2 Ɛkɔndɔ

26 Oma laasɔ, ase Juda tshɛ wakɔshi Uziya+ laki l’ɛnɔnyi 16, ko wakawetɛ nkumekanga lo dihole dia Amaziya she.+ 2 Nde akayohika nto Elɔtɛ+ ko akakikaloya le Juda l’ɔkɔngɔ wa nkumekanga* mbetama dia momuya kaamɛ la watshɛnde.+ 3 Uziya+ aki l’ɛnɔnyi 16 lam’akandayala nkumekanga ndo nde akolɛ l’edja k’ɛnɔnyi 52 la Jɛrusalɛma. Nyango lokombo lande Jɛkɔliya, ose Jɛrusalɛma.+ 4 Nde akatetemala nsala kɛnɛ kaki ɔlɔlɔ lo washo wa Jehowa oko wakasalaka Amaziya wa she.+ 5 Nde akatetemalaka nyanga Nzambi lo nshi ya Zɛkariya ɔnɛ lakawetsha dia mboka Nzambi ka mɛtɛ wɔma. L’etena kakandayangaka Jehowa, Nzambi ka mɛtɛ akookonya ɔngɔnyi.+

6 Nde akatshu ko akatɔlɔsha ase Filistiya+ ndo akatondola ehele ka Ngata,+ ehele ka Jabinɛ+ ndo ehele ka Ashidɔdɛ.+ Oma laasɔ, nde akake esomba lo ɛtshi ka nkɛtɛ ka Ashidɔdɛ ndo l’atei w’ase Filistiya. 7 Nzambi ka mɛtɛ akatetemala mbokimanyiya dia ndɔsha ase Filistiya, dia ndɔsha ase Arabiya+ wakadjasɛka la Nguribala ndo dia ndɔsha aseka Meunima. 8 Ase Amɔna+ wakatatɛ nkimɔ elambo le Uziya. L’edjedja ka wonya, lokumu lande lakayohandjɔnɛ polo l’Edjibito, nɛ dia nde akayoyala la wolo efula. 9 Ndo nto, Uziya akake totshoto+ la Jɛrusalɛma suke la Soko dia Tshuku,+ Soko dia Okidi+ ndo Esukɔ w’ehele, ko nde akatikeketsha. 10 Laadiko dia laasɔ, nde akake totshoto+ l’oswe ndo akatshime* tɛkɔ efula (nɛ dia nde aki la dongalonga efula); nde akasale ngasɔ nto la Shɛfɛla ndo lo nkɛtɛ y’ebamubamu.* Nde aki la ase olimu ndo akambi wa dikambɔ dia vinyɔ lo akona ndo la Karamɛlɛ, nɛ dia nde akalangaka olimu wa dikambɔ.

11 Ndo nto, Uziya akayonga l’asɔlayi waki la dihomɔ dia ta. Vɔ wakatshɔka dia tɔlɔsha ndo wakakongɛma lo elui. Vɔ wakadiema ndo wakafundjama nkombo+ oma le ofundji Jeyɛlɛ+ nde la ɔlɔhɛ Maseya lo ɛlɔmbwɛlɔ ka Hananiya, ɔlɔhɛ ɔmɔtshi wa nkumekanga. 12 Ɛtɛ wa nkumbo ya washɛwɔ wanɛ waki emendji w’andɔshi wa ta wa wolo waki tshɛ tshɛ nunu pende la nkama shamalo (2 600). 13 Asɔlayi waki la dihomɔ dia ta waki lo ɛlɔmbwɛlɔ kawɔ waki apami nunu nkama shato l’esambele la nkama tshanu (307 500) waki suke dia ndɔ ta, olui w’asɔlayi wa wolo wakasukɛ nkumekanga dia ndɔsha otunyi.+ 14 Uziya akasha asɔlayi tshɛ dingawo, akɔnga,+ mfulɛ, akɔti wa mbolo wa mposo mposo,+ eta ndo tooka ave.+ 15 Ndo nto, nde akasadisha dihomɔ dia ta diakasalema oma le etshudi wa tomanamana lo awui wa ta la Jɛrusalɛma. Wakadikitsha lo totshoto+ ndo lo atshuku wa mpele, ndo diɔ diakakokaka mboka mpito ndo mbɔkɔ ya weke. Ko lokumu lande lakahandjɔnɛ etale, nɛ dia nde akalongola ekimanyielo ka diambo, ko nde akayala la wolo.

16 Koko kam’akandonge la wolo, otema ande wakayala la lotamanya lakookonya lo elanyelo, ko nde akashisha kɔlamelo le Jehowa Nzambi kande lo mbɔtɔ lo tɛmpɛlɔ ka Jehowa dia totshumba tshɔ lo elambwelo ka tshɔ.+ 17 Mbala kakɔ ɔtɔi, ɔlɔmbɛdi Azariya nde l’ɛlɔmbɛdi ekina 80 wa Jehowa waki la dihonga wakooyele. 18 Vɔ wakatokomɛ nkumekanga Uziya ndo wakawotɛ vate: “Uziya, bu dimɛna dia wɛ tshumbɛ Jehowa tshɔ!+ Ɛlɔmbɛdi eto mbahomba ntshumba tshɔ, nɛ dia vɔ mbele tokanula ta Arɔna,+ wanɛ wakakidiama. Tomba oma lo tɛmpɛlɔ k’ekila, nɛ dia wɛ amboshisha kɔlamelo ndo wɛ hatolongola lotombo nto oma le Jehowa Nzambi l’ɔtɛ wa dikambo nɛ.”

19 Koko Uziya laki la mpanu lo lonya lande dia ntshumba tshɔ akomala;+ ndo lam’akandomalɛ ɛlɔmbɛdi, sudi+ kakatombe lo okoko ande la ntondo k’ɛlɔmbɛdi lo luudu la Jehowa suke la elambwelo ka tshɔ. 20 Lam’akɛwɔ Azariya owandji w’ɛlɔmbɛdi ndo ɛlɔmbɛdi tshɛ otsha le nde, vɔ wakɛnyi dia nde ambotomba sudi lo okoko. Ko vɔ wakootondja esadi oma laawɔ ndo ndamɛ akasamanya otsha l’andja, nɛ dia Jehowa akɔɔkɔmɔla.

21 Nkumekanga Uziya akatshikala kanga sudi polo lushi la nyɔi kande, ndo nde akatshikalaka lo luudu langanyi l’anto akina oko wakinde kanga sudi,+ nɛ dia nde akatondjama oma lo luudu la Jehowa. Ɔnande Jɔtama laki omendji wa luudu la nkumekanga* akalomboshaka anto wa lo wodja.+

22 Etenyi kekina k’ɔkɔndɔ wa Uziya, oma l’etatelo polo l’ekomelo kawɔ kakafundama oma le omvutshi Isaya+ ɔna Amɔza. 23 Oma laasɔ, Uziya aketama dia momuya kaamɛ la watshɛnde, ko wakookundɛ lale watshɛnde, koko lo ekambɔ ka waombo wa nkumi ya dikanga, nɛ dia vɔ wakate vate: “Nde ekɔ kanga sudi.” Ko ɔnande Jɔtama+ akayala nkumekanga lo dihole diande.