1 Ɛkɔndɔ

28 Oma laasɔ, Davidɛ akatshumanya ewandji tshɛ wa l’Isariyɛlɛ la Jɛrusalɛma: Ewandji wa waoho, ewandji w’elui+ wakakambɛka nkumekanga, ewandji w’anto nunu nunu ndo ewandji w’anto nkama nkama,+ ewandji wa diangɔ tshɛ, wa dongalonga dia nkumekanga+ ndo di’anande, kaamɛ la ɛnɛnɛ ndo apami+ tshɛ wa wolo ndo wele la akoka.+ 2 Oma laasɔ, nkumekanga Davidɛ akemala lo ekolo ande ko akate ate:

“Nyu analengo ndo wodja ami le, nyompokame. Otema ami wakakombola dia mbika luudu oko dihole dia momuya dikambo dia ɔshɛtɛ wa sheke wa Jehowa ndo oko kihona k’ekolo ka Nzambi kaso,+ ndo dimi lakalɔngɔsɔla diangɔ dia mbika.+ 3 Koko Nzambi ka mɛtɛ akambutɛ ate: ‘Wɛ hatoka luudu dikambo dia lokombo lami,+ nɛ dia wɛ ekɔ ɔndɔshi wa ata ndo wɛ ambɔkɛdia dikila efula.’+ 4 Koko Jehowa Nzambi k’Isariyɛlɛ akansɔnɛ l’atei wa luudu la papa l’otondo dia dimi monga nkumekanga k’Isariyɛlɛ pondjo pondjo,+ nɛ dia nde akasɔnɛ Juda oko ɔnɔmbɔdi+ ndo lo luudu la Juda, nde akasɔnɛ luudu la papa,+ ndo l’atei w’ana wa papa, dimi kele ɔnɛ lakandetawɔ dia nde mbetɛmi nkumekanga k’Isariyɛlɛ w’otondo.+ 5 L’atei w’anami tshɛ, nɛ dia Jehowa ambombisha ana efula,+ nde akasɔnɛ ɔnami Sɔlɔmɔna+ dia nde mbidjasɛ lo kiti ka lowandji ka Jehowa lo Isariyɛlɛ.+

6 “Nde akambutɛ ate: ‘Ɔnayɛ Sɔlɔmɔna kayoka luudu lami ndo lokombo la asɛkɛ ami, nɛ dia dimi lambɔɔsɔna dia nde monga ɔnami ndo dimi layonga she.+ 7 Dimi layoshikikadia lowandji lande nge pondjo pondjo+ naka nde ndjashikikɛ dia ndjela wadjango ami ndo tɛdikɔ+ tami oko wasalande kakianɛ.’ 8 Diakɔ diatami la ntondo k’ase Isariyɛlɛ tshɛ, etshumanelo ka Jehowa ndo lo atoyi wa Nzambi kaso nte: Nyoyelake dimɛna dimɛna ndo nyoyangake wadjango tshɛ wa Jehowa Nzambi kanyu, dia nyu ntshikala lo wodja wa dimɛna+ ɔnɛ ndo dia nyu mbotshikɛ ananyu wayonga l’ɔkɔngɔ anyu oko etenyi k’okitɔ ka pondjo.

9 “Koko wɛ Sɔlɔmɔna ɔnami le, eya Nzambi ka shɔ ndo kambɛnde olimu l’otema ɔtɔi*+ ndo la anima* w’ɔngɛnɔngɛnɔ,* nɛ dia Jehowa sɛdingolaka etema tshɛ+ ndo nde shihodiaka nsaki tshɛ ya lo tokanyi.+ Naka wɛ mboyanga, nde ayoyaɛnya le yɛ;+ ko naka wɛ mbotshika, nde ayokokasha pondjo.+ 10 Eenda, wonya ɔnɛ Jehowa ambokɔsɔna dia wɛ mbika luudu lele oko tɛmpɛlɔ k’ekila. Onga la dihonga ndo tshɔka l’olimu.”

11 Oma laasɔ, Davidɛ akasha ɔnande Sɔlɔmɔna ekongelo ka wokelo+ wa tshoto y’otale+ la mvudu yalɔ, mvudu ya waombelo, mvudu ya ndala ya la diko, mvudu y’oleelo ndo luudu la ofidi w’ekombelo.*+ 12 Nde akawosha ekongelo ka wokelo w’ɛngɔ tshɛ kakandalongola l’ekimanyielo* ka nyuma dikambo dia asɛkɛ+ wa luudu la Jehowa, dikambo dia mvudu y’oleelo tshɛ yakalidinge, dikambo dia diangɔ dia nɛmɔ tshɛ dia lo luudu la Nzambi ka mɛtɛ, ndo dikambo dia diangɔ dia nɛmɔ dia lo diangɔ diakakidiama;*+ 13 ndo dikambo di’elui w’ɛlɔmbɛdi+ l’ase Lɛwi, dikambo di’ɛkɛndɛ tshɛ wendana l’olimu wa lo luudu la Jehowa, ndo dikambo dia diangɔ tshɛ diendana l’olimu wa lo luudu la Jehowa; 14 ndo nto, dikambo dia wotsho wa paonyi, paonyi ya diangɔ tshɛ diendana l’elimu wotshikitanyi, wotsho wa diangɔ tshɛ dia mfɛsa, ndo dikambo dia diangɔ tshɛ diendana l’elimu wotshikitanyi; 15 ndo wotsho wa dikundji dia atala+ dia paonyi la atala adiɔ wa paonyi, wotsho wa dikundji dia atala diotshikitanyi kaamɛ la atala adiɔ, ndo wotsho wa dikundji dia atala dia mfɛsa dikambo dia ekundji tshɛ la atala atɔ lo ndjela olimu atɔ; 16 ndo nto, wotsho wa paonyi dikambo dia mɛsa wa nkitsha mapa wa lahatanya,*+ dikambo dia mɛsa la mɛsa, mbidja ndo mfɛsa dikambo dia mɛsa wa mfɛsa, 17 dikambo dia nsɔmɔ, alɔnga w’afuku, mbidika ya la paonyi ka pudipudi, ndo wotsho wa tɔlɔngalɔnga t’afuku ta paonyi,+ dikambo dia djɔngalɔnga tshɛ, ndo wotsho wa tɔlɔngalɔnga t’afuku ta mfɛsa, dikambo dia djɔngalɔnga tshɛ. 18 Nde akawosha ndo wotsho wa paonyi kambɛdiama dikambo dia elambwelo ka tshɔ+ ndo dikambo dia efanelo ka pusupusu,+ mbuta ate akɛruba+ wa paonyi wakasandjola ahafu awɔ ndo wele dɛdi diawɔ diakakombe ɔshɛtɛ wa sheke wa Jehowa. 19 Davidɛ akate ate: “Lonya la Jehowa laki kaamɛ la mi ndo nde akambisha yimba dia dimi mfunda+ tokambokambo tshɛ tendana la ekongelo ka wokelo.”+

20 Oma laasɔ, Davidɛ akatɛ ɔnande Sɔlɔmɔna ate: “Onga la dihonga ndo keketala, ndo tshɔka l’olimu. Tokake wɔma ndo tatɛke asolo, nɛ dia Jehowa Nzambi, Nzambi kami ekɔ kaamɛ la yɛ.+ Nde hatokɔsɛka ndo hatokotshika,+ koko nde ayonga kaamɛ la yɛ polo lam’ayoshila olimu tshɛ wa luudu la Jehowa. 21 Ndo elui w’ɛlɔmbɛdi+ l’ase Lɛwi+ wekɔ dikambo dia olimu tshɛ wa lo luudu la Nzambi ka mɛtɛ. Wɛ ekɔ la ase olimu walanga ndo wele la diewo dia nkamba woho tshɛ w’olimu,+ mbidja ndo ewandji+ l’anto tshɛ wayokotshaka kɛnɛ tshɛ katayɛ.”