ ndo nyokambe Jehowa la etema+ anyu tshɛ. 21 Tanyokadimɔke dia ndjela diangɔ di’anyanya*+ diele bu la wahɔ+ ndo diahakoke nyoshimbɛ, nɛ dia diɔ diekɔ anyanya.* 22 L’ɔtɛ wa lokombo+ lande la woke, Jehowa hatɔsɛka anto ande,+ nɛ dia Jehowa akɛnyi ɔlɔlɔ nyetɛ anto ande.+ 23 Dimi lo wedi ami, dimi bu la kanyi ya salɛ Jehowa pɛkato lo ntshika nɔmba dikambo dianyu ndo dimi layotetemala nyetsha lo mboka ka dimɛna ndo kosembwe. 24 Dikambo ɔtɔi ele, nyoke Jehowa+ wɔma, nyookambe la kɔlamelo* ndo la etema anyu tshɛ lo menda akambo wa weke wamondonyosalɛ.+ 25 Ko naka nyu ntshininala lo nsala kɔlɔ, kete nyayoshila oshiki,+ nyu la nkumekanga kanyu.”+