2 Ɛkɔndɔ

6 L’etena kɛsɔ, Sɔlɔmɔna akate ate: “Jehowa akate dia nde ayodjasɛ lo wodjima wa tshududu.+ 2 Dimi lambokokɛ luudu la diambo, dihole dia shikaa diahombayɛ mbidjasɛka pondjo pondjo.”+

3 Ko nkumekanga akakadimɔ otsha le anto ndo akatatɛ ntshɔkɔla etshumanelo k’otondo k’Isariyɛlɛ etena kakemala etshumanelo k’otondo k’Isariyɛlɛ.+ 4 Nde akate ate: “Jehowa Nzambi k’Isariyɛlɛ atombɔme, ɔnɛ lele oma l’onyɔ ande hita kakandalake Davidɛ dia papa ndo oma lo anya ande hita kambondela ekotshamelo, ata ate: 5 ‘Oma ko lushi lakamatondja wodja ami oma lo wodja w’Edjibito, dimi kɔsɔna osomba ɔmɔtshi oma lo waoho tshɛ w’Isariyɛlɛ dia mbika luudu dia lokombo lami ntshikala lɔkɔ,+ ndo dimi kɔsɔna onto ɔmɔtshi dia nde monga ɔnɔmbɔdi wa wodja ami w’Isariyɛlɛ. 6 Koko lakasɔnɛ Jɛrusalɛma+ dia lokombo lami ntshikala laawɔ, ndo lakasɔnɛ Davidɛ dia nde mbolɛ wodja ami w’Isariyɛlɛ.’+ 7 Otema wa Davidɛ dia papa wakakombola mbika luudu dikambo dia lokombo la Jehowa Nzambi k’Isariyɛlɛ.+ 8 Koko Jehowa akatɛ Davidɛ dia papa ate: ‘Otema ayɛ wakakombola dia mbika luudu dikambo dia lokombo lami, ndo wɛ akasale dimɛna dia nkombola dikambo sɔ l’otema ayɛ. 9 Koko wɛ hatoka luudu lakɔ, paka ɔnayɛ layoyota* kayoyoka luudu dikambo dia lokombo lami.’+ 10 Jehowa akakotsha daka diakandalake, nɛ dia dimi lakahɛnɛ Davidɛ dia papa ndo lambodjasɛ lo kiti ka lowandji lo Isariyɛlɛ,+ oko wakalake Jehowa.+ Ndo nto, dimi lamboka luudu dikambo dia lokombo la Jehowa Nzambi k’Isariyɛlɛ, 11 ndo dimi lambodja Ɔshɛtɛ wele la sheke+ yakadje Jehowa nde l’ase Isariyɛlɛ lɔkɔ.”

12 Oma laasɔ, nde akemala la ntondo ka elambwelo ka Jehowa, la ntondo k’etshumanelo k’otondo k’Isariyɛlɛ, ndo nde akemɛ anya l’olongo.+ 13 (Nɛ dia Sɔlɔmɔna akasale lɔyɛnga la nkonga ndo akalikitsha l’atei wa sɛkɛ.*+ Lɔ laki la otale wa kubita* 5, woke wa kubita 5 ndo tanga dia kubita 3; ko nde akemala lɔkɔ.) Nde akake adwe la ntondo k’etshumanelo k’otondo k’Isariyɛlɛ ko akemɛ anya l’olongo,+ 14 ko akate ate: “Jehowa Nzambi k’Isariyɛlɛ le, ndooko Nzambi kele oko wɛ l’olongo kana la nkɛtɛ kalama sheke ndo kɛnya ngandji ka kɔlamelo le ekambi ayɛ wakɛndakɛnda la ntondo kayɛ la etema awɔ tshɛ.+ 15 Wɛ akalame daka diakayalake okambi ayɛ Davidɛ dia papa.+ Wɛ akalake daka la onyɔ ayɛ hita ndo ɛlɔ wɛ ambodikotsha la lonya layɛ hita.+ 16 Wonya ɔnɛ, Jehowa Nzambi k’Isariyɛlɛ le, okotsha daka diakayalake okambi ayɛ Davidɛ dia papa lam’akayate wate: ‘Ndooko onyake, onto ɔmɔtshi la lo ɔlɔndji ayɛ kayodjasɛka la ntondo kami lo kiti ka lowandji k’Isariyɛlɛ naka anayɛ mbidja yimba lo mboka kawɔ, lo nkɛndakɛnda lo ɛlɛmbɛ ami,+ oko wamboyɔkɛndakɛnda la ntondo kami.’+ 17 Ɔnkɔnɛ, Jehowa Nzambi k’Isariyɛlɛ le, etawɔ dia daka diakayalake okambi ayɛ Davidɛ kotshama.

18 “Ko, onde mɛtɛ Nzambi ayodjasɛ kaamɛ l’anto la nkɛtɛ?+ Eenda, olongo, ɛɛ, olongo wa la diko di’elongo hawokoke le yɛ,+ kete hoke luudu lɔnɛ lamomoka!+ 19 Ɔnkɔnɛ, Jehowa Nzambi kami le, odje yimba lo dɔmbɛlɔ di’okambi ayɛ ndo lo kɛnɛ kakɔlɔmbande dia mbooka kɛtshi, ndo ohokame delo dialɔmbande ekimanyielo ndo dɔmbɛlɔ diakɔlɔmba okambi ayɛ la ntondo kayɛ. 20 Odiholake washo ayɛ oya lo luudu lɔnɛ la yanyi ndo l’otsho, oya lo dihole diakayate dia wɛ ayodja lokombo layɛ lɔkɔ,+ dia mpokamɛ dɔmbɛlɔ diakɔlɔmba okambi ayɛ oya lo dihole nɛ. 21 Ohokamɛke ndo ɛsɛngɔsɛngɔ walɔmba okambi ayɛ ekimanyielo la ɛsɛngɔsɛngɔ wa wodja ayɛ w’Isariyɛlɛ lam’alɔmbawɔ oya lo dihole nɛ,+ ndo kohokamɛke oma lɛnɛ odjashiyɛ, oma l’olongo;+ ɛɛ, kohokamɛke ndo kodimanyiyake.+

22 “Naka onto ɔmɔtshi ambosalɛ osekande kɔlɔ ko ambɔlɔmbama dia nde ntshiba* ndo nde ambokelekama lo etshibelo* kakɔ, ko nde amboya la ntondo ka elambwelo kayɛ lo luudu lɔnɛ+ etena kende lo etshibelo* kakɔ, 23 kohokamɛke oma l’olongo, kekɛke lonya ndo kolomboshake ekambi ayɛ lo nkaloya kɔlɔ le kanga kɔlɔ ndo lo mbela kɛnɛ kakandasadi l’ɔtɛ ande hita,+ lo mbuta dia ɔnɛ lɔswɛ keema la onongo* ndo lo mbofuta lo ndjela losembwe lande hita.+

24 “Ndo naka wodja ayɛ w’Isariyɛlɛ wambɔlɛndjama oma le otunyi awɔ ɔmɔtshi l’ɔtɛ wayowotetemala kosalɛ pɛkato,+ ko vɔ wambokalola ndo wambotombola lokombo layɛ+ ko wambokɔlɔmba+ ndo wambɔlɔmba la ntondo kayɛ lo luudu lɔnɛ+ dia mbokama kɛtshi, 25 kohokame oma l’olongo+ ndo kodimanyiya wodja ayɛ w’Isariyɛlɛ pɛkato yawɔ, ndo kowakaloya lo wodja wakayawasha vɔ la watshɛwɔ.+

26 “Lam’ayodihama olongo ko mvula hayɔlɔ+ l’ɔtɛ wayowotetemala kosalɛ pɛkato,+ ko vɔ wambɔlɔmba oya lo dihole nɛ, wambotombola lokombo layɛ ndo wambokadimɔ oma lo pɛkato kawɔ, nɛ dia wɛ ambaakitshakitsha,*+ 27 kohokame oma l’olongo ndo kodimanyiya ekambi ayɛ pɛkato kawɔ, ka wodja ayɛ w’Isariyɛlɛ, nɛ dia wɛ ayowaetsha mboka k’ɔlɔlɔ kahombawɔ nkɛndakɛnda.+ Kɔlɔsha mvula+ lo wodja wakayasha ekambi ayɛ oko etenyi k’okitɔ.

28 “Naka ndjala ka kasha kambonga lo wodja+ kana olando ɔmɔtshi,+ tanyi talongoya diononɛ, mombolenge,+ ɛndjɔ+ kana akata walanya diangɔ, kana naka atunyi awɔ wambaadinga l’osomba ɔmɔtshi wa lo wodja*+ ɔnɛ kana naka woho ɔmɔtshi wa sui kana wa hemɔ ambaakomɛ,+ 29 dɔmbɛlɔ diakɔna tshɛ,+ kɛnɛ tshɛ kayokɔlɔmba+ onto ɔmɔtshi kana wodja ayɛ w’otondo w’Isariyɛlɛ dia mpomɔ lokolo l’ɔlɔ, (nɛ dia onto tshɛ mbeyaka sui diande hita ndo paa kande hita)+ lam’ayowemɛ anya awɔ oya lo luudu lɔnɛ,+ 30 kohokame oma l’olongo lɛnɛ odjashiyɛ+ ndo kodimanyiya.+ Kofute onto l’onto lo ndjela mboka yande tshɛ, nɛ dia wɛ mbeyaka otema ande (dikambo wɛ oto keya mɛtɛ otema w’onto),+ 31 dia vɔ kooka wɔma lo nkɛndakɛnda lo mboka yayɛ nshi tshɛ yayowodjasɛ lo wodja wakayasha watshɛso.

32 “Ndo nto, lo kɛnɛ kendana la ɔngɛndangɛnda wele bu ɔmɔtshi l’atei wa wodja ayɛ w’Isariyɛlɛ ndo wayoya oma lo wodja w’etale l’ɔtɛ wa lokombo*+ layɛ la woke ndo lonya layɛ la wolo la lonya layɛ losembwe tɔɔ, ko nde amboya ndo ambɔlɔmba oya lo luudu lɔnɛ,+ 33 kohokame oma l’olongo lɛnɛ odjashiyɛ ndo kosale kɛnɛ tshɛ kakɔlɔmba ɔngɛndangɛnda akɔ, kele anto tshɛ wa la nkɛtɛ kaweye lokombo layɛ+ ndo kawokooke wɔma, oko wakooka wodja ayɛ w’Isariyɛlɛ wɔma, ndo kele kaweye dia lokombo layɛ lekɔ lo mbelamɛ lo luudu lɔnɛ lamomoka.

34 “Naka wodja ayɛ wambotshɔ lo ta dia tɔlɔsha atunyi awɔ lo mboka kayoyaatoma,+ ko vɔ wambokɔlɔmba,+ wɛlɛ oya l’osomba ɔnɛ wakayasɔnɛ ndo oya lo luudu lamomoka dikambo dia lokombo layɛ,+ 35 kohokame dɔmbɛlɔ diawɔ la ɛsɛngɔsɛngɔ awɔ oma l’olongo ndo kosambole lo dikambo diawɔ.+

36 “Naka vɔ wambokosalɛ pɛkato (dikambo ndooko onto lahasale pɛkato),+ ko wɛ ambowaoka nkɛlɛ ndo ambaakimɔ le otunyi ɔmɔtshi, ko otunyi awɔ ambaatɔla lo lɔhɔmbɔ lo wodja ɔmɔtshi w’etale kana wa suke,+ 37 ko vɔ wambotokana yimba lo wodja wakawatɔlama mfumbe ndo wambokadimɔ le yɛ, ko wambokɔsɛngasɛnga dia wɛ mbaoka kɛtshi lo wodja wewɔ mfumbe vate: ‘Sho takasale pɛkato ndo takasale kɔlɔ; takasale akambo lo yoho ya kɔlɔ,’+ 38 ko vɔ wambokadimɔ le yɛ la etema awɔ tshɛ+ ndo la anima* awɔ tshɛ lo wodja wakawatɔlama lo lɔhɔmbɔ+ lɛnɛ eewɔ mfumbe ndo vɔ wambɔlɔmba, wɛlɛ oya lo wodja wakayasha watshɛwɔ, oya l’osomba wakayasɔnɛ+ ndo oya lo luudu lamomoka dikambo dia lokombo layɛ, 39 kohokame dɔmbɛlɔ diawɔ la ɛsɛngɔsɛngɔ awɔ wa mbaoka kɛtshi oma l’olongo lɛnɛ adjasɛyɛ ndo kosambole lo dikambo diawɔ,+ ndo kodimanyiya anto ayɛ wakakosalɛ pɛkato.

40 “Nzambi kami le, lam’alangayɛ, odihole washo ayɛ ndo ohokɛ atoyi ayɛ lo dɔmbɛlɔ diambosalema lo* dihole nɛ.+ 41 Laasɔ wonya ɔnɛ, Jehowa Nzambi le, aya wɛ monɛɛka otsha lo dihole diayɛ dia momuya,+ wɛ la Ɔshɛtɛ wa wolo ayɛ. Jehowa Nzambi le, aya ɛlɔmbɛdi ayɛ ndɔtshamaka la panda, ndo aya ekambi ayɛ wa kɔlamelo ngɛnangɛnaka lo ɔlɔlɔ ayɛ.+ 42 Jehowa Nzambi le, tokalɛke* okitami ayɛ w’esɔ.+ Ohɔke ngandji kayɛ ka kɔlamelo le Davidɛ di’okambi ayɛ.”+