1 Samuɛlɛ

14 Lushi lɔmɔtshi, Jɔnatana+ ɔna Saolo akatɛ okambi wakawɛmbɛka dihomɔ dia ta ate: “Yete totshu, totenyanya otsha le alami wa mpango k’ase Filistiya wele lo wedi okina.” Koko nde kombutɛ she dui sɔ. 2 Saolo aki lo omamu wa Ngibɛa+ l’ɛse k’osongo wa pɔmɛgranatɛ la Mingirɔna, ndo apami oko 600 waki kaamɛ la nde.+ 3 (Ahidja ɔna Ahitubɛ+ ɔnango Ikabɔda+ ɔna Finehasi+ ɔna Eli+ ɔlɔmbɛdi wa Jehowa wa la Shilo+ akatɛmbaka efodɛ.)+ Anto kombeya dia Jɔnatana ambotshɔ. 4 Lam’asa mboka kakayangaka Jɔnatana ntenyanya dia nkoma lɛnɛ aki alami wa mpango k’ase Filistiya, dive dimɔtshi diele oko nnu diaki lo wedi ɔmɔtshi ndo dive dikina diele oko nnu lo wedi okina. Dimɔtshi lokombo ladiɔ Bɔzɛzɛ ndo dikina lokombo ladiɔ Sɛnɛ. 5 Dive dimɔtshi diakemala oko ekundji lo nɔrdɛ, mbɛlanɛ la Mikimashɛ ndo dikina diaki lo sidɛ, mbɛlanɛ la Ngɛba.+

6 Ko Jɔnatana akatɛ ɔmɛmbi ande wa dihomɔ dia ta ate: “Yete totenyanya otsha le alami wa mpango k’apami waki kominya mpota+ anɛ. Ondo Jehowa ayotokimanyiya, nɛ dia ndooko kakoka nshimba Jehowa dia nde nshimbɛ lo tshimbo y’anto efula kana y’anto angana ato.”+ 7 Ko ɔmɛmbi ande wa dihomɔ dia ta akawotɛ ate: “Sala kɛnɛ tshɛ kakotoma otema ayɛ. Tshɔka lɛnɛ tshɛ alangayɛ, dimi layokoyela lɛnɛ tshɛ ayokotoma otema ayɛ.” 8 Ko Jɔnatana akate ate: “Tayanga ntenyanya otsha le apami ango ndo tayanga ndjashola le wɔ. 9 Naka vɔ wambototɛ vate: ‘Nyemale lengo sho ango ayaye le nyu!’ sho tayemala lam’eso ndo hatotodɛ otsha le wɔ. 10 Ko naka wambota vate: ‘Nyoye nyoyotɔlɔsha,’ tayodɛ nɛ dia Jehowa ayowakimɔ lo anya aso. Ɔsɔ kayonga djembetelo+ yaso.”

11 Ko vɔ akɔ 2 wakayatondja la ntondo k’alami wa mpango k’ase Filistiya. Ase Filistiya wakate vate: “Ohonyenda, ase Hɛbɛru woyatombe oma lo afuku wakawayashɛ.”+ 12 Ko alami wa mpango wakatɛ Jɔnatana nde l’ɔmɛmbi ande wa dihomɔ dia ta vate: “Nyode lendo kele toyonyosha wetshelo!”+ Mbala kakɔ ɔtɔi, Jɔnatana akatɛ ɔmɛmbi ande wa dihomɔ dia ta ate: “Ondjele, nɛ dia Jehowa ayowakimɔ lo anya w’Isariyɛlɛ.”+ 13 Ko Jɔnatana akadɛ la anya ande ndo la ekolo ande, ndo ɔmɛmbi ande wa dihomɔ dia ta aki l’ɔkɔngɔ ande. Ase Filistiya wakatatɛ nkɔ la ntondo ka Jɔnatana, ko ɔmɛmbi ande wa dihomɔ dia ta akayawadiakaka l’ɔkɔngɔ ande. 14 Mbala ka ntondo kakalɔsha Jɔnatana nde l’ɔmɛmbi ande wa dihomɔ dia ta, wakadiake apami oko 20 lo k’ahende ɔtɔi k’ɛtshi ka nkɛtɛ kakoka ngɔmbɛ bondola lo lushi.

15 Ko wɔma wakakokanɛ lo mpango ndo le alami tshɛ wa mpango; kaanga olui wa dengalenga+ wakoke wɔma. Nkɛtɛ yakatatɛ didima ndo wɔma w’oma le Nzambi wakawande. 16 Todjamu taki Saolo ta la Ngibɛa+ ka Bɛnjamina wakɛnyi dia lofunguso lambodiangana+ ahole tshɛ.

17 Saolo akatɛ anto waki kaamɛ la nde ate: “Lam’alanganyu, nyadia anto kele teye akɔna ele bu l’atei aso.” Lam’akawadia anto, vɔ wakɛnyi dia Jɔnatana nde l’ɔmɛmbi ande wa dihomɔ dia ta komonga laawɔ. 18 Ko Saolo akatɛ Ahidja+ ate: “Sukanya Ɔshɛtɛ wa Nzambi ka mɛtɛ!” (Nɛ dia Ɔshɛtɛ wa Nzambi ka mɛtɛ waki kaamɛ l’ase Isariyɛlɛ l’etena kɛsɔ.*) 19 Etena kakatɛkɛtaka Saolo nde la ɔlɔmbɛdi, lofunguso lakatalekaka mfula tsho lo mpango k’ase Filistiya. Ko Saolo akatɛ ɔlɔmbɛdi ate: “Tshika kɛnɛ kasalayɛ.”* 20 Ko Saolo nde l’anto tshɛ waki kaamɛ la nde wakasangana, ko wakatshu lo ta ndo wakatotana dia ase Filistiya wodiakana lam’asawɔ la tokuwa ta ta ndo lofunge laki woho w’anyanya. 21 Ase Hɛbɛru wanɛ wakete ntondo lo wedi w’ase Filistiya ndo wakaye kaamɛ la wɔ lo mpango wakete lo wedi w’ase Isariyɛlɛ lo ɛlɔmbwɛlɔ ka Saolo nde la Jɔnatana. 22 Apami tshɛ w’ase Isariyɛlɛ wakayashɛ+ lo lɛkɛ l’akona la Efrayimɛ wakoke dia ase Filistiya wambolawɔ, ko vɔ lawɔ wakɔtɔ lo ta ko wakawatshanya. 23 Ɔnkɔnɛ, Jehowa akashimbɛ Isariyɛlɛ lushi lɔsɔ+ ndo ta diakatshu polo la Bɛtɛ-Avɛna.+

24 Koko ase Isariyɛlɛ wakalɛmbɛ efula lushi lɔsɔ, nɛ dia Saolo akatshibia anto ate: “Mananu kayale le onto tshɛ layɔlɛ ɛngɔ* kɛmɔtshi la ntondo ka dikɔlɔ nkoka edja ndo lambɔsɔmbɔya atunyi ami!” Ɔnkɔnɛ, ndooko onto lakale yangɔ.+

25 Anto* tshɛ wakɔtɔ lo okonda ndo osanga waki la nkɛtɛ. 26 Lam’akɔtɔ anto lo okonda, vɔ wakɛnyi osanga wakɛlanɛ, koko ndooko onto lakalɔmbɔla kaanga la lohita lande, nɛ dia vɔ waki la wɔma w’etshibelo. 27 Koko Jɔnatana komboka lam’akatshibia she anto etshibelo+ kakɔ, ko nde akasembola shɔdi ya danga diaki lo lonya lande, ko akaditshuhe lo ehehe k’osanga. Kam’akandakaloya lonya lande otsha l’onyɔ, washo ande wakatatɛ mpɛta ngaingai. 28 Ko onto ɔmɔtshi akate ate: “Shɔ akatshibisha anto ate: ‘Mananu kayale le onto tshɛ layɔlɛ ɛngɔ ɛlɔ!’+ Diakɔ diele anto wambɔlɛmba efula.” 29 Koko Jɔnatana akate ate: “Papa ambosalɛ anto kɔlɔ k’efula. Ohonyenda woho wɔhɛta washo ami ngaingai l’ɔtɛ wamomɔlɔmbɔla yema y’osanga. 30 Otoleka dimɛna ɛlɔ, anto ndɛ dimɛna+ diangɔ dia dimbo di’oma le atunyi awɔ! Nɛ dia totoleka ndjaka ase Filistiya lo yɛdikɔ y’efula.”

31 Lushi lɔsɔ, vɔ wakatetemala ndjaka ase Filistiya oma la Mikimashɛ polo la Aidjalɔna,+ ko anto wakalɛmbɛ efula. 32 Ɔnkɔnɛ, anto wakatatɛ nkungusɔ la lokaki tshɛ otsha lo diangɔ dia dimbo ndo wakɔshi ɛkɔkɔ la ngɔmbɛ ndo tana ta ngɔmbɛ, ko wakayidiake la nkɛtɛ ndo wakale nyama yakɔ kaamɛ la dikila.+ 33 Ko wakayotɛ Saolo vate: “Eenda anto wekɔ lo salɛ Jehowa pɛkato lo ndɛ nyama kaamɛ la dikila!”+ Ko nde akate ate: “Nyu nyamboshisha kɔlamelo. Nyongitole dive dia woke esadi esadi oya le mi.” 34 Oma laasɔ, Saolo akate ate: “Nyetete l’atei w’anto ndo nyowate nyate: ‘Onto tshɛ l’atei anyu pombaka mbela ngɔmbɛ kande ndo ɔkɔkɔ ande dia ndjodiaka lanɛ ko nyu ndɛ. Tanyosalɛke Jehowa pɛkato lo ndɛ nyama kaamɛ la dikila.’”+ Ko onto tshɛ l’atei awɔ akela ngɔmbɛ kande l’otsho ɔsɔ ndo akakidiake laawɔ. 35 Saolo akasalɛ Jehowa+ elambwelo. Ɔsɔ kele elambwelo ka ntondo kakandasalɛ Jehowa.

36 L’ɔkɔngɔ diko, Saolo akate ate: “Nyɛsɔ toholɔ, toyele ase Filistiya l’otsho kele totombe diangɔ diawɔ polo lam’ayohotɔ wonya la pindju. Hatototshika kaanga onto 1 la lɔsɛnɔ.” Ko vɔ wakate vate: “Sala kɛnɛ tshɛ kele ɔlɔlɔ lo washo ayɛ.” Ko ɔlɔmbɛdi akate ate: “Toyasukanya la Nzambi ka mɛtɛ lanɛ.”+ 37 Ko Saolo akambola Nzambi ate: “Onde dimi koka ndjelana l’ase Filistiya?+ Onde wɛ ayowakimɔ lo anya w’Isariyɛlɛ?” Koko Nzambi kombokadimola lushi lɔsɔ. 38 Ɔnkɔnɛ Saolo akate ate: “Ewandji w’anto tshɛ nyoye lanɛ kele toyange dia mbeya pɛkato kambosalema ɛlɔ. 39 Nɛ dia, lo mɛtɛ oko wele Jehowa ɔnɛ lakatshungola Isariyɛlɛ la lɔsɛnɔ, oyadi kaanga ambɛnama dia ɔnami Jɔnatana kosadi dui sɔ, nde pombaka mvɔ.” Koko ndooko onto lakookadimola. 40 Oma laasɔ, nde akatɛ ase Isariyɛlɛ tshɛ ate: “Nyu nyayonga lo wedi ɔmɔtshi ndo dimi la ɔnami Jɔnatana tayonga lo wedi okina.” Ko anto wakatɛ Saolo vate: “Sala kɛnɛ tshɛ kele ɔlɔlɔ lo washo ayɛ.”

41 L’ɔkɔngɔ wa laasɔ, Saolo akatɛ Jehowa ate: “Nzambi k’Isariyɛlɛ le, okadimole lo ekimanyielo ka Tumimɛ!”+ Ko Jɔnatana nde la Saolo wakasɔnama, koko wodja komonga la onongo. 42 Ko Saolo akate ate: “Nyoke owale+ dia nshikikɛ lam’asami dimi la ɔnami Jɔnatana.” Ko Jɔnatana akasɔnama. 43 Oma laasɔ, Saolo akambola Jɔnatana ate: “Ombutɛ, kakɔna kamboyosala?” Ko Jɔnatana akawotɛ ate: “Dimi lakalɔmbɔdi paka yema y’osanga tshitshɛ lo shɔdi ya danga diaki lo lonya lami.+ Dimi ɔnɛ, lekɔ suke dia mvɔ!”

44 Ko Saolo akate ate: “Jɔnatana+ le, Nzambi ambisha dilanya dia wolo naka wɛ havwe!” 45 Koko anto wakatɛ Saolo vate: “Onde Jɔnatana ɔnɛ lambela Isariyɛlɛ otshumba*+ wa woke ɔnɛ pombaka mvɔ? Ndooko kaanga yema! Lo mɛtɛ oko wele Jehowa la lɔsɛnɔ, ndooko kaanga wɔɔngi wa divo 1 wa l’ɔtɛ ande wahomba nkɔ la nkɛtɛ, nɛ dia kaamɛ la Nzambi kakandasadi akambo ɛlɔ.”+ Ko wodja wakatshungola* Jɔnatana ndo nde komvɔ.

46 Ko Saolo akatshike ndjelana l’ase Filistiya ndo ase Filistiya wakatshu l’ɛtshi kawɔ ka nkɛtɛ.

47 Saolo akashikimadia lowandji lande lo Isariyɛlɛ ndo akalɔsha atunyi ande tshɛ lo wedi akɔ tshɛ, mbuta ate ase Mɔaba,+ ase Amɔna,+ ase Ɛdɔmɛ,+ nkumi ya dikanga ya Zoba+ ndo ase Filistiya.+ Dihole tshɛ diakandatshɔka tɔlɔsha, nde akaalɛndjaka. 48 Nde akalɔsha la dihonga tshɛ ndo akalɛndja ase Amalɛka,+ ko akatsha ase Isariyɛlɛ oma l’anya w’amumbi.

49 Ana w’apami waki Saolo vɔ anɛ: Jɔnatana, Ishivi ndo Malaki-Shua.+ Nde aki l’ana 2 wa wamato. Ɔna l’enondo lokombo lande Merabɛ+ ndo la kose lokombo lande Mikalɛ.+ 50 Wadi aki Saolo lokombo lande Ahinɔama, ɔna Ahimaza. Owandji w’asɔlayi ande lokombo lande Abinɛrɛ,+ ɔna Nɛrɛ, ɔnango she Saolo. 51 Kisha+ mbaki she Saolo ndo Nɛrɛ+ ka she Abinɛrɛ aki ɔna Abiyɛlɛ.

52 Lo nshi tshɛ yakolɛka Saolo,+ ta dia wolo diakongaka lam’asande l’ase Filistiya. Lam’akɛnaka Saolo pami ka wolo ndo ka dihonga, nde akawɔsaka lo olimu ande.+