Isaya
27 Lushi lɔsɔ, Jehowa la lokuwa lande la ta la ngala, la woke ndo la wolo,+
Ayodja yimba yande le Leviatana, oloyi w’ɔsɛlɔ,
Le Leviatana,* oloyi w’akɔtɛ akɔtɛ,
Ndo nde ayodiaka shimamba ka lo ndjale.
2 Lushi lakɔ, kanyowembee* nyate:
“Ekambɔ ka vinyɔ katondja vinyɔ yele la lofulo!+
3 Dimi Jehowa kele olami atɔ.+
Wonya tshɛ dimi kitɛka ashi.+
Dimi kilamaka otsho la yanyi,
Diaha onto kilanya.+
4 Dimi bu la nkɛlɛ.+
Akɔna ayɔndɔsha la akombokombo w’atɛndɛ ndo la nkangaka?
Dimi layoyihɔtshahɔtsha ndo layoyitshumba tshɛ kaamɛ.
5 Naka aha ngasɔ, nde akukute longele lami.
Nde adje ki la mi;
Lam’alanganyu, nde adje ki la mi.”
6 Lo nshi yayaye, Jakɔbɔ ayotondja edio,
Isariyɛlɛ ayɔmɔnga ndo ayotondja nsɔngusɔngu,+
Ndo vɔ wayoloda nkɛtɛ la diangɔ.+
7 Onde nde pombaka kɔmama la lofimbɔ la ɔnɛ lɔɔkɔmɔla?
Kana onde nde pombaka ndjakema oko odiakemelo wa edo ande?
8 La kioko ya wolo kayoyɔlɔshana la nde etena kayoyookimɔ.
Nde ayowotshanya la loowe lande la wolo lushi la lɔpɛpɛ l’oma lo ɛstɛ.+
9 Ɔnkɔnɛ, ngasɔ kayokombama munga ka Jakɔbɔ,+
Ndo nganɛ kayonga elowa tshɛ etena kayonyɛma pɛkato kande:
Nde ayosala ave tshɛ wa elambwelo
Oko ofushi wa mpɛmbɛ wambotshulɔma,
Ndo ndooko kimɛta ka l’osongo* kana dilambwelo dia tshɔ diayotshikala.+
10 Nɛ dia osomba wodingami la mpele wayotshikala hwe;
Ahole wa ndeshaka dongalonga wayohamɛ ndo wayotshikala vɔamɛ oko oswe wa shɛnga.+
Lɛkɔ mbayɔlɛka ndo mbayetamaka yana ya ngɔmbɛ
Ndo lɛkɔ mbayoyɔlɛ ntahe yawɔ.+
11 Etena kayoma ntahe yawɔ,
Wamato wayoya ko wayoyihembola,
Wayɔhɛtsha dja la yɔ.
Nɛ dia anto anɛ bu la yimba.+
Diakɔ diele Otungi awɔ hatowaoka kɛtshi,
Ndo Ɔnɛ lakaasale hatowahomuya lokolo l’ɔlɔ.+
12 Lushi lɔsɔ Jehowa ayonyinginya elowa oma l’omamu wa Ɔkɛdi* wakɛla polo l’Okidi w’ashi* wa l’Edjibito,+ ko nyu ase Isariyɛlɛ nyayotshumanyema ɔtɔi ɔtɔi.+ 13 Lushi lɔsɔ dimama dia woke diayodama,+ ko wanɛ wele suke la ndjakema lo wodja w’Asuriya+ ndo wanɛ wakadiangana lo wodja w’Edjibito+ wayoya ndo wayokusamɛ Jehowa lo dikona di’ekila dia la Jɛrusalɛma.+