15 Okadimwelo wa la memakana tutshaka nkɛlɛ,+
Koko tshɛkɛta ya kɔlɔ mbidiyaka nkɛlɛ.+
2 Lolemi la kanga lomba kambaka dimɛna la ewo,+
Koko onyɔ wa kanga enginya tondjaka enginya kande sɛkɛ.
3 Washo wa Jehowa wekɔ lo dihole tshɛ,
Wenda anto wa kɔlɔ ndo anto w’ɛlɔlɔ.+
4 Lolemi la ki lekɔ osongo wa lɔsɛnɔ,+
Koko ɛtɛkɛta wa lokeso kɔmɔlaka.
5 Kanga enginya mɔnyɔlaka ohokwelo+ wa she,
Koko kanga kɛsɔ mbetawɔka engwelo.+
6 Diangɔ dia nɛmɔ diekɔ efula lo luudu l’onto ɔlɔlɔ,
Koko kɛnɛ kakondja kanga kɔlɔ mbeelaka ekakatanu.+
7 Ɛlɔmɔ w’akanga wa lomba dianganyaka ewo,+
Koko aha ngasɔ mbele otema wa kanga enginya.+
8 Olambo w’akanga wa kɔlɔ wekɔ wɔnɔnyi le Jehowa,+
Koko dɔmbɛlɔ dia anto w’ɛlɔlɔ mbɔngɛnyangɛnyaka.+
9 Jehowa petshaka mboka ka kanga kɔlɔ,+
Koko nde nangaka onto lawesa losembwe.+
10 Ohokwelo mɛnamaka kɔlɔ le onto latakɔ mboka,+
Koko onto tshɛ lahetsha lohango ayovɔ.+
11 Diombo ndo dihole dia elanyelo mɛnamaka tshɛ le Jehowa.+
Kete hoke etema w’anto!+
12 Ɔmɔnyɔdi halange onto lawongola.+
Nde hatɔkɛtshanya la kanga lomba.+
13 Otema w’ɔngɛnɔngɛnɔ kimanyiyaka dia elungi monga l’ɔlɔ,
Koko otema wele la lɔkɔnyɔ kɔmɔlaka yimba.+
14 Otema wa yimba nyangaka ewo,+
Koko onyɔ wa kanga enginya ndɛka awui w’enginya.+
15 Nshi tshɛ y’ɔmɛnyi mfɔnu yekɔ kɔlɔ,+
Koko onto lele la otema wele l’ɔlɔ salaka fɛtɛ+ tena tshɛ.
16 Ndeka dimɛna monga la yema tshitshɛ lo wɔma wa Jehowa+
Lo dihole dia ɔngɔnyi w’efula wele kaamɛ la ekiyanu.+
17 Ndeka dimɛna ndɛ akatshikatshi lam’ele ngandji+
Lo dihole dia ndɛ ngɔmbɛ ya wata lam’ele lohetsho.+
18 Onto ladunganɛ la nkɛlɛ tondjaka ewanu,+
Koko ɔnɛ lahoke nkɛlɛ esadi mbɔladiaka ewanu.+
19 Mboka ka kanga nɛndɛ kekɔ oko lokombo la atɛndɛ,+
Koko mboka k’onto ɔlɔlɔ kekɔ oko nkɛtɛ y’ebamubamu.+
20 Ɔna la lomba ngɛnyangɛnyaka she,+
Koko kanga enginya mɔnyɔlaka nyango.+
21 Enginya ekɔ dui di’ɔngɛnɔngɛnɔ le onto lele bu la ekanelo k’ɔlɔlɔ,+
Koko onto lele la shɛnɔdi sembɔka tɔɔ otsha la ntondo.+
22 Sangwelo ndanaka lam’aha ɔkɛtshanyelo,
Koko dikambo ndowanaka lam’ele andaki+ efula.
23 Onto ngɛnangɛnaka mbisha okadimwelo wa dimɛna,+
Ndo dui diotami lo etena kahombama diekɔ dimɛna efula!+
24 Mboka ka lɔsɛnɔ tɔlaka polo le onto lele la shɛnɔdi,+
Dia mbokokɛ diaha nde ntshɔ lo Diombo.+
25 Jehowa ayohandjola luudu la kanga otako,+
Koko nde ayokokɛ olelo wa wadi aki odo.+
26 Jehowa petshaka toseke ta kanga kɔlɔ,+
Koko ɛtɛkɛta w’amɛna wekɔ pudipudi le Nde.+
27 Onto layanga wahɔ wa lokeso mbelaka ofukutanu lo luudu la nde hita,+
Koko ɔnɛ lahetsha mbo y’otsho ayotetemala nsɛna.+
28 Otema w’onto ɔlɔlɔ kanaka yimba la ntondo ka nkadimola,+
Koko onyɔ wa kanga kɔlɔ tondjaka akambo wa kɔlɔ lo sɛkɛ.
29 Jehowa mangana etale la akanga wa kɔlɔ,
Koko nde mbokaka dɔmbɛlɔ dia anto w’ɛlɔlɔ.+
30 Onto lakenda la washo w’ɔngɛnɔngɛnɔ ngɛnyangɛnyaka otema;
Lokumu l’ɔlɔlɔ keketshaka weka.+
31 Onto lahokamɛ lohango lashimbɛ lɔsɛnɔ
Ekɔ lo luudu kaamɛ la akanga wa lomba.+
32 Onto tshɛ latona ohokwelo mɔnyɔlaka lɔsɛnɔ lande,+
Koko onto tshɛ lahokamɛ lohango kondjaka yimba.+
33 Wɔma wa Jehowa wekɔ olowanyelo washa lomba,+
Ndo okitshakitsha mbetaka la ntondo ka lotombo.+