2 Samuɛlɛ

17 Oma laasɔ, Ahitɔfɛlɛ akatɛ Abisalɔma ate: “Lam’alangayɛ, etawɔ dia dimi nsɔna apami nunu dikumi la pende (12 000) kele tonee, totshanya Davidɛ l’otsho. 2 Dimi layokoma lalende etena kayondɔkɔmɔ ndo kayondɔlɛmba,*+ ko dimi layowaata asolo. Anto tshɛ wele kaamɛ la nde wayolawɔ, ko dimi layodiaka paka nkumekanga.+ 3 Oma laasɔ, dimi layokaloya anto tshɛ le yɛ. Okalwelo w’anto tshɛ nemanɛka la kɛnɛ kayokomɛ pami kayangayɛ. L’ɔkɔngɔ wa laasɔ, anto tshɛ wayonga lo wɔladi.” 4 Kanyi shɔ yaki dimɛna lo washo wa Abisalɔma ndo le dikumanyi tshɛ dia l’Isariyɛlɛ.

5 Koko Abisalɔma akate ate: “Lam’alangayɛ, elɛ ndo Hushai+ ose Araka kele tolonge kɛnɛ kayondota.” 6 Ko Hushai akɔtɔ le Abisalɔma. Oma laasɔ, Abisalɔma akawotɛ ate: “Ɔsɔ kele dako diakasha Ahitɔfɛlɛ. Onde toyele dako diande? Naka bu, ko wɛ totɛ.” 7 Ko Hushai akatɛ Abisalɔma ate: “Dako diambosha Ahitɔfɛlɛ mbala kɛnɛ bu dimɛna!”+

8 Hushai akatetemala mbuta ate: “Wɛ mbeyaka dimɛna dia shɔ nde l’apami wele kaamɛ la nde wekɔ apami wa wolo+ efula ndo vɔ waya ngala* oko laondo lamboshisha analɔ l’oswe.+ Ndo nto, shɔ ekɔ ɔndɔshi wa ta+ ndo nde hatolala kaamɛ la anto. 9 Wonya ɔnɛ nde ndjashɛ lo wooko* ɔmɔtshi kana lo dihole dikina,+ ndo naka nde ndɔsha ntondo, kete wanɛ wayoka dui sɔ wayota vate: ‘Wanɛ wasukɛ Abisalɔma wambɔlɛndjama!’ 10 Kaanga pami ka dihonga kele la otema wele oko wa ntambwɛ,+ otema ande wayɔlɛlɔ la wɔma, nɛ dia ase Isariyɛlɛ tshɛ mbeyaka dia shɔ ekɔ pami ka wolo+ ndo apami wele kaamɛ la nde wekɔ la dihonga. 11 Dako diami diɔnɛ: Sanganya ase Isariyɛlɛ tshɛ laleyɛ, oma la Danɛ polo la Bɛrɛ-Shɛba,+ vɔ wonge efula oko nsɛkɛ ya lɔkɔngɔ la l’omamu wa ndjale+ ndo wɛ pombaka mbalɔmbɔla lo ta. 12 Tayowɔlɔsha dihole tshɛ diayondonga ndo tayowɔtwɛ oko watɔkɔka lɔpɔpɔ la nkɛtɛ. Ndooko onto l’atei awɔ layotshikala la lɔsɛnɔ, oyadi nde kana apami wele kaamɛ la nde. 13 Naka nde ndawɔ l’osomba ɔmɔtshi, ase Isariyɛlɛ tshɛ wayɔtɔla ɛkɔdi l’osomba akɔ, ko tayokotola osomba akɔ polo l’okidi edja ndo ndooko kaanga lɔwɔkɔ layotshikala.”

14 Ko Abisalɔma nde l’apami tshɛ w’ase Isariyɛlɛ wakate vate: “Dako diaki Hushai ose Araka diamboleka+ dako diaki Ahitɔfɛlɛ dimɛna!” Nɛ dia Jehowa akayashikikɛ* dia mfukutanya dako dia dimɛna diaki Ahitɔfɛlɛ+ dia Jehowa mbela Abisalɔma mpokoso.+

15 L’ɔkɔngɔ diko, Hushai akatɛ Zadɔka nde la Abiyatara+ wanɛ waki ɛlɔmbɛdi ate: “Ɔsɔ kele dako diakasha Ahitɔfɛlɛ Abisalɔma nde la dikumanyi dia l’Isariyɛlɛ ndo ɔsɔ kele dako diakamasha. 16 Ɔnkɔnɛ, nyotome Davidɛ dui yema esadi dia tɔɔhɛmɔla ɔnɛ: ‘Totshikalake lo ateho* wele suke l’oswe wa shɛnga l’otsho, koko tehɔ. Naka aha ngasɔ, kete nkumekanga nde l’anto tshɛ wele kaamɛ la nde wayoshilama oshiki.’”*+

17 Jɔnatana+ nde la Ahimaza+ wakadjasɛka la Ɛnɛ-Rɔngɛlɛ.+ Ko okambi ɔmɔtshi wa womoto akatshu ko akatowatɛ, ko vɔ wakatshu totɛ nkumekanga Davidɛ, nɛ dia vɔ kosombɔ mɛnama lo mbɔtwɛlɔ k’osomba. 18 Koko ɔlɔngɔ ɔmɔtshi akawaɛnyi, ko akatotɛ Abisalɔma. Ko vɔ akɔ 2 wakatshu esadi ndo wakatokoma lo luudu laki pami kɛmɔtshi ka la Bahurima+ kaki la difuku di’ashi lo sɛkɛ diande. Vɔ wakɔtɔ lɔkɔ, 19 ko wadi aki pami kakɔ akasandjola okombɔ laadiko dia difuku diakɔ, ko akadifɛ ndo akaanɛ ofushi wa ntɔngɔ laawɔ. Ndooko onto lakeye dui sɔ. 20 Ekambi waki Abisalɔma wakakome le womoto akɔ lo luudu lande, ko wakawombola vate: “Lende ele Ahimaza nde la Jɔnatana?” Womoto akɔ akakadimola ate: “Vɔ waketshi lanɛ otsha l’ashi.”+ Ko apami akɔ wakaayange, koko vɔ kombaɛna, ko wakakalola la Jɛrusalɛma.

21 L’ɔkɔngɔ w’apami akɔ ntshɔ, vɔ wakatombe oma lo difuku di’ashi, ko wakatshu ndo wakatewoya nkumekanga Davidɛ. Vɔ wakawotɛ vate: “Onɛɛ kele tehɔ ashi esadi esadi, nɛ dia ɔsɔ kele dako diakasha Ahitɔfɛlɛ lo dikambo diayɛ.”+ 22 Mbala kakɔ ɔtɔi, Davidɛ nde l’anto tshɛ waki kaamɛ la nde wakonɛɛ ko wakatehɔ Jɔrdana. Oya lo pindju, ndooko onto lakatshikala laki atatehɔ Jɔrdana.

23 Lam’akɛnyi Ahitɔfɛlɛ dia hawokambi la dako diande, nde akakeleka edee lo mponda ko akatshu lakande lo ngelo kawɔ.+ L’ɔkɔngɔ wa nde mbidjangɛ ase luudu lande+ kɛnɛ kakawahombe nsala, nde akayadje kɔdi.+ Ɔnkɔnɛ nde akavu, ko wakookundɛ lo waombo wa watshɛnde.

24 L’etena kɛsɔ, Davidɛ akatshu otsha la Mahanayima+ ndo Abisalɔma akatehɔ Jɔrdana nde l’apami tshɛ w’ase Isariyɛlɛ. 25 Abisalɔma aketɛ Amasa+ ɔnɔmbɔdi w’asɔlayi lo dihole dia Jɔaba.+ Amasa aki ɔna aki pami kɛmɔtshi k’ose Isariyɛlɛ, lokombo lande Itira, ɔnɛ lakeyana la Abigayɛlɛ+ ɔna Nahashi, kose aki Zeruya nyango Jɔaba. 26 Ase Isariyɛlɛ vɔ la Abisalɔma wakake mpango kawɔ l’ɛtshi ka nkɛtɛ ka Ngiliyadɛ.+

27 Kam’akakome Davidɛ la Mahanayima, Shobi ɔna Nahashi k’oma la Raba+ w’ase Amɔna, Makiri+ ɔna Amiyɛlɛ w’oma la Lo-Debarɛ ndo Barazilai+ ose Ngiliyadɛ l’oma la Rɔngɛlima 28 wakela mbeto, alɔnga wa weke, mpoke y’awomba, eponga, asami, ofushi, ntɔngɔ ya lofumba, nyanya, nkɔndɛ ya totshitshɛ, ntɔngɔ ya lokanga, 29 osanga, matɛka, ɛkɔkɔ ndo abɛlɛ w’ekama. Vɔ wakela diangɔ sɔ le Davidɛ nde l’anto waki kaamɛ la nde dia vɔ ndɛ,+ nɛ dia vɔ wakate vate: “Anto wekɔ la ndjala, wambɔlɛmba ndo wekɔ la mposa k’ashi l’oswe wa shɛnga.”+