Danyɛlɛ

4 “Nkumekanga Nɛbukadinɛza ambotɛ anto tshɛ, wedja tshɛ ndo elui w’ɛtɛkɛta tshɛ wadjasɛ lo nkɛtɛ k’otondo ɔnɛ: Wɔladi anyu wayale efula. 2 Dimi lekɔ l’ɔngɛnɔngɛnɔ dia mbewoya tolembetelo ndo akambo wa diambo wakansalɛ Nzambi Kaheme-Tshɛ. 3 Ande woke wele tolembetelo tande ndo wolo wele la akambo ande wa diambo lee! Diolelo diande diekɔ diolelo dia pondjo ndo lowandji lande lekɔ lo lɔlɔnga la lɔlɔnga.+

4 “Dimi Nɛbukadinɛza laki ki lo luudu lami ndo lakatangɔnaka lo luudu lami la nkumekanga. 5 Dimi lakɛnyi dɔ diakambokiya wɔma. Lam’akametama lo mbeto kami, esato ndo waɛnɛlɔ wa lo ɔtɛ ami wakambokiya wɔma.+ 6 Ko dimi lakadjanga dia vɔ mbela la ntondo kami ase tomba tshɛ wa la Babilɔna dia vɔ mbewoyami kitshimudi ya dɔ diakɔ.+

7 “L’etena kɛsɔ, ɛlɔmbɛdi wakasalaka awui wa maji, asaki w’awolo, ase Kaladiya,* ambeyi w’akambo wa tɔɔtɔ+ wakɔtɔ. Lam’akamawatɛ dɔ diakɔ, vɔ kokoka mbewoyami kitshimudi yadiɔ.+ 8 L’ekomelo, wakela la ntondo kami Danyɛlɛ lelamɛ Bɛlɛtɛshaza+ lo ndjela lokombo la nzambi+ kami, nde lele nyuma ka nzambi+ y’ekila kekɔ le nde, ko lakawotɛ dɔ diakɔ nte:

9 “‘Wɛ Bɛlɛtɛshaza, owandji wa ɛlɔmbɛdi wasala awui wa maji+ le, dimi mbeyaka dimɛna dia nyuma ka nzambi y’ekila kekɔ le yɛ+ ndo ndooko sheke yele wolo efula le yɛ.+ Ɔnkɔnɛ onembetshiya waɛnɛlɔ wakamɛnyi lo dɔ diami ndo kitshimudi yawɔ.

10 “‘Lo waɛnɛlɔ wa lo ɔtɛ ami etena kakimi lo mbeto kami, dimi lakɛnyi osongo+ ɔmɔtshi l’atei wa nkɛtɛ ndo vɔ waki otale wa mamba.+ 11 Osongo akɔ wakole ndo wakakome wolo ndo shɔdi yawɔ yakakome polo l’olongo, ndo vɔ wakɛnamaka lo tokoma tshɛ ta nkɛtɛ. 12 Akatshi awɔ waki amɛna efula, elowa awɔ wakafulanɛ ndo mbo ya ndɛ yaki lɔkɔ dikambo dia ditongami tshɛ. Nyama ya l’okonda yakayangaka dɛdi l’ɛse kawɔ, tofudu ta l’olongo takadjasɛka lo ntahe yawɔ, ndo ditongami* tshɛ diakaleshamaka oma lɔkɔ.

13 “‘Lam’akamɛnaka waɛnɛlɔ wa lo ɔtɛ ami etena kakimi lo mbeto kami, dimi lakɛnyi djamu, okilami ɔmɔtshi ayaholɔ oma l’olongo.+ 14 Nde akawelɛ la dui dia wolo ate: “Nyɔkɔtɛ osongo+ akɔ, nyohembole ntahe yawɔ, nyoninginya akatshi awɔ ndo nyohandjole elowa awɔ! Nyama ya l’okonda yalawɔ oma l’ɛse kawɔ ndo tofudu oma lo ntahe yawɔ. 15 Koko nyotshike ehekele la edio awɔ* lo nkɛtɛ, ndo nyokikeleke mɔlɔla wa lowolo ndo wa nkonga l’atei w’adiyo wa l’oswe. Tɔ kalɔyamake la lɔpɔpɔ l’oma l’olongo, ndo katshikale kaamɛ la nyama l’atei w’adiyo wa la nkɛtɛ.+ 16 Otema ande wamɔ otema w’onto ndo wawosha otema wa nyama, ndo tena 7+ diawetee.+ 17 Dui sɔ diekɔ lo ndjela didjango dia todjamu+ ndo kɛnɛ kakalɔmbama kekɔ lo ndjela ɔtɛkɛta w’ekilami, dia anto wasɛna mbeya dia Ɔnɛ-Laheme-Tshɛ ekɔ Omboledi lo diolelo di’anto+ ndo nde dishaka onto tshɛ lalangande, ndo nde mbahɛka kaanga onto loleki l’ɛse* l’atei w’anto laadiko diadiɔ.”

18 “‘Ɔsɔ mbaki dɔ diakamɛnyi dimi nkumekanga Nɛbukadinɛza; kakianɛ, wɛ Bɛlɛtɛshaza ombute kitshimudi yadiɔ, nɛ dia ase tomba akina tshɛ wa lo diolelo diami bu la akoka wa mbewoyami kitshimudi yadiɔ.+ Koko wɛ ekɔ la akoka wa nsala dui sɔ, nɛ dia nyuma ka nzambi y’ekila kekɔ le yɛ.’

19 “L’etena kakɔ, Danyɛlɛ lelamɛ Bɛlɛtɛshaza+ akatshimbe wɔɔngɔ lo tshanda mɔtshi ndo tokanyi tande takatatɛ mbookiya wɔma.

“Nkumekanga akate ate: ‘Bɛlɛtɛshaza le, tetawɔke dia dɔ la kitshimudi yadiɔ kookiya wɔma.’

“Bɛlɛtɛshaza akakadimola ate: ‘Nkumɛmi le, dɔ diakɔ diendane la wanɛ wakohetsha ndo kitshimudi yadiɔ le atunyi ayɛ.

20 “‘Osongo wakayɛnyi wakakome woke ndo wolo, wele shɔdi yawɔ yakakome polo l’olongo ndo yakɛnamaka lo nkɛtɛ+ k’otondo, 21 wele akatshi awɔ waki amɛna efula, wele elowa awɔ wakafulanɛ ndo waki la mbo ya ndɛ dikambo dia ditongami tshɛ, wakadjasɛka nyama ya l’okonda l’ɛse kawɔ ndo wele tofudu ta l’olongo takadjasɛka+ lo ntahe yawɔ, 22 ekɔ wɛ nkumekanga, nɛ dia wɛ ambohama woke ndo wolo, ndo woke woke ayɛ wambohama ndo wambokoma polo l’olongo+ ndo lowandji layɛ polo lo tokoma ta nkɛtɛ.+

23 “‘Ko nkumekanga akɛnyi djamu, okilami+ ɔmɔtshi ayaholɔ oma l’olongo ayate ate: “Nyɔkɔtɛ osongo akɔ ndo nyoolanya, koko nyotshike ehekele kawɔ la edio awɔ* lo nkɛtɛ, kokelekami la mɔlɔla wa lowolo ndo wa nkonga l’atei w’adiyo wa l’oswe. Ndo nyotshike dia lɔpɔpɔ l’oma l’olongo kilɔyaka ndo katshikale kaamɛ la nyama ya l’okonda polo ndo tena 7 diambowetɛ.”+ 24 Nkumekanga le, kitshimudi yɔ nyɛ: Ɔsɔ ekɔ didjango diaki Ɔnɛ-Laheme-Tshɛ diahomba nkomɛ nkumɛmi nkumekanga. 25 Wɛ ayotshanyema oma l’atei w’anto, ndo wɛ ayotodjasɛ kaamɛ la nyama ya l’okonda, ndo wayokosha adiyo dia wɛ ndɛka oko ngɔmbɛ ndo wɛ ayɔlɔyamaka la lɔpɔpɔ l’oma l’olongo,+ ndo tena 7+ diayoketɛ,+ polo ndo wɛ ambeya dia Ɔnɛ-Laheme-Tshɛ ekɔ Omboledi lo diolelo di’anto ndo nde dishaka onto tshɛ lalangande.+

26 “‘Koko lam’ele wakate dia ntshika ehekele k’osongo kaamɛ la edio awɔ,*+ diolelo diayɛ diayonga diayɛ nto l’ɔkɔngɔ wa wɛ mbeya dia olongo kolɛ. 27 Ɔnkɔnɛ, nkumekanga le, dako diami dietawɔme le yɛ. Kadimɔ oma lo pɛkato yayɛ lo nsala kɛnɛ kele ɔlɔlɔ, ndo oma lo munga yayɛ lo mboka ase wola kɛtshi. Mbeyaka monga ko lɔsɛnɔ layɛ la dimɛna layotaloyama.’”+

28 Awui asɔ tshɛ wakakomɛ nkumekanga Nɛbukadinɛza.

29 Ngɔndɔ 12 l’ɔkɔngɔ, nde akatetetaka lo tshoto ya luudu la nkumekanga ka Babilɔna. 30 Nkumekanga akataka ate: “Shi ɔnɛ ekɔ Babilɔna ka Woke kakamake dimɛ dikambo dia luudu la nkumekanga oma lo wolo ndo nkudu kami hita ndo dikambo dia lotombo la lɔnɛnɛ lami?”

31 Etena kakatɛkɛtaka nkumekanga, dui diakaye oma l’olongo ɔnɛ: “Wɛ nkumekanga Nɛbukadinɛza, wɛ katɛwɔ ɔnɛ: ‘Diolelo diambomɔ oma le yɛ,+ 32 ndo wɛ ayanga mbitshanyema oma l’atei w’anto. Wɛ ayotodjasɛ kaamɛ la nyama ya l’okonda, ndo wayokosha adiyo dia wɛ ndɛka oko ngɔmbɛ ndo tena 7 diayoketɛ, polo ndo wɛ ambeya dia Ɔnɛ-Laheme-Tshɛ ekɔ Omboledi lo diolelo di’anto ndo nde mbishaka onto tshɛ lalangande.’”+

33 L’etena kɛsɔ ɔtɛkɛta akɔ wakakotshama le Nɛbukadinɛza. Nde akatshanyema oma l’atei w’anto, ko nde akatatɛ ndɛ adiyo oko ngɔmbɛ ndo demba diande diakalɔyamaka la lɔpɔpɔ l’oma l’olongo polo ndo divo diande diambodɔ oko nsala ya mpongo ndo nkala+ yande oko ya tofudu.

34 “L’ekomelo k’etena+ kɛsɔ, dimi Nɛbukadinɛza lakaalɛ l’olongo ndo yimba yami yakakalola le mi; ko dimi lakatombola Ɔnɛ-Laheme-Tshɛ, ndo lakasha Ɔnɛ lasɛna pondjo pondjo diando la lotombo, nɛ dia lowandji lande lekɔ lowandji la pondjo ndo diolelo diande diekɔ lo lɔlɔnga la lɔlɔnga.+ 35 Anto tshɛ wodjashi la nkɛtɛ mbɔsamaka oko anyanya, ndo nde salaka akambo lo ndjela lolango lande l’atei wa alembe wa l’olongo ndo anto wodjashi la nkɛtɛ. Ndooko onto lakoka mboshimba*+ kana mbombola ɔnɛ: ‘Kakɔna kamboyosala?’+

36 “L’etena kɛsɔ yimba yami yakakalolɛ ndo lotombo la diolelo diami, lɔnɛnɛ lami ndo woke woke ami wakakalolɛ.+ Ɛlɔhɛ ami wa laadiko ndo ɛnɛnɛ ami wakanyange la waasaso, ndo dimi lakakaloyama lo diolelo diami, ndo wakakotshɛ woke woke laadiko dia wɔnɛ waki la mi.

37 “Kakianɛ, dimi Nɛbukadinɛza lekɔ lo mandola, mbidiya ndo ntombola Nkumekanga ka l’olongo,+ nɛ dia elimu ande tshɛ wekɔ mɛtɛ ndo mboka yande tshɛ yekɔ esembɔki,+ ndo nɛ dia nde ekɔ la akoka wa mbisha wanɛ wakɛndakɛnda la lotamanya+ nsɔnyi.”