Luka

2 Lo nshi shɔ, Kayisa Ogistɛ akadje didjango dia anto tshɛ wa lo nkɛtɛ k’otondo mfundja nkombo yawɔ lo abuku wa lɛɛta. 2 (Ofundjelo wa ntondo ɔsɔ wakasalema lo etena kaki Kiriniyo nguvɛrnɛrɛ ka Suriya.) 3 Ko anto tshɛ wakatshu dia tofundja nkombo, onto l’onto l’osomba awɔ wa lootɔ. 4 Yɔsɛfu+ nde lawɔ akonɛ oma la Ngalileya, oma l’osomba wa Nazarɛtɛ ko akatshu la Judeya, l’osomba wa Davidɛ welɛwɔ Bɛtɛlɛhɛma,+ nɛ dia nde aki ose nkumbo ka lo ɔlɔndji wa Davidɛ. 5 Nde akatshu dia tofundja nkombo lo abuku wa lɛɛta kaamɛ la Mariya, ɔnɛ lakandɔshi wadi oko wakandolake+ ndo nde aki suke la mbota.+ 6 Lam’akiwɔ lɛkɔ, nshi ya nde mbota yakakoke. 7 Ko nde akote ɔna pami, ɔna l’enondo+ ndo akawɔmbɛ ahɔndɔ ko akoolasha lo eleelo ka nyama,+ nɛ dia dihole komonga lo luudu l’angɛndangɛnda.

8 Lo wodja akɔ, alami w’ɛkɔkɔ wakatshikalaka l’andja walama ɛkɔkɔ awɔ l’otsho. 9 Mbala kakɔ ɔtɔi, ondjelo wa Jehowa* akemala la ntondo kawɔ ndo lotombo la Jehowa* lakahɛtaka lakaadinge, ko vɔ wakoke wɔma efula. 10 Koko ondjelo akawatɛ ate: “Tanyokake wɔma, nɛ dia layanga nyewoya lokumu l’ɔlɔlɔ layosha anto tshɛ ɔngɛnɔngɛnɔ w’efula. 11 Nɛ dia ɛlɔ Kristo Nkumadiɔndjɔ,+ oshimbedi+ anyu ambotɔ l’osomba+ wa Davidɛ. 12 Lambonyosha djembetelo nyɛ: Nyayotana ɔna ashashi ɔmbami ahɔndɔ ndo oshami lo eleelo ka nyama.” 13 Ko mbala kakɔ ɔtɔi, leemba la woke l’alembe+ wa l’olongo kaamɛ la ondjelo akɔ wakatombolaka Nzambi, wata vate: 14 “Lotombo layale le Nzambi lele laadiko di’elongo ndo wɔladi wayale la nkɛtɛ le anto wetawɔnde.”

15 Ɔnkɔnɛ, lam’akadɛ andjelo l’olongo, alami w’ɛkɔkɔ wakatanɛ vate: “Nyɛsɔ totshu la Bɛtɛlɛhɛma kele totende dikambo diambotomba sɔ ndo diambotewoya Jehowa.”* 16 Ko vɔ wakatshu aha la ntshimbatshimba ndo wakatotana Mariya la Yɔsɛfu ndo ɔna oshami lo eleelo ka nyama. 17 Lam’akawɛnyi dui sɔ, vɔ wakewoya losango lakawawatɛ lo dikambo dia ɔnakɔ. 18 Ko anto tshɛ wakoke akambo wakate alami w’ɛkɔkɔ wakaambe, 19 Mariya akalame akambo asɔ tshɛ ndo akakanaka yimba+ lo kitshimudi yawɔ. 20 Oma laasɔ, alami w’ɛkɔkɔ wakakalola, watandola ndo watatombola Nzambi l’ɔtɛ wa kɛnɛ tshɛ kakawoke ndo kakawɛnyi oko akawawatɛ.

21 L’ɔkɔngɔ wa nshi 8, lam’akakoke etena ka mbonya mpota,+ vɔ wakawɔlɛ Yeso, lokombo lakawatɛ ondjelo la ntondo ka Mariya ntshɔ diemi+ diande.

22 Lam’akakoke etena ka vɔ mbɛdiama lo ndjela Ɛlɛmbɛ wa Mɔsɛ,+ vɔ wakatshu la nde la Jɛrusalɛma dia towɛnya le Jehowa,* 23 oko wakadiafundama lo Ɛlɛmbɛ wa Jehowa* ɔnɛ: “Ɔna pami* tshɛ l’enondo ayelamɛka ekila le Jehowa.”*+ 24 Ko vɔ wakalambola olambo lo ndjela kɛnɛ kakatama lo Ɛlɛmbɛ wa Jehowa* ɔnɛ: “Benga 2 kana ana 2 wa tokudumba.”+

25 Nyolonge, pami kɛmɔtshi aki la Jɛrusalɛma, lokombo lande Simɛyɔna. Nde aki onto ɔlɔlɔ ndo akokaka Nzambi wɔma. Nde akakongaka esambelo+ ka Isariyɛlɛ ndo nyuma k’ekila kakikɔ le nde. 26 Ndo nto, Nzambi akawotɛ l’ekimanyielo ka nyuma k’ekila dia nde hatovɔ paka nde ambotɛnyi Kristo kaki Jehowa.* 27 Nyuma kakɔɔlɔmbɔla otsha lo tɛmpɛlɔ ndo lam’ele ambutshi wa Yeso wakaye la nde lo tɛmpɛlɔ dia ndjosala kɛnɛ kakalɔmbaka Ɛlɛmbɛ+ lo dikambo diande oko waki mbekelo kawɔ, 28 nde akɛmbɛ Yeso lo anya ande ndo akatombola Nzambi, ata ate: 29 “Nkum’Olongo Nkumadiɔndjɔ, kakianɛ wɛ ambetawɔ dia okambi ayɛ mvɔ la ki+ lo ndjela kɛnɛ kakayate, 30 nɛ dia washo ami wambɛna ehomɔ kayɛ ka panda+ 31 kakayalɔngɔsɔla lo washo w’anto tshɛ,+ 32 osase+ dia minya wodjima oma lo wedja+ ndo lotombo la wodja ayɛ Isariyɛlɛ.” 33 Ko she la nyango ɔna wakaambaka lo mboka akambo wakatamaka lo dikambo diande. 34 Ndo nto, Simɛyɔna akaatshɔkɔla ndo akatɛ Mariya nyango ɔna ate: “Hokamɛ, ɔna ɔnɛ ambɔsɔnama dikambo dia ɔkwɛlɔ+ ndo wetwelo w’anto efula lo Isariyɛlɛ+ ndo dia monga djembetelo yayowɔtɛkɛtaka kɔlɔ lo dikambo diande+ 35 (eelo, wɛ* ayokama lokuwa la ta l’otale)+ l’oyango wa tokanyi tele l’anto efula l’etema ntomba sɛkɛ.”

36 L’etena kɛsɔ kaki Anna, omvutshi wa womoto, ɔna Fanuɛlɛ la womoto la lo dioho dia Ashɛrɛ. Womoto ɔsɔ aki osombe wa lokosombe ndo nde akadjasɛ l’omɛnde ɛnɔnyi 7 l’ɔkɔngɔ wa vɔ ntshukana,* 37 ndo l’etena kɛsɔ, nde aki wadi aki odo ele la ɛnɔnyi 84. Ndooko lushi lakandetsha lo tɛmpɛlɔ ndo nde akakambaka olimu w’ekila otsho la yanyi kaamɛ la dikilelo dia mbo ya ndɛ ndo la ɛsɛngɔsɛngɔ. 38 Nde akaye ko wonya akɔ, akasha Nzambi losaka ndo akatɛka anto tshɛ wakakongaka etshungwelo+ ka Jɛrusalɛma dikambo dia ɔnakɔ.

39 Lam’akawashidiya nsala akambo tshɛ lo ndjela Ɛlɛmbɛ wa Jehowa,*+ vɔ wakakalola la Ngalileya, l’osomba awɔ wa Nazarɛtɛ.+ 40 Ɔna akatatetemalaka mbola ndo akatakeketalaka, akatalolaka la lomba ndo akatahomɔka+ lokolo l’ɔlɔ lo washo wa Nzambi.

41 Ambutshi ande waki la mbekelo ka tshɔka ɔnɔnyi l’ɔnɔnyi la Jɛrusalɛma lo fɛtɛ k’Elekanelo.+ 42 Lam’akinde l’ɛnɔnyi 12, vɔ wakatshu lo fɛtɛ+ oko waki mbekelo kawɔ. 43 Lam’akashile fɛtɛ ndo lam’akawatakalolaka, Yeso akatshikala la Jɛrusalɛma koko ambutshi ande kombeya. 44 Vɔ wakande lɔkɛndɔ la lushi l’otondo, nɛ dia wakafɔnyaka dia nde ekɔ l’ɔnɔngɔ w’anto wakatatshɔka la wɔ, ko vɔ wakatatɛ mboyanga le ewotɔ awɔ ndo le anto weyana la wɔ. 45 Lam’ele vɔ kombɛna, vɔ wakakalola la Jɛrusalɛma ndo wakooyange wolo. 46 L’ɔkɔngɔ wa mboyanga nshi 3, vɔ wakootane lo tɛmpɛlɔ odjashi l’atei w’embetsha, awahokamɛ ndo awaoka ambola. 47 Koko anto tshɛ wakoohokamɛka wakambaka lo menda yimba yande ndo ekadimwelo+ ande. 48 Lam’akawɛnyi ambutshi ande, vɔ wakaambe ndo nyango akawotɛ ate: “Ɔnami, lande na katosalɛyɛ nganɛ? Dimi la shɔ tambohandjɔ wɔɔngɔ la takoyange.” 49 Koko nde akawatɛ ate: “Lande na katanyanyange? Onde nyu hanyeye dia dimi pombaka monga lo luudu la Papa?”+ 50 Koko vɔ koshihodia kɛnɛ kakandawatɛ.

51 Ko nde akaholɔ la wɔ ndo wakakalola la Nazarɛtɛ ndo nde akakitanyiyaka* awui awɔ.+ Ndo nto, nyango akalamaka akambo asɔ tshɛ dimɛna l’otema.+ 52 Yeso akatahamaka lo lomba, lo demba ndo akatahomɔka lokolo l’ɔlɔ lo washo wa Nzambi ndo w’anto.