Isaya
37 Kam’akoke nkumekanga Hɛzɛkiya dui sɔ, nde akaatshatsha ahɔndɔ ande, akalɔtɛ akoto, ko akatshu otsha lo luudu la Jehowa.+ 2 Oma laasɔ, nde akatome Eliyakima laki owandji w’ase luudu* la nkumekanga, Shebina laki ofundji ndo dikumanyi dia ɛlɔmbɛdi, wɔlɔtshi akoto otsha le omvutshi Isaya+ ɔna Amɔza. 3 Vɔ wakawotɛ vate: “Hɛzɛkiya kata ate: ‘Ɛlɔ ekɔ lushi la lɔkɔnyɔ, la lohango* ndo la diɔnyɔ, nɛ dia ana wekɔ suke la mbotɔ,* koko wolo wa mbota bu.+ 4 Ondo Jehowa Nzambi kayɛ ayoka ɛtɛkɛta waki Rabishakɛ wakootome nkumɛnde nkumekanga k’Asuriya dia ndjodja Nzambi+ kasɛna tɔfwɛfwɛ ndo nde ayokoya la nde l’ɔtɛ w’ɛtɛkɛta wamboka Jehowa Nzambi kayɛ. Ɔnkɔnɛ, sala dɔmbɛlɔ+ lo wahɔ w’atshikadi weke la lɔsɛnɔ.’”+
5 Ɔnkɔnɛ ekambi waki nkumekanga Hɛzɛkiya wakatshu le Isaya,+ 6 ko Isaya akawatɛ ate: “Nyotote nkumɛnyu nyate: ‘Jehowa kata ate: “Tokake wɔma+ l’ɔtɛ w’ɛtɛkɛta wamboyoka, ɛtɛkɛta wambɔntɛnga ekambi waki nkumekanga k’Asuriya.+ 7 Dimi layanga mbidja kanyi lo yimba yande,* ko nde ayoka losango lɔmɔtshi ndo ayokalola otsha lo wodja ande,+ ndo dimi layosala dia nde tovɔ la lokuwa la ta lo wodja ande hita.”’”+
8 L’ɔkɔngɔ wa Rabishakɛ mboka dia nkumekanga k’Asuriya ambokalola oma la Lakishi, nde akakalola le nde, ko akatootana alɔsha Libina.+ 9 Ko nkumekanga akoke wata lo dikambo dia Tirihaka nkumekanga k’Etiyɔpiya ɔnɛ: “Nde amboya ndjokɔlɔsha.” Ɔnkɔnɛ etena kakandoke dui sɔ, nde akatome akɛndji nto le Hɛzɛkiya+ ate: 10 “Nyotote Hɛzɛkiya nkumekanga ka Juda nyate: ‘Tetawɔke dia Nzambi kayaɛkɛyɛ le nde kokesa ate: “Jɛrusalɛma hatokimɔma lo anya wa nkumekanga k’Asuriya.”+ 11 Eenda, wɛ ambokaka kɛnɛ kakasalɛ nkumi ya dikanga y’Asuriya wedja tshɛ lo mbalanya.+ Onde paka wɛmɛ oto kayohanda? 12 Onde tozambizambi t’ase wedja wele watshɛmi wakaalanya takaatshungola?+ Lende ele Ngɔzana, Harana,+ Rezɛfu ndo ase Ɛdɛna waki la Tɛlɛ-Asara? 13 Lende ele nkumekanga ka Hamatɛ, nkumekanga ka Arapadɛ kaamɛ la nkumekanga k’osomba wa Sefaravayima,+ wa Hɛna ndo wa Iva?’”
14 Hɛzɛkiya akɔshi mikanda oma lo anya w’akɛndji ko akadia. Oma laasɔ, Hɛzɛkiya akatshu lo luudu la Jehowa ko akahandjola mikanda akɔ* la ntondo ka Jehowa.+ 15 Ko Hɛzɛkiya akatatɛ nɔmba la ntondo ka Jehowa+ ndo akate ate: 16 “Jehowa kanga lolembelembe,+ Nzambi k’Isariyɛlɛ le, wɛ lodjashi lo kiti ka lowandji laadiko* dia akɛruba, wɛmɛ oto kele Nzambi ka mɛtɛ lo waolelo tshɛ wa la nkɛtɛ. Wɛ kakasale olongo la nkɛtɛ. 17 Jehowa le, ohokɛ lotui ndo ooke!+ Jehowa le, odihole washo ayɛ kele ɛnyi!+ Ohokame ɛtɛkɛta tshɛ wa Sɛnakɛribɛ wadjande Nzambi kasɛna tɔfwɛfwɛ.+ 18 Jehowa le, ekɔ mɛtɛ dia nkumi ya dikanga y’Asuriya wambohandjola wedja tshɛ,+ mbidja ndo wodja awɔ hita. 19 Ndo vɔ wambodja tozambizambi tawɔ lo dja,+ nɛ dia tɔ komonga nzambi, koko olimu w’anya w’anto,+ esongo ndo ave. Diakɔ diakawakoke mbalanya. 20 Koko wonya ɔnɛ, Jehowa Nzambi kaso le, otoshimbee oma lo anya ande, kele waolelo tshɛ wa la nkɛtɛ weye dia wɛ Jehowa, wɛ oto kele Nzambi.”+
21 Oma laasɔ, Isaya ɔna Amɔza akatomɛ Hɛzɛkiya dikɛndji ate: “Jehowa Nzambi k’Isariyɛlɛ kata ate: ‘Lam’ele wɛ akanɔmbɛ lo dikambo dia Sɛnakɛribɛ nkumekanga k’Asuriya,+ 22 Jehowa kata lo dikambo diande ate:
“Ɔna womoto l’emuma la Siɔna ambokɔnyɔla, nde ambokɔsɔka.
Ɔna womoto la Jɛrusalɛma ambonyinginya ɔtɛ lo dikambo diayɛ.
23 Akɔna amboyodja tɔfwɛfwɛ+ ndo amboyɔtɛnga?
Akɔna ahangwɛyɛ+
Ndo ahangolɛyɛ washo la lotamanya?
Le l’Ekila la Isariyɛlɛ!+
24 Lo tshimbo y’ekambi ayɛ, wɛ akadje Jehowa+ tɔfwɛfwɛ ndo akate wate:
‘La lokema la pusupusu yami ya ta
Dimi layodɛ lo tɔsɔdi t’akona,+
Lo ahole woleki etale wa la Lɛbanɔna.
Dimi layɔkɔta elondo w’etale wa lɛkɔ, esongo wa dihake woleki amɛna wa lɛkɔ.
Dimi layɔtɔ lo ahole wa woshamu woleki la diko, lo ekonda awɔ wa ngamba.
25 Dimi layotshima afuku w’ashi ndo layɔnɔ ashi;
Dimi layoonya tɔkɔkɔ* ta l’Edjibito la dikaka diami.’
26 Onde wɛ atoke? Dui sɔ diakashikikɛma* oma ko edjedja.
Dimi lakadilɔngɔsɔla*+ oma ko nshi yambetaka.
Kakianɛ dimi layanga dikotsha.+
Wɛ ayetɛ esomba wodingami la mpele atota w’elanyelo.+
27 Anto wa lɔkɔ hawotonga l’ekimanyielo;
Vɔ wayondama la wɔma ndo wayoshama nsɔnyi.
Vɔ wayonga oko adiyo wa l’oswe ndo oko adiyo w’ashi wa djɛsɛ,
Oko adiyo wa lo nsambe wamboma la lɔpɛpɛ l’oma lo ɛstɛ.
28 Koko dimi mbeyaka dimɛna wonya wadjasɛyɛ, wonya watombayɛ ndo wonya wɔtɔyɛ,+
Ndo wonya wambudunganɛyɛ la nkɛlɛ,+
Ɔnkɔnɛ dimi layɔkɔhɛ yɔdi yami lo ɛhɛmbɛ ayɛ ndo shingo diami+ lam’asa ɛlɔmɔ ayɛ,
Ko dimi layokokaloya lo mboka koyeyɛ.”
30 “‘Ndo djembetelo nyɛ mbayɛnama lo dikambo diayɛ:* Ɔnɔnyi ɔnɛ, wɛ ayɔlɛ kɛnɛ kayotomba tɔamɛ, ndo ɔnɔnyi wa 2 wɛ ayɔlɛ ntɔngɔ yayotomba yɔamɛ. Koko ɔnɔnyi wa 3, wɛ ayonɛ ntɔngɔ ko wɛ ayona, ndo wɛ ayokamba dikambɔ dia vinyɔ ko wɛ ayɔlɛ elowa w’oma lɔkɔ.+ 31 Ase luudu la Juda wayohandɔ, wanɛ wayotshikala+ wayɔsɔnga edio ndo wayɔtɔ elowa la diko. 32 Nɛ dia atshikadi wayotomba oma la Jɛrusalɛma ndo ehandɔ oma lo Dikona dia Siɔna.+ Ohetoheto wa Jehowa kanga lolembelembe mbayosala dui sɔ.+
33 “‘Ɔnkɔnɛ Jehowa kata lo dikambo dia nkumekanga k’Asuriya ate:+
“Nde hatoya l’osomba ɔnɛ+
Kana mboka lohito lɔkɔ
Kana mbɔlɔsha la engawo
Kana mbika lokombo dia mbodinga.”’+
34 ‘Lo mboka kakandaye kayondokalola;
Nde hatoya l’osomba ɔnɛ,’ mbata Jehowa.
36 Ko ondjelo wa Jehowa akatombe, ko akadiake apami nunu lokama l’akumi enanɛi la tanu (185 000) lo mpango k’ase Asuriya. Lam’aketɔ anto la pindju ka pɛɛ, wɛnyi ko anto tshɛ edo eto.+ 37 Ko Sɛnakɛribɛ nkumekanga k’Asuriya akonɛɛ ndo akakalola otsha la Niniva,+ ko akatotshikala lɛkɔ.+ 38 Lam’akandakusama lo luudu* la Nisirɔkɛ jambizambi yande, anande Adaramɛlɛkɛ nde la Sharɛzɛrɛ wakoodiake la lokuwa la ta,+ ko wakalawɔ otsha l’ɛtshi ka nkɛtɛ ka Ararata.+ Ko ɔnande Esarɛ-Hadɔna+ akayala nkumekanga lo dihole diande.