Ɛnyɛlɔ

9 Ondjelo wa 5 akade dimama diande.+ Ko dimi lakɛnyi yɔɔtɔ yakakɔ oma l’olongo oya la nkɛtɛ, ko wakawosha nsapi ka difuku diaha l’ekomelo.+ 2 Nde akadihola difuku diaha l’ekomelo, ko edinga wakatombe oma lo difuku diakɔ oko edinga w’oma lo nkuka ka woke, ko wonya kaamɛ ndo lɔpɛpɛ wakayala wodjima+ l’ɔtɛ w’edinga w’oma lo difuku. 3 Ko akata w’ɛndjɔ wakatombe oma l’edinga akɔ oya laadiko dia nkɛtɛ+ ndo wakawasha wolo, woho wa wolo wele la nkoto ya la nkɛtɛ. 4 Wakawatɛ diaha vɔ salɛ tombatomba dia la nkɛtɛ kana adiyo kana esongo kɔlɔ, onyake paka anto wele bu la djembetelo y’oma le Nzambi lo mfumu yawɔ.+

5 Wakasha akata w’ɛndjɔ asɔ wolo, aha wa mbadiaka, koko wa mbahɛnyahɛnya l’edja ka ngɔndɔ 5, ndo sui diawɔ diaki oko sui di’oma le nkoto+ etena kakɔmatɔ onto. 6 Lo nshi shɔ, anto wayoyanga nyɔi, koko hawotokitana ndo vɔ hawotovɔ ndo nyɔi kayowalawɔ.

7 Ndo akata w’ɛndjɔ akɔ waki la ɛnamelo kele oko ka mfalasa yambɔlɔngɔsɔma dikambo dia ta+ ndo diangɔ diele oko alɛmbɔ wa nkoso wele oko wa paonyi diaki l’ɛtɛ awɔ ndo dungi diawɔ diaki oko dungi di’anto. 8 Koko, vɔ waki la divo diele oko divo dia wamato ndo wanyu awɔ waki oko wanyu wa ntambwɛ.+ 9 Vɔ waki la dingawo diele oko dingawo dia mbolo. Lohelo l’ahafu awɔ laki oko lohelo la mfalasa yatakotola pusupusu la lowango otsha lo ta.+ 10 Ndo nto, vɔ waki la wela ndo la waanga wele oko wa nkoto, ndo lo wela awɔ mbaki wolo wa salɛ anto kɔlɔ l’edja ka ngɔndɔ 5.+ 11 Ondjelo wa difuku diaha l’ekomelo+ kele nkumekanga kawɔ. Lo Hɛbɛru lokombo lande ele Abadɔna,* koko lo Grɛkɛ lokombo lande ele Apoliyɔna.*

12 Mananu 1 kambeta. Hokamɛ! Mananu+ nkina 2 yekɔ lo ndjaye l’ɔkɔngɔ w’akambo anɛ.

13 Ondjelo+ wa 6 akade dimama diande.+ Ko dimi lakoke dui oma lo nseke yele lo elambwelo+ ka paonyi kele la ntondo ka Nzambi 14 diatɛ ondjelo wa 6 waki la dimama ate: “Kelekola andjelo 4 wokelekami suke la ɔkɛdi wa woke w’Efarata.”+ 15 Ko andjelo akɔ 4 wakakelekɔma, wɔlɔngɔswami dikambo dia wonya, lushi, ngɔndɔ ndo ɔnɔnyi dia ndjaka k’asato ɔtɔi k’anto.

16 Dimi lakoke dia lofulo l’asɔlayi w’ambahemi wa mfalasa laki nunu akumi dia nunu akumi mbala hiende.* 17 Ndo dimi lakɛnyi lo ɛnɛlɔ mfalasa la wanɛ wakayiahema aki nganɛ: Ambahemi wa mfalasa waki la dingawo dia beela oko dja ndo bule ndo ɛndɔndɔ kele oko mbɔkɔ ya dja. Ɛtɛ wa mfalasa waki oko ɛtɛ wa ntambwɛ+ ndo dja la edinga la mbɔkɔ ya dja yakatombaka oma l’enyɔ ayɔ. 18 La mfɔnu 3 shɔ, k’asato ɔtɔi k’anto wakadiakema la dja, l’edinga ndo la mbɔkɔ ya dja yakatombaka oma l’enyɔ ayɔ. 19 Wolo wa mfalasa yakɔ waki l’enyɔ ayɔ ndo lo wela ayɔ, nɛ dia wela ayɔ waki oko eloyi ndo waki la ɛtɛ, ndo la ɛtɛ akɔ mbakawasalɛka anto kɔlɔ.

20 Koko, anto akina waki kondjakema la mfɔnu shɔ kondjatshumoya oma lo etsha w’anya awɔ, vɔ kotshika ntɛmɔla ɛdiɛngɛ la dikishi dia paonyi ndo dia mfɛsa ndo dia nkonga ndo di’ave ndo di’esongo diahakoke mɛna, diahakoke mboka ndo diahakoke nkɛndakɛnda.+ 21 Ndo vɔ kondjatshumoya oma lo woho wakawadiake anto ndo l’ɔtɛ wakawasalaka awui w’ɛdiɛngɛ ndo l’ɔtɛ w’awui awɔ wa mindo wa dieyanelo* ndo l’ɔtɛ wakawavaka.