Jɔbɔ
11 Zɔfara+ ose Naamatɛ akakadimola ate:
2 “Onde ɛtɛkɛta ɛsɔ tshɛ wayeta aha la kadimɔma,
Kana onde efula k’ɛtɛkɛta wayetɛ onto ɔmɔtshi onto ɔlɔlɔ?*
3 Onde ɛtɛkɛta ayɛ w’anyanya wayɔlɛmbɔhaya anto?
Onde ndooko onto layokohangwɛ l’ɔtɛ w’ɛtɛkɛta ayɛ wa lɔsɔkɔ?+
5 Ko Nzambi otondɔtɛkɛta
Ndo otondokodiholɛ ɛlɔmɔ ande lee!+
6 Tshike nde otokosholɛ toseke ta lomba,
Nɛ dia lomba l’oshika lekɔ la bɛkɛ efula.
Tshike wɛ otoshihodia dia Nzambi mbetawɔka dia munga yayɛ mɔtshi mbohamɛ.
7 Onde wɛ kokaka mbishola akambo woshɛmi etale waki Nzambi
Kana mbishola kiambokambo tshɛ yendana la* Kanga-Wolo-Tshɛ?
8 Lɔ ndeka olongo tanga. Kakɔna kakokayɛ nsala?
Lɔ ndeka Diombo* ɔhɔngɔ. Kakɔna kakokayɛ mbeya?
9 Lɔ ndeka nkɛtɛ otale
Ndo ndeka ndjale woke.
10 Naka nde mbeta laawɔ ndo minda onto ɔmɔtshi ko mbɔtɔla lo kilombo,
Akɔna akoka mboshimba?
11 Nɛ dia nde mbeyaka etena konga anto la lokeso.
Lam’ɛnande kɛnɛ kele kɔlɔ, onde nde hatodja yimba lɔkɔ?
12 Koko kanga ɛpɔka ayoshihodia
Paka etena kayoota mponda ka l’okonda onto.*
13 Otoyɔlɔngɔsɔla otema ayɛ
Ndo nsembola anya ayɛ otsha le nde.
14 Naka lonya layɛ lekɔ lo nsala kɔlɔ, kitshalɔ etale,
Tetawɔke dia dui dimɔtshi dia kɔlɔ mbidjasɛ lo mvudu yayɛ y’apɛma.
15 Nɛ dia laasɔ kotoyonyiya elungi kayɛ aha la vadi,
Wɛ otokoka memala nge aha la mboka wɔma.
16 Nɛ dia ngasɔ kayoyohɛ paa kayɛ;
Wɛ ayokiohɔ oko ashi wambɔkɛla laleyɛ.
17 Lɔsɛnɔ layɛ layongamula ndeka yanyi ya midi;
Kaanga wodjima alɔ wayonga oko pindju.
18 Wɛ ayonga la wɛkamu nɛ dia elongamelo kekɔ,
Ndo wɛ ayɛwɛwa, ko wɛ ayetama lo lotui tshitshi.
19 Wɛ ayetama, ko ndooko onto layokootsha wɔma,
Ndo anto wayoyanga dia mbetawɔma le yɛ.