Ɛnyɛlɔ

15 Ko dimi lakɛnyi djembetelo kina ya woke ndo ya diambo l’olongo: Andjelo+ 7 waki l’asui 7. Ɔsɔ mbele asui w’ekomelo, nɛ dia lo tshimbo yawɔ mbayokoma nkɛlɛ ka Nzambi lo kondoko yatɔ.+

2 Ndo dimi lakɛnyi ɛngɔ kaki oko ndjale kele oko talatala+ kɔsɔhanyemi la dja, ndo wanɛ wakalɛndja+ nyama ka ngala la efanelo katɔ+ ndo numɛlɔ ka lokombo latɔ+ wakemala suke la ndjale kele oko talatala wokime nsɛsɛ yaki Nzambi. 3 Vɔ wakembaka osambo wa Mɔsɛ+ okambi wa Nzambi ndo osambo wa Ɔna Ɔkɔkɔ,+ wata vate:

“Jehowa* Nzambi Kanga-Wolo-Tshɛ+ le, ande etsha ayɛ+ weke ndo diambo lee! Mboka yayɛ+ yekɔ losembwe ndo mɛtɛ, wɛ Nkumekanga ka pondjo.+ 4 Jehowa* le, akɔna mɛtɛ ahatokooka wɔma ndo ahatotombola lokombo layɛ, lam’ele wɛmɛ oto kele la kɔlamelo?+ Nɛ dia wedja tshɛ wayoya ndo wayɔtɛmɔlaka la ntondo kayɛ+ dikambo etsha ayɛ wosembwe wambɛnama.”

5 L’ɔkɔngɔ wa laasɔ, dimi lakɛnyi dihole di’ekila dia lo luudu la dipɛma l’ɔmɛnyi+ lakadihɔma l’olongo,+ 6 ndo andjelo 7 waki l’asui+ 7 wakatombe oma lo tɛmpɛlɔ k’ekila wɔlɔtshi ahɔndɔ wa pudipudi, wa linɛnɛ ndo wa ngaingai ndo wɔlɔtshi eya wa paonyi lo ntolo yawɔ. 7 Etongami kɛmɔtshi ka lo ditongami 4 diasɛna akasha andjelo 7 alɔnga 7 wa paonyi wakalole tɔɔ la nkɛlɛ ka Nzambi,+ ɔnɛ lasɛna pondjo pondjo. 8 Ko tɛmpɛlɔ k’ekila kakalole l’edinga l’ɔtɛ wa lotombo la Nzambi+ ndo l’ɔtɛ wa wolo ande, ndo ndooko onto lakakoke mbɔtɔ lo tɛmpɛlɔ k’ekila polo lam’akashile asui+ 7 w’andjelo 7.