Danyɛlɛ
7 Lo ɔnɔnyi wa ntondo w’ɛlɔmbwɛlɔ ka Bɛlɛshaza+ nkumekanga ka Babilɔna, Danyɛlɛ akɛnyi dɔ ndo waɛnɛlɔ wa l’ɔtɛ ande etena kakandetama lo mbeto+ kande. Ko nde akafunde dɔ+ diakɔ; nde akafunde ɔkɔndɔ w’otondo wendana la akambo akɔ. 2 Danyɛlɛ akate ate:
“Dimi lakendaka lo waɛnɛlɔ ami l’otsho, mɛnyi ko mpɛpɛ 4 ya l’olongo yakapɛpaka lo ndjale ka woke.+ 3 Ndo nyama 4 ya weke+ yakatombe oma lo ndjale, nyama la nyama kakatshikitana la nkina.
4 “Nyama ka ntondo kaki oko ntambwɛ+ ndo tɔ kaki la ahafu oko mpongo.+ Dimi lakendaka polo lam’akanyema ahafu atɔ ndo tɔ kakadiyama oma la nkɛtɛ ndo kakemadiama lo ekolo atɔ 2 oko onto, ndo wakakisha otema w’onto.
5 “Mɛnyi ko nyama kekina, ka 2 kaki oko laondo.+ Tɔ kakadiyama lo wedi ɔmɔtshi ndo mpandju 3 yaki l’onyɔ atɔ lam’asa wanyu atɔ; ndo wakakitɛ vate: ‘Onɛɛ, lɛka emunyi+ efula.’
6 “L’ɔkɔngɔ wa laasɔ, dimi lakatetemala menda, mɛnyi ko nyama kekina kele oko nkɔi,+ koko ɔkɔngɔ atɔ waki la ahafu 4 oko ahafu wa fudu. Ndo nyama kakɔ kaki la ɛtɛ+ 4 ndo wakakisha lowandji la mbolɛ.
7 “L’ɔkɔngɔ wa laasɔ, dimi lakatetemala menda lo waɛnɛlɔ l’otsho, mɛnyi ko nyama ka 4 ka wɔma ndo kokiya wɔma wa mamba kaki la wolo wa laande ndo kaki la abakata wa wanyu wa mbolo. Tɔ kakalɛka, kakatɛtshatɛtshaka ndo kakahɔtshahɔtshaka kɛnɛ kakatshikalaka la ekolo+ atɔ. Tɔ kakatshikitana la nyama nkina tshɛ yaki la ntondo katɔ ndo kaki la nseke 10. 8 Etena kakamendaka nseke, mɛnyi ko loseke lokina la tshitshɛ,+ layatombe l’atei ayɔ ndo nseke 3 ya lo nseke ya ntondo yakɔɔkɔ la ntondo kalɔ. Ndo mɛnyi ko washo wele oko w’onto lo loseke lakɔ ndo onyɔ wakatɛkɛtaka la otako tshɛ.*+
9 “Dimi lakatetemala menda polo lam’akakitshama kiti ya lowandji ko Tango Andja+ akadjasɛ.+ Ahɔndɔ ande wakikɔ wɛma oko loonge l’ekama ndo divo dia l’ɔtɛ ande diakikɔ oko wɛɔsa wa wɛma fifɔ.+ Kiti kande ka lowandji kaki nyombe ya dja; ndo etshimbi atɔ wakahɛtaka dja.+ 10 Ɔkɛdi wa dja wakakɛlaka ndo wakatombaka la ntondo kande.+ Nunu nunu wakatetemalaka mbokambɛ ndo nunu dikumi (10 000) mbala nunu dikumi (10 000) wakemala la ntondo kande.+ Tominadi+ takatatɛ ndo abuku wakafɔma.
11 “Dimi lakatetemala menda l’etena kɛsɔ l’ɔtɛ wa londjo la ɛtɛkɛta wa la otako* tshɛ wakatɛkɛtaka+ loseke; dimi lakatetemala menda polo lam’akadiakema nyama kakɔ ndo lam’akalanyema demba diatɔ ko tɔ kakakimɔma dia tshumbama lo dja. 12 Koko wakakɔsɔla nyama+ nkina lowandji layɔ ndo nsɛnɔ yayɔ yakataloyama etena 1 ndo eleko 1.
13 “Dimi lakatetemala menda lo waɛnɛlɔ wa l’otsho, mɛnyi ko onto ɔmɔtshi lele oko ɔna onto+ ayaye kaamɛ la wange wa l’olongo; ko nde akakondja lotshungɔ la nkoma le Tango Andja,+ ko wakoosukanya la ntondo Kande. 14 Ko wakawosha lowandji,+ kɛnɛmɔ+ ndo diolelo, dia anto, wedja ndo elui w’ɛtɛkɛta tshɛ mbokambɛ.+ Lowandji lande lekɔ lowandji la pondjo lahateta ndo diolelo diande hadiotolanyema.+
15 “Lo kɛnɛ kendana la mi dimi Danyɛlɛ, yimba yami yakatshimbe l’etei kami, nɛ dia waɛnɛlɔ wa lo ɔtɛ ami wakambokiya wɔma.+ 16 Dimi lakatshu suke la onto ɔmɔtshi l’atei wa wanɛ wakemala lɛkɔ dia towombola kitshimudi ya mɛtɛ ya dikambo nɛ. Ko nde akankadimola ndo akambewoya kitshimudi y’akambo akɔ ate:
17 “‘Nyama ya weke yakɔ yekɔ+ nkumi ya dikanga 4 yayotomba oma la nkɛtɛ.+ 18 Koko ekilami wa Omboledi-Waheme-Tshɛ+ wayolongola diolelo+ ndo wayokondja diolelo+ pondjo, ɛɛ, pondjo pondjo.’
19 “Ko dimi lakalange nyomeya akambo akina wendana la nyama ka 4 kakatshikitana la nkina tshɛ; tɔ kakokiyaka wɔma wa mamba, kaki la wanyu wa mbolo ndo la nkala ya nkonga, tɔ kakalɛka ndo kakatɛtshatɛtshaka ndo kakahɔtshahɔtshaka la ekolo+ atɔ kɛnɛ kakatshikala; 20 ndo dikambo dia nseke+ 10 yele lo ɔtɛ atɔ ndo loseke lokina lakatombe ndo lele nseke 3 yakɔɔkɔ+ la ntondo kalɔ, loseke laki la washo ndo la onyɔ wakatɛkɛtaka la otako* tshɛ ndo lele ɛnamelo kalɔ kaki woke efula ndeka nkina.
21 “Dimi lakatetemala menda etena kakalɔshaka loseke lakɔ ekilami, ko lɔ lakaaleke wolo,+ 22 edja ndo lam’akaye Tango Andja+ ndo lam’akandasambola lo wahɔ wa ekilami wa Omboledi-Waheme-Tshɛ,+ ndo lam’akakoke etena kakashikikɛma dia ekilami mbɔsa diolelo.+
23 “Kɛnɛ kakandate tɔ kɛnɛ: ‘Nyama ka 4 ekɔ diolelo dia 4 diayoya la nkɛtɛ. Diɔ diayotshikitana la waolelo akina tshɛ, diayɔlɛ nkɛtɛ k’otondo ndo diayokihɔtshahɔtsha ndo diayokitɛtshatɛtsha.+ 24 Nseke 10 ele nkumi ya dikanga 10 yayotomba oma lo diolelo diakɔ; koko kekina nto kayotomba l’ɔkɔngɔ awɔ, ndo nde ayotshikitana la nyɛ ya ntondo, ndo nde ayosha nkumi ya dikanga+ 3 nsɔnyi. 25 Nde ayɔtɛkɛta kɔlɔ lo dikambo dia Ɔnɛ-Laheme-Tshɛ+ ndo ayotetemala mpɛnyahɛnya ekilami wa Omboledi-Waheme-Tshɛ. Nde ayoyanga dia ntshikitanya tena ndo ɛlɛmbɛ ko vɔ wayokimɔma lo anya ande dikambo dia etena, tena ndo k’ahende ɔtɔi k’etena.*+ 26 Koko Tominadi takatatɛ, ko vɔ wakɔkɔsɔla lowandji lande, l’oyango wa mboshila oshiki ndo mbolanya tshɛ lo tshɛ.+
27 “‘Ko diolelo ndo lowandji ndo lɔnɛnɛ la waolelo wele l’ɛse olongo tshɛ wakakimɔma le anto wele ekilami wa Omboledi-Waheme-Tshɛ.+ Diolelo diawɔ diekɔ diolelo+ dia pondjo ndo mandji tshɛ yayowakambɛ ndo yayowakitanyiya.’
28 “Ɔsɔ kele ekomelo ka dikambo. Koko dimi Danyɛlɛ, tokanyi tami takapɛnyahɛnya wolo ko elungi kami kakakasɔ;* koko dimi lakatetemala nama dui sɔ lo otema ami.”