Ɛzɛkiyɛlɛ
26 Lo ɔnɔnyi wa 11 lo lushi la ntondo la ngɔndɔ, ɔtɛkɛta wa Jehowa wakaye le mi ɔnɛ: 2 “Ɔna onto, lam’ele Tura akate lo dikambo dia Jɛrusalɛma+ ate: ‘Ihi! Ɛɔtwɛlɔ ka anto kambolanyema!+ Ɛngɔ tshɛ kayonga kami ndo dimi layonga ɔngɔnyi etena kɛnɛ kele tɔ kambolanyema’; 3 diakɔ diata Nkum’Olongo Nkumadiɔndjɔ Jehowa ate: ‘Tura le, dimi lamboya dia ndjokɔlɔsha ndo dimi layela wedja efula dia kɔlɔsha oko watelaka ndjale asuku atɔ. 4 Vɔ wayolanya mpele dia Tura, wayotola totshoto+ tatɔ ndo dimi layɔmba nkɛtɛ ndo layosala dia tɔ monga dive dia ngaingai dia hwe. 5 Tɔ kayonga dihole dianɛwɔ ɛtɛyi l’atei wa ndjale.’+
“‘Nɛ dia dimi dimɛ kambɔtɛkɛta,’ mbata Nkum’Olongo Nkumadiɔndjɔ Jehowa, ‘ndo tɔ kayonga ɛngɔ ka dimbo le wedja. 6 Ndo ngelo* yatɔ ya lo shamba yayodiakema la lokuwa la ta, ko anto wayohomba mbeya dia dimi kele Jehowa.’
7 “Nɛ dia Nkum’Olongo Nkumadiɔndjɔ Jehowa kata ate: ‘Dimi layanga ntoma Nɛbukadinɛza* nkumekanga ka Babilɔna oma lo nɔrdɛ+ dia ndjɔlɔsha Tura; nde ekɔ nkumekanga+ ka nkumi ya dikanga kele la mfalasa,+ pusupusu+ ya ta, ambahemi wa mfalasa ndo leemba la woke la asɔlayi.* 8 Nde ayolanya ngelo yayɛ ya lo shamba la lokuwa la ta ndo nde ayoka ehele k’odingelo ndo ayemɛ lokombo l’odingelo ndo ayemɛ engawo ka woke dia kɔlɔsha. 9 Nde ayola mpele diayɛ la ehomɔ ka ta kanyukola mpele ndo la tɔshɔka* tande, nde ayotola totshoto tayɛ. 10 Mfalasa yande yayonga efula ka mamba lo yɛdikɔ yele yɔ yayokofɛ la otoko ndo lohelo la mfalasa, l’etshimbi ndo la pusupusu layosutshasutsha mpele diayɛ lam’ayondɔtɔ lo asoko ayɛ, oko anto wɔtɔ lo osomba wambonyukɔ mpele. 11 Nsabɔ ya mfalasa yande yayɔhɔtshahɔtsha toshinga+ tayɛ; nde ayodiaka anto ayɛ la lokuwa la ta ndo dikundji diayɛ dia wolo diayɔkɔ la nkɛtɛ. 12 Vɔ wayɔsa diangɔ diayɛ, wayomba diangɔ diayɛ dia nsondja,+ wayonyukola mpele diayɛ ndo wayonyukola mvudu yayɛ y’amɛna; oma laasɔ, vɔ wayokasha ave ayɛ ndo abaya ayɛ ndo nkɛtɛ yayɛ lo ashi.’
13 “‘Dimi layokomiya londjo la esambo ayɛ ndo londjo la nsɛsɛ yayɛ halotokɛma nto.+ 14 Dimi layoketɛ dive dia ngaingai dia hwe ndo wɛ ayonga dihole dianɛwɔ ɛtɛyi.+ Wɛ hahikamaki nto pondjo, nɛ dia dimi Jehowa dimɛ kambɔtɛkɛta,’ mbata Nkum’Olongo Nkumadiɔndjɔ Jehowa.
15 “Nkum’Olongo Nkumadiɔndjɔ Jehowa katɛ Tura ate: ‘Lo londjo la ɔkwɛlɔ ayɛ, lam’ayokumaka wanɛ wotavu* akumu, lam’ayosalema odiakelo l’atei ayɛ, onde asɛnga hawotodidima?+ 16 Ewandji tshɛ wa lo ndjale wayoholɔ oma lo kiti yawɔ ya lowandji, wayokolola ekutu* awɔ ndo wayokolola ahɔndɔ awɔ wele la asango asango ndo wayondama* la lokomba. Vɔ wayodjasɛ lo nkɛtɛ, wayotetemala nsaka lokomba ndo wayokendaka wele la diambo.+ 17 Ndo vɔ wayemba lembo l’otanda*+ lo dikambo diayɛ ndo wayokotɛ vate:
“Ande woho wamboyolanyema,+ wɛ lele anto w’oma lo ndjale wakadjasɛ lɔkɔ, wɛ osomba wa lotombo;
Wɛ la anto ayɛ* nyaki akanga a wolo lo ndjale,+
Nyadianganya wɔma le anto tshɛ wodjashi la nkɛtɛ!
18 Asɛnga wayodidima lo lushi la ɔkwɛlɔ ayɛ,
Asɛnga wa lo ndjale wayofukutanyema lam’ayoyotshɔ.”’+
19 “Nɛ dia Nkum’Olongo Nkumadiɔndjɔ Jehowa kata ate: Lam’ayomokohandjola oko esomba wahadjashi anto, lam’ayomokokumɛ la ashi wambɔmbɔ ndo lam’ayokokomba+ ashi wa wolo, 20 dimi layokɔtɔla wɛ la wanɛ wataholɔ lo difuku* kaamɛ la yɛ le anto w’edjedja; dimi layosala dia wɛ mbidjasɛ lo dihole dioleki l’ɛse, oko ahole w’edjedja wakalanyema, kaamɛ la wanɛ wataholɔ lo difuku,+ diaha anto mbidjasɛ le yɛ nto. Oma laasɔ, dimi layotombola* wodja wa wanɛ wasɛna.
21 “‘Dimi layela wɔma le yɛ la shashimoya, ko wɛ hatonga nto.+ Vɔ wayokoyanga, koko wɛ hatanemaki nto pondjo,’ mbata Nkum’Olongo Nkumadiɔndjɔ Jehowa.”