Ɛzɛkiyɛlɛ
43 Oma laasɔ, nde akanɔmbɔla otsha lo soko diɛlane la ɛstɛ.+ 2 Lɛkɔ dimi lakɛnyi lotombo la Nzambi ka Isariyɛlɛ layaye oma lo ɛstɛ+ ndo dui diande diaki oko lohelo l’ashi wambɔmbɔ;+ ndo nkɛtɛ yakahɛtaka esase la lotombo lande.+ 3 Kɛnɛ kakamɛnyi kaki oko ɛnɛlɔ kakamɛnyi lam’akamaye* ndjolanya osomba ndo tɔ kaki oko kɛnɛ kakamɛnyi suke la ɔkɛdi wa Kebara;+ ko dimi lakayakɔsha ekukumadi.
4 Ko lotombo la Jehowa lakɔtɔ lo tɛmpɛlɔ* oma lo soko diɛlane la ɛstɛ.+ 5 Ko nyuma kɛmɔtshi kakambidiya ndo kakantɔlɛ lo sɛkɛ dia l’etei, ko dimi lakɛnyi dia tɛmpɛlɔ kambolola tɔɔ la lotombo la Jehowa.+ 6 Oma laasɔ, dimi lakoke onto ɔmɔtshi atɛkɛta la mi oma lo tɛmpɛlɔ, ko onto akɔ akaye ndo akemala suke la mi.+ 7 Nde akambutɛ ate:
“Ɔna onto, ɔnɛ ekɔ dihole dia kiti kami ka lowandji+ ndo dihole diakitshami akaka ami,+ lɛnɛ ayomodjasɛ l’atei w’ase Isariyɛlɛ pondjo pondjo.+ Luudu la Isariyɛlɛ halotodja lokombo+ lami l’ekila mindo nto, vɔ la nkumi ya dikanga yawɔ, la kinumba kawɔ ka lo nyuma* ndo la edo wa nkumi ya dikanga yawɔ lo nyɔi kawɔ. 8 Lo nsala ɛɔtwɛlɔ kawɔ suke la ɛɔtwɛlɔ kami ndo ekundji kawɔ ka la soko suke la ekundji kami ka la soko, paka ehele keto mbele lam’asami la wɔ,+ vɔ wakadje lokombo lami l’ekila mindo la akambo wa wɔnɔnyi wakawasale, ɔnkɔnɛ dimi lakaashile oshiki lo nkɛlɛ kami.+ 9 Kakianɛ vɔ wanya kinumba kawɔ ka lo nyuma ndo edo wa nkumi ya dikanga yawɔ etale oma le mi, ko dimi layodjasɛ l’atei awɔ pondjo pondjo.+
10 “Wɛ ɔna onto, kɔndɔlɛ luudu la Isariyɛlɛ+ woho wele tɛmpɛlɔ kele kawoke nsɔnyi l’ɔtɛ wa munga+ yawɔ, ndo vɔ pombaka mbeka ekongelo* katɔ. 11 Naka vɔ wamboka nsɔnyi l’ɔtɛ wa kɛnɛ tshɛ kasalawɔ, wɛ pombaka mbaewoya ekongelo ka lo nkɛtɛ ka tɛmpɛlɔ, dikongɛ diatɔ, asoko atɔ ndo mbɔtwɛlɔ+ yatɔ. Kowaɛnya dikongelo diatɔ tshɛ dia lo nkɛtɛ ndo wadjango atɔ, dikongelo diatɔ dia lo nkɛtɛ ndo ɛlɛmbɛ atɔ. Kowafunde la ntondo kawɔ dia vɔ ndjela ekongelo katɔ tshɛ ka lo nkɛtɛ ndo wadjango+ atɔ. 12 Ɔsɔ ekɔ ɔlɛmbɛ wendana la tɛmpɛlɔ. Ɛtshi ka nkɛtɛ k’otondo kodingi shɔdi ya dikona diakɔ kekɔ dihole dioleki ekila.+ Eenda, ɔsɔ ekɔ ɔlɛmbɛ wendana la tɛmpɛlɔ.
13 “Ɔnɛ ele tɛdikɔ ta elambwelo lo kubita+ (kubita tshɛ kakakotshama etambe ka lonya ɔtɔi).* Etshina katɔ kekɔ la kubita 1 ndo kekɔ la woke wa kubita 1. Tɔ kekɔ la ohembo lo otshimbedi w’otondo w’omamu wele la nana* 1 lo woke. Ɔsɔ ekɔ etshina ka elambwelo. 14 Oma l’etshina k’odihe polo lo ehembo wa l’ɛse ekɔ kubita 2, ndo woke adiɔ kubita 1. Oma lo ohembo wa tshitshɛ polo lo ohembo wa woke ekɔ kubita 4 ndo woke adiɔ ekɔ kubita 1. 15 Dihole diakitshama dja lo elambwelo ekɔ la tanga dia kubita 4 ndo nseke+ 4 tombaka la diko dia elambwelo. 16 Dihole diakitshama dja lo elambwelo kekɔ la atshuku 4 wɛdimi, kubita 12 l’otale ndo kubita 12 lo woke.+ 17 Bɛkɛ 4 dia lo ehembo wa l’omamu diekɔ la kubita 14 l’otale ndo kubita 14 lo woke; ndo ehembo wodingi wekɔ k’ahende ɔtɔi ka kubita ndo etshina katɔ kekɔ la kubita 1 lo bɛkɛ tshɛ.
“Ndo wadelo adiɔ mbɛlɛ otsha lo ɛstɛ.”
18 Oma laasɔ, nde akambutɛ ate: “Ɔna onto, Nkum’Olongo Nkumadiɔndjɔ Jehowa kata ate: ‘Ɔnɛ ele ɛlɔmbwɛlɔ kahomba ndjela etena kayosalema elambwelo, dia elambo wa lotshumba w’etondo nambɔma ndo dikila mɔngama lɔkɔ.’+
19 “‘Kokimɔ ɔsɔngɔ wa ngɔmbɛ w’omi oma lo ngɔmbɛ yayɛ oko olambo wa pɛkato+ le ɛlɔmbɛdi wele ase Lɛwi, ana wa Zadɔka+ wayasukanya la mi dia kambɛmi,’ mbata Nkum’Olongo Nkumadiɔndjɔ Jehowa. 20 ‘Kɔshi yema ya dikila diatɔ kele kokite lo nseke 4 ya lo elambwelo, lo atshuku 4 w’ohembo wokidingi ndo l’emamu wa lo wedi akɔ tshɛ, dia kiɛdia oma lo pɛkato ndo dia nkomba pɛkato dikambo diatɔ.+ 21 Oma laasɔ, kɔshi ɔsɔngɔ wa ngɔmbɛ k’omi, olambo wa pɛkato dia kitshumba lo dihole diakasɔnama dia lo tɛmpɛlɔ, l’andja wa tɛmpɛlɔ.+ 22 Lushi la 2 kokimɔ wombe a mbudi waha la ɛkɔmɔ oko olambo wa pɛkato; ko vɔ wayɛdia elambwelo oma lo pɛkato oko wakawakiɛdia oma lo pɛkato la ɔsɔngɔ wa ngɔmbɛ k’omi.’
23 “‘Lam’ayoyoshidiya kiɛdia oma lo pɛkato, kokimɔ ɔsɔngɔ wa ngɔmbɛ k’omi waha la ɛkɔmɔ oma lo ngɔmbɛ yayɛ ndo ɔkɔkɔ w’omi waha la ɛkɔmɔ oma lo ɛkɔkɔ ayɛ. 24 Koye la yɔ la ntondo ka Jehowa, ndo ɔlɔmbɛdi pombaka ndjitɛ lɛɛhɔ+ ko nde ndjilambola oko olambo wa lotshumba w’otondo le Jehowa. 25 L’edja ka nshi 7, wɛ ayolambolaka wombe a mbudi oko olambo wa pɛkato+ wa lushi la lushi, mbidja ndo ɔsɔngɔ wa ngɔmbɛ k’omi oma lo ngɔmbɛ yayɛ ndo ɔkɔkɔ w’omi oma lo ɛkɔkɔ ayɛ; kokimɔ nyama yaha la ɛkɔmɔ.* 26 L’edja ka nshi 7, vɔ wayohomba nkomba pɛkato dikambo dia elambwelo ndo vɔ pombaka kiɛdia ndo kietɛ suke dia nkamba la tɔ. 27 Lam’ayoshila nshi yakɔ, lushi la 8+ ndo l’ɔkɔngɔ wa laasɔ, ɛlɔmbɛdi wayolambola elambo anyu* wa lotshumba w’etondo ndo elambo w’osanga lo elambwelo kakɔ; ko dimi layonyɔngɛnangɛna,’+ mbata Nkum’Olongo Nkumadiɔndjɔ Jehowa.”