Etsha
16 Ko Pɔɔlɔ akakome la Dɛrɛbɛ ndo la Lustɛra.+ Ndo ombeki ɔmɔtshi aki lɛkɔ, lokombo lande Timɔte,+ ɔna aki womoto ɔmɔtshi l’ose Juda laki ombetawudi, koko papa kande aki ose Ngirika. 2 Anangɛso wa la Lustɛra ndo wa l’Ikɔniyo wakatɛkɛtaka dimɛna lo dikambo dia Timɔte. 3 Pɔɔlɔ akɛnya nsaki ka Timɔte mbotshindɛ, ko nde akawɔshi, akawonya mpota l’ɔtɛ w’ase Juda waki l’ahole asɔ,+ nɛ dia anto tshɛ wakeyaka dia she aki ose Ngirika. 4 Lam’akawatetetaka l’esomba, vɔ wakatatshikɛka wanɛ waki lɛkɔ wadjango wakawahombe nkitanyiya wakatome apɔstɔlɔ la dikumanyi diaki la Jɛrusalɛma.+ 5 Ko tshumanelo diakatatetemalaka nkeketala lo mbetawɔ ndo lofulo l’anto lakatadɛka lushi la lushi.
6 Laadiko dia laasɔ, vɔ wakete la Firingiya ndo lo wodja wa Ngalatiya,+ nɛ dia nyuma k’ekila kakaashimbe dia mbewoya ɔtɛkɛta wa Nzambi lo prɔvɛnsɛ ka Aziya. 7 Ndo lam’akawakome la Misiya, vɔ wakalange mbɔtɔ la Bituniya,+ koko nyuma ka Yeso kakaashimbe. 8 Ko vɔ wakete oma la Misiya ko wakaholɔ otsha la Tɔrɔa. 9 L’otsho, Pɔɔlɔ akɛnyi ɛnɛlɔ kɛnɛ, pami kɛmɔtshi k’ose Makɛdɔniya akemala ko akɔɔsɛngasɛnga ate: “Yaka lendo la Makɛdɔniya kele yotokimanyiya.” 10 Kam’akandɛnyi ɛnɛlɔ kɛsɔ, sho takayange ntshɔ la Makɛdɔniya, tafɔnya dia Nzambi ambotelɛ dia sho tewoya anto wa lɛkɔ lokumu l’ɔlɔlɔ.
11 Ko takete dia ndjale oma la Tɔrɔa ndo takasembɔ tɔɔ otsha la Samɔtrakɛ, ko takatokoma la Neapɔli la wedi a pindju. 12 Takamɔ oma lɛkɔ ko takatshu otsha la Filipɛ,+ osomba woleki woke wa lo distrikɛ dia Makɛdɔniya wakendamaka oma le ase Rɔmɔ. Sho takatshikala nshi mɔtshi l’osomba ɔsɔ. 13 Lushi la Sabato, takatombe l’andja w’osomba oma lo soko diaki suke la ɔkɛdi ɔmɔtshi, lɛnɛ akatafɔnyaka dia tayotana dihole dimɔtshi dia dɔmbɛlɔ, ko takadjasɛ ndo takatatɛ nsambisha wamato wakasangana laawɔ. 14 Womoto ɔmɔtshi akasondjaka ahɔndɔ w’ebelabela ndo nde aki ose osomba wa Tiyatira,+ lokombo lande Ludiya ndo nde akatɛmɔlaka Nzambi. Nde akahokamɛka, ko Jehowa* akadihola otema ande dia nde mpokamɛ akambo wakataka Pɔɔlɔ. 15 Lam’akandabatizama+ nde la ase luudu lande, nde akatɔsɛngasɛnga ate: “Naka nyu mɛnaka dia dimi lekɔ la kɔlamelo le Jehowa,* nyoye nyoyohange lakami.” Ko nde akatotshutshuya dia sho mbetawɔ.
16 Lam’akatatatshɔka otsha lo dihole dia dɔmbɛlɔ, takahomana l’ose olimu ɔmɔtshi wa womoto waki la ɔdiɛngɛ wakataka akambo wahataye.+ Nde akakondjɛka ewandji ande diangɔ efula oma lo woho wakinde wetshi.* 17 Ɔna womoto ɔsɔ akayatoyelaka sho la Pɔɔlɔ ndo akayahangɔhangɔka ate: “Apami anɛ wekɔ ekambi wa Nzambi Kaheme-Tshɛ+ ndo vɔ wekɔ lo nyosambisha mboka ka panda.” 18 Nde akasalaka dikambo sɔ l’edja ka nshi efula. Ɔnkɔnɛ, Pɔɔlɔ akayɔlɛmbaka dikambo sɔ, ko nde akakadimɔ ndo akatɛ ɔdiɛngɛ akɔ ate: “Lo lokombo la Yeso Kristo, lambokodjangɛ dia wɛ ntomba oma le nde.” Ko ɔdiɛngɛ akɔ wakatombe ko wonya akɔ.+
19 Lam’akɛnyi ewandji ande dia waya bu l’elongamelo ka nkondja diangɔ diakawakondjaka,+ vɔ wakande Pɔɔlɔ la Silasɛ ko wakatshu la wɔ lo lobingu le ewandji.+ 20 Vɔ wakaatɔlɛ le ewandji wa lɛɛta, wata vate: “Apami anɛ wekɔ lo mfukutanya osomba aso woho w’anyanya.+ Vɔ wekɔ ase Juda 21 ndo vɔ wekɔ lo nsambisha mbekelo yahatakoke sho ase Rɔmɔ ndjela ndo nkitanyiya.” 22 Ko olui w’anto wakawaomalɛ, ndo l’ɔkɔngɔ w’ewandji wa lɛɛta mbahɔtɔla ahɔndɔ awɔ, wakasha didjango dia mbakɔmɔla mfimbɔ.+ 23 L’ɔkɔngɔ wa vɔ mbakɔmɔla efula, vɔ wakawadje lo lokanu ndo wakadjangɛ olami wa lokanu dia mbalama dimɛna.+ 24 Lam’ele nde akalongola didjango sɔ, nde akawadje lo lokanu la l’etei ndo akawadje ekolo lo lowete.
25 Koko la midi k’otsho, Pɔɔlɔ la Silasɛ wakalɔmbaka ndo wakatombolaka Nzambi l’esambo+ ndo ase lokanu wakaahokamɛka. 26 Mbala kakɔ ɔtɔi, nkɛtɛ yakadidima ndo etshina ka luudu la lokanu kakasukasuka. Nkuke tshɛ yakadihɔ ndo mɔlɔla tshɛ wakawaakeleka wakakelekɔ.+ 27 Lam’akemɔ olami wa lokanu oma lo djɔ ndo lam’akandɛnyi dia nkuke ya lokanu yambodihɔ, nde akasɔmɔla lokuwa lande la ta ndo akalange ndjadiaka, afɔnya dia ase lokanu wambolawɔ.+ 28 Ko Pɔɔlɔ akate la dui dia wolo ate: “Toyasalɛke kɔlɔ, nɛ dia sho tshɛ tekɔ lanɛ!” 29 Ko olami wa lokanu akalɔmbɛ dia vɔ mbeela owa ko nde akasamanya l’etei, asaka lokomba ndo nde akayakɔsha la ntondo ka Pɔɔlɔ la Silasɛ. 30 Nde akaatondja l’andja ndo akawambola ate: “Amɛka, ahombami nsala dia dimi shimbamɛ?” 31 Vɔ wakawotɛ vate: “Onga la mbetawɔ le Nkumadiɔndjɔ Yeso, ko wɛ la ase luudu layɛ nyayoshimbamɛ.”+ 32 Vɔ wakawewoya nde la ase luudu lande tshɛ ɔtɛkɛta wa Jehowa.* 33 Ko nde akawaɔshi ko wonya akɔ l’otsho ndo akasole mpota yawɔ. Oma laasɔ nde la nkumbo kande k’otondo wakabatizama aha la ntshimbatshimba.+ 34 Nde akawaɔtshiya lo luudu lande, akawasha diangɔ dia ndɛ ndo nde la ase luudu lande tshɛ wakangɛnangɛna efula, nɛ dia nde ambetawɔ Nzambi.
35 Lam’akahotɔ wonya, ewandji wa lɛɛta wakatome apulushi dia towotɛ ɔnɛ: “Tshungola apami anɛ.” 36 Olami wa lokanu akatɛ Pɔɔlɔ kɛnɛ kakawawotɛ ɔnɛ: “Ewandji wa lɛɛta wambotoma dui dia nyotshungola nyu 2. Ɔnkɔnɛ, nyotombe ndo nyotshu la ki.” 37 Koko Pɔɔlɔ akawatɛ ate: “Vɔ wakatɔkɔmɔla lo sɛkɛ, sho ase Rɔmɔ,+ aha la onongo* ndo wakatodje lo lokanu. Kakianɛ vɔ wototondja lo woshɛshɛ? Keema! Nyotowaele vɔamɛ wayototondja.” 38 Apulushi wakatotɛ ewandji wa lɛɛta akambo asɔ. Ko ewandji wa lɛɛta wakoke wɔma lam’akaweye dia vɔ wekɔ ase Rɔmɔ.+ 39 Ɔnkɔnɛ, vɔ wakaye ndjowasɛngasɛnga ndo l’ɔkɔngɔ wa vɔ mbatondja, vɔ wakaalɔmbɛ dia vɔ ntomba oma l’osomba. 40 Koko etena kakawatombe oma lo lokanu, vɔ wakatshu otsha laka Ludiya ndo lam’akawɛnyi anangɛso, vɔ wakaakeketsha+ ko wakatshu.