Ɛzɛkiyɛlɛ

44 Nde akankaloya lo mboka ka soko dia l’andja dia tɛmpɛlɔ k’ekila diɛlane la ɛstɛ,+ ko diɔ diakadihama.+ 2 Ko Jehowa akambutɛ ate: “Soko nɛ diayotshikalaka ku. Diɔ hadiotodihɔ ndo ndooko onto layɔtɔ lɔkɔ; nɛ dia Jehowa Nzambi ka Isariyɛlɛ ambɔtɔ lɔkɔ,+ ɔnkɔnɛ diɔ pombaka tshikalaka ku. 3 Koko, owandji ayodjasɛka lɔkɔ dia ndɛka mapa la ntondo ka Jehowa,+ nɛ dia nde ekɔ owandji. Nde ayɔtɔka oma lo soko dia lo tshoto y’otale ndo nde ayotombaka oma laawɔ.”+

4 Oma laasɔ, nde akambetsha lo soko dia lo nɔrdɛ otsha la ntondo ka tɛmpɛlɔ. Etena kakamende, dimi lakɛnyi dia lotombo la Jehowa lakalole lo tɛmpɛlɔ ka Jehowa.+ Ko dimi lakayakɔsha ekukumadi.+ 5 Ko Jehowa akambutɛ ate: “Ɔna onto, dja yimba,* enda ndo hokamɛ la yambalo tshɛ akambo tshɛ wakotɛmi lo kɛnɛ kendana la wadjango ndo ɛlɛmbɛ wendana la tɛmpɛlɔ ka Jehowa. Dja yimba dimɛna lo ɛɔtwɛlɔ ka tɛmpɛlɔ ndo lo asoko tshɛ wa tɛmpɛlɔ.+ 6 Wɛ pombaka mbutɛ luudu la Isariyɛlɛ l’atɔmbɔki wate: ‘Nkum’Olongo Nkumadiɔndjɔ Jehowa kata ate: “Luudu la Isariyɛlɛ le, ambokoka lo kɛnɛ kendana la ditshelo dianyu dia wɔnɔnyi. 7 Lam’elanyu angɛndangɛnda waki kominya mpota lo otema ndo lo alemba oya lo tɛmpɛlɔ kami k’ekila, vɔ mɔnyɔlaka tɛmpɛlɔ kami. Nyu mbelaka mapa anyu, wata ndo dikila, etena katolanyu sheke yami l’ɔtɛ wa ditshelo dianyu tshɛ dia wɔnɔnyi. 8 Nyu konama diangɔ diami di’ekila.+ Koko nyakasha anto akina ɔkɛndɛ wa nkamba elimu lo tɛmpɛlɔ kami k’ekila.”’

9 “‘Nkum’Olongo Nkumadiɔndjɔ Jehowa kata ate: “Ndooko ɔngɛndangɛnda wodjashi lo Isariyɛlɛ laki kominya mpota lo otema ndo lo demba layɔtɔ lo tɛmpɛlɔ kami k’ekila.”’

10 “‘Koko ase Lɛwi wanɛ wakangana la mi+ etena kakangana Isariyɛlɛ la mi dia ndjela dikishi diawɔ dia nyɛtɛɛtɛ* wayodiɛnɛ la etombelo wa kɔlɔ w’oma lo munga kawɔ. 11 Ndo vɔ wayonga ekambi lo tɛmpɛlɔ kami dia namaka asoko wa tɛmpɛlɔ+ ndo dia kambaka olimu lo tɛmpɛlɔ. Vɔ wayodiakaka nyama k’olambo wa lotshumba w’otondo ndo olambo dikambo di’anto ndo vɔ wayemalaka la ntondo k’anto dia mbakambɛ. 12 Lam’ele vɔ wakaakambɛ la ntondo ka dikishi diawɔ dia nyɛtɛɛtɛ ndo wakayokoma otamba wa ntakanya wakakonya luudu la Isariyɛlɛ dia nsala pɛkato,+ diakɔ diamomemɛ lonya lami dia ntshiba lo dikambo diawɔ,’ mbata Nkum’Olongo Nkumadiɔndjɔ Jehowa, ‘ndo vɔ wayodiɛnɛ la etombelo wa kɔlɔ w’oma lo munga kawɔ. 13 Vɔ hawotosukana la mi dia nkamba oko ɛlɔmbɛdi ami kana nsukana l’ɛngɔ kami tshɛ k’ekila kana koleki ekila, ko vɔ wayɔlɔmbɔ la nsɔnyi l’ɔtɛ w’akambo wa wɔnɔnyi wakawasale. 14 Koko dimi layowaetɛ anto wakotsha ɛkɛndɛ wa lo tɛmpɛlɔ, dia nkamba elimu atɔ ndo kɛnɛ tshɛ kahomba salema lɔkɔ.’+

15 “‘Lo dikambo dia ɛlɔmbɛdi w’ase Lɛwi, ana wa Zadɔka,+ wanɛ wakakotshaka ɛkɛndɛ wa lo tɛmpɛlɔ kami k’ekila etena kakangana ase Isariyɛlɛ oma le mi,+ vɔ wayosukanaka la mi dia kambɛmi ndo wayemalaka la ntondo kami dia nambolami wata+ ndo dikila,’+ mbata Nkum’Olongo Nkumadiɔndjɔ Jehowa. 16 ‘Vɔ mbayɔtɔka lo tɛmpɛlɔ kami k’ekila ndo vɔ wayosukanaka la mɛsa ami dia kambɛmi+ olimu ndo vɔ wayokotshaka ɛkɛndɛ awɔ oya le mi.+

17 “‘Etena kayowoyaka lo asoko wa sɛkɛ dia l’etei, vɔ pombaka ndɔta ahɔndɔ+ wa linɛnɛ. Vɔ hawohombe ndɔta ndooko dihɔndɔ dia wɛɔsa wa nyama etena kakambawɔ lo asoko wa sɛkɛ dia l’etei kana l’etei kadiɔ. 18 Vɔ pombaka ndɔta dihɔndɔ dia l’ɔtɛ dia linɛnɛ l’ɛtɛ awɔ ndo kupe ya linɛnɛ pombaka nkomba nkende yawɔ.+ Vɔ hawohombe ndɔta ɛngɔ tshɛ kayowatondja dungu. 19 La ntondo ka vɔ ntomba otsha lo sɛkɛ dia l’andja, ɛɛ, sɛkɛ dia l’andja dia lɛnɛ ele anto, vɔ pombaka nkolola ahɔndɔ wakawakambaki la wɔ olimu l’etei+ ko mbakitsha lo mvudu y’oleelo y’ekila.*+ Oma laasɔ, ko vɔ ndɔta ahɔndɔ akina diaha vɔ nsambiya* anto ekila kawɔ la ahɔndɔ awɔ. 20 Vɔ hawohombe minya hiɔlɔ l’ɛtɛ+ awɔ kana mbodia divo dia l’ɛtɛ awɔ etale. Vɔ pombaka kitshakitshaka divo dia lo ɛtɛ awɔ. 21 Ɛlɔmbɛdi hawohombe nnɔ wanu etena kɔtɔwɔ lo sɛkɛ dia l’etei.+ 22 Vɔ hawohombe ntshuka wadi aki odo kana womoto lakadiake diwala;+ koko vɔ kokaka ntshuka osekaseka w’emuma w’ɔna ose Isariyɛlɛ kana wadi aki ɔlɔmbɛdi wakavu.’+

23 “‘Vɔ pombaka mbetsha anto ami otshikitanu wele lam’asa kɛnɛ kele ekila la kɛnɛ kele bu ekila; ndo vɔ wayowaetsha otshikitanu wele lam’asa kɛnɛ kele mindo la kɛnɛ kele pudipudi.+ 24 Vɔ wayonga oko toshushi lo kilombo;+ vɔ pombaka kilombosha lo yoho yɔtɔnɛ la tɛdikɔ tami ta dombo.+ Vɔ pombaka nama ɛlɛmbɛ ami ndo wadjango ami wendana la fɛtɛ+ yami tshɛ ndo nkidia sabato yami. 25 Vɔ hawohombe nsukana la odo w’onto, diaha vɔ ndjadja mindo. Koko vɔ kokaka ndjadja mindo dikambo dia shɛwɔ, nyangɛwɔ, ɔnawɔ la pami, ɔnawɔ la womoto, ɔnangɛwɔ, kana kadiyɛwɔ kahatatshukama.+ 26 L’ɔkɔngɔ wa wɛdiamelo wa ɔlɔmbɛdi, nshi 7 pombaka mbeta. 27 Lushi layondɔtɔ lo dihole di’ekila, lo sɛkɛ dia l’etei dia nkamba olimu lo dihole di’ekila, nde pombaka nambola olambo ande wa pɛkato,’+ mbata Nkum’Olongo Nkumadiɔndjɔ Jehowa.

28 “‘Etenyi kawɔ k’okitɔ+ tɔ kɛnɛ: Dimi kele etenyi kawɔ k’okitɔ. Hanyohombe mbasha yema nkina lo Isariyɛlɛ, nɛ dia dimi kele yema yawɔ. 29 Vɔ mbayɔlɛka olambo wa ntɔngɔ,+ olambo wa pɛkato ndo olambo w’onongo+ ndo ɛngɔ tshɛ kayokimɔma lo Isariyɛlɛ kayonga kawɔ.+ 30 Kɛnɛ koleki tshɛ dimɛna oma lo ɛlɔnga anyu tshɛ ndo weho tshɛ wa weshasha w’oma le nyu kekɔ kaki ɛlɔmbɛdi.+ Ndo nyu pombaka nkimɔ ɛlɔnga anyu wa ntɔngɔ ya weke le ɔlɔmbɛdi.+ Dui sɔ diayosala dia ɔtshɔkɔ mbidjasɛ le ase luudu layɛ.+ 31 Ɛlɔmbɛdi hawohombe ndɛ fudu kana nyama kakavu osena kana kakandama oma le nyama ka ngala.’+