Jɛrɛmiya
5 Nyokindole lo toshinga ta la Jɛrusalɛma.
Nyende lo emamu ndo nyoshihodia.
Nyoyange ahole ayɔ wa lo sɛkɛ dia menda
Kana nyu koka ntana pami kɛmɔtshi kasala akambo la losembwe,+
Ɔnɛ layanga dia monga la kɔlamelo,
Ko dimi layodimanyiya osomba akɔ.
2 Kaanga naka otowota ɔnɛ: “Lo mɛtɛ oko wele Jehowa la lɔsɛnɔ!”
Vɔ wototshiba lo kashi.+
3 Jehowa le, onde washo ayɛ hawoyange kɔlamelo?+
Wɛ akaakɔmɔla, koko dui sɔ komonga la shɛngiya le wɔ.*
Wɛ akaashile oshiki, koko vɔ wakatone mbetawɔ ohokwelo.+
4 Koko dimi lakate nte: “Lo mɛtɛ, wanɛ wekɔ tombolambola.
Vɔ salaka akambo oko dinginya, nɛ dia vɔ haweye mboka ka Jehowa,
Ɛlɛmbɛ wa Nzambi kawɔ.
5 Dimi layotshɔ le anto wa lokumu ndo layotosawola la wɔ,
Nɛ dia vɔ mbeyaka mboka ka Jehowa,
Ɛlɛmbɛ wa Nzambi kawɔ.+
Koko vɔ tshɛ wakahembola osembe
Ndo wakatambe elelo.”*
6 Diakɔ diele ntambwɛ ka lo okonda mbalɔshaka,
Laondo la lo laandja l’oswe tetemalaka mbashila,
Nkɔi mangemɛka suke la esomba awɔ.
Onto tshɛ latomba oma lɔkɔ mbatshatshemaka.
Nɛ dia kɔlɔ yawɔ yekɔ efula;
Etsha awɔ waha la kɔlamelo wekɔ efula.+
7 Ngande wakokami kodimanyiya dui sɔ?
Anayɛ wakamboke ɔkɔngɔ,
Ndo vɔ tshibaka lo lokombo la kɛnɛ kele bu Nzambi.+
Dimi lakakotsha ehomba awɔ,
Koko vɔ wakatetemalaka nsala loseka,
Ndo vɔ wakalolanɛka lo luudu la kanga numba.
8 Vɔ wekɔ oko mfalasa yalomɔlomɔ, yele la nsaki ka dieyanelo,
Onto l’onto kɔmiyaka wadi a kana.+
9 Jehowa kata ate: “Onde dimi haahombe mbikoya la wɔ l’ɔtɛ w’awui asɔ?”
“Onde dimi* haahombe nsɔmbɔya wodja wa ngasɔ?”+
10 “Nyodee lo ebondo ayɔ washimba menga wa lo ekambɔ ka vinyɔ ndo nyotolanya.
Koko tanyolanyake tshɛ lo tshɛ,+
Nyonya ntahe yawɔ yambosandjɔnɛ,
Nɛ dia yɔ bu ya Jehowa.
11 Nɛ dia luudu la Isariyɛlɛ ndo luudu la Juda
Wakankese mɛtɛ,” mbata Jehowa.+
Ndooko mpokoso kayotokomɛ;
Sho hatotɛna lokuwa la ta kana ndjala ka kasha.’+
13 Amvutshi wambolola la lɔpɛpɛ,
Ndo ɔtɛkɛta* bu le wɔ.
Dui sɔ diawakomee!”
14 Ɔnkɔnɛ, Jehowa Nzambi kanga lolembelembe kata ate:
“Lam’ele anto anɛ wekɔ lo mbuta ngasɔ,
Dimi layanga mbetɛ ɛtɛkɛta ami dja lo onyɔ ayɛ,+
Ndo anto anɛ wekɔ nkunyi,
Ko yɔ yayowatshumba.”+
15 Jehowa kata ate: “Luudu la Isariyɛlɛ le,+ dimi layanga mbela wodja ɔmɔtshi le nyu oma l’etale.
Vɔ wekɔ wodja wambotshikala edja.
16 Mpata kawɔ kekɔ oko diombo dia hwe;
Vɔ tshɛ wekɔ andɔshi w’ata.
17 Vɔ wayolanya dinela dianyu ndo mbo yanyu ya ndɛ.+
Vɔ wayodiaka ananyu w’apami ndo ananyu wa wamato.
Vɔ wayodiaka ɛkɔkɔ anyu ndo ngɔmbɛ yanyu.
Vɔ wayolanya ɛkɔdi anyu wa vinyɔ ndo esongo anyu wa fingo.
Vɔ wayolanya la lokuwa la ta esomba anyu wodingami la mpele wayaɛkɛnyu lɔkɔ.”
18 “Koko kaanga lo nshi shɔ,” mbata Jehowa, “dimi hantonyoshila tshɛ lo tshɛ.+ 19 Ndo etena kayowombola ɔnɛ: ‘Lande na kambotosalɛ Jehowa Nzambi kaso awui anɛ tshɛ?’ kowakadimole wate: ‘Paka oko wakanyansɛkɛ dia ntɛmɔla nzambi kekina lo wodja anyu, mbayonyokambɛ ase wedja lo wodja wele bu wanyu.’”+
20 Nyote dui sɔ lo luudu la Jakɔbɔ,
Ndo nyewoya dui diakɔ la Juda nyate:
21 “Nyohokame dui nɛ, nyu akanga wa dinginya ndo dipɔka:*+
22 Jehowa kata ate: ‘Onde nyu hanyomboke wɔma?
Shi nyu pombaka nsaka lokomba la ntondo kami?
Dimi kakakitsha lɔkɔngɔ oko olelo wa ndjale,
Ɔlɛmbɛ wa pondjo wahakoke tɔ nsekola.
Oyadi asuku atɔ kombɔmbɔka, vɔ hawokoke ndeka wolo;
Oyadi vɔ kodikitaka, vɔ hawotowolekana.+
23 Koko anto anɛ wekɔ la etema wa wolo ndo w’atɔmbɔki;
Vɔ wakatakɔ mboka ko wakatshu lo mboka kawɔ hita.+
24 Ndo vɔ hawote lo etema awɔ ɔnɛ:
“Kakianɛ, nyɛsɔ toke Jehowa Nzambi kaso wɔma,
Ɔnɛ lalɔsha mvula lo eleko katɔ,
Oyadi avula wa alɔhɔki kana avula wa lɔlɔla djɛsɛ,
Ɔnɛ latolamɛ mingu yakashikikɛma dikambo dia dinela.”+
25 Munga yayɛ hita yakashimbe awui asɔ dia vɔ salema;
Pɛkato yayɛ hita yakakodime kɛnɛ kele ɔlɔlɔ.+
26 Nɛ dia anto wa kɔlɔ wekɔ l’atei wa wodja ami.
Vɔ tetemalaka nengɛ oko watɔsɔndjamaka amambi wa tofudu.
Vɔ mambaka djonga yadiaka.
Vɔ mundaka anto.
27 Oko losasa loludi la tofudu,
Mvudu yawɔ ndola la lokeso.+
Diakɔ diayawɔ la wolo w’efula ndo ɛngɔnyi.
28 Vɔ wambonuna ndo waya lengilengi;
Kɔlɔ yawɔ yambotamba elelo;
Vɔ hawɔtɛkɛtɛɛ ɔna etshike+ lo kilombo kande,
Dia vɔ ntondoya;
Ndo vɔ hawosalɛ ase wola akambo la losembwe.’”+
29 Jehowa kata ate: “Onde dimi haahombe mbikoya la wɔ l’ɔtɛ w’awui asɔ?
Onde dimi* haahombe nsɔmbɔya wodja wa ngasɔ?”
30 Dui dimɔtshi dia kɔlɔ ndo dia wɔnɔnyi diambosalema lo wodja:
31 Amvutshi mbewoyaka awui wa kashi,+
Ɛlɔmbɛdi mbahemɛka anto la lowandji lawɔ hita.
Ndo wodja ami hita nangaka awui asɔ.+
Ko kakɔna kayonyosala etena kayoya ekomelo?”