Habakuka
3 Dɔmbɛlɔ d’omvutshi Habakuka, lo nkembo y’otanda:*
2 Jehowa le, dimi lakoke losango lendana la yɛ.
Jehowa le, dimi lekɔ la wɔma w’etsha ayɛ.
Nyomaasala l’etena kaso!*
Eyanyawɔ l’etena kaso.*
Oohɔ dia tooka kɛtshi l’etena ka lofunguso.+
Lɔnɛnɛ lande lakakombe olongo;+
Nkɛtɛ yakalole la lotombo lande.
4 Ngaingai kande kaki oko osase.+
Esase 2 wakahɛtaka oma lo lonya lande,
Lɛnɛ akashɛma wolo ande.
5 Olando+ wakatatshɔka la ntondo kande,
Ndo demba dja dia wolo diakayayelaka lo ekolo ande.
6 Nde akemala ndo akasutshasutsha nkɛtɛ.+
Wedja wakasake lokomba+ etena kakandawaende.
Akona wa pondjo wakaatatɛ,
Ndo tokonakona t’edjedja takakusama.+
Mboka ya nshi y’edjedja, yande mbeyɔ.
7 Dimi lakɛnyi ofukutanu lo mvudu y’apɛma ya Kushana.
Ahɔndɔ w’apɛma wa lo wodja wa Midiyana wakadidima.+
8 Jehowa le, onde dia ndɔsha ɛkɛdi,
Onde dia ndɔsha ɛkɛdi kalombalomba nkɛlɛ kayɛ?
Kana onde odudu ayɛ wekɔ otsha le ndjale?+
9 Ota ayɛ hawokombami ndo wekɔ suke.
Ekalemba* ayɛ wekɔ kaamɛ la dɔkɔlɔkɔ.* (Sela)
Wɛ kakitolaka nkɛtɛ la ɛkɛdi.
10 Akona wakalana la paa k’efula lam’akawakɛnyi.+
Mvula ngembe kakɔmbɛ.
Dingunda diakadikita la dui+ diadiɔ.
Diɔ diakawedia anya adiɔ la diko.
11 Wonya la ngɔndɔ wakatshikala paka lo ahole awɔ wa la diko.+
Mpito yayɛ yakatshɔka oko osase.+
Dingadimu dia dikɔnga diayɛ diakahɛtɛ.
12 Wɛ akakɛndakɛnda lo nkɛtɛ la yɛnyi.
Wɛ akahɔtshahɔtsha* wedja la nkɛlɛ.
13 Wɛ akatombe dikambo dia panda k’anto ayɛ, dia shimbɛ okitami ayɛ w’esɔ.
Wɛ akaminola ɔnɔmbɔdi* wa luudu la kanga kɔlɔ.
Lɔ lakatombe sɛkɛ oma l’etshina polo lo shɔdi.* (Sela)
14 Wɛ akatondola ɔtɛ w’andɔshi ande wa ta la dihomɔ diande dia ta*
Etena kakawaye oko lɔpɛpɛ la wolo dia ndjompandjola.
Vɔ wakangɛnangɛna efula dia ndɛ ɔmɛnyi mfɔnu lo woshɛshɛ.
15 Wɛ akete lo ndjale la mfalasa yayɛ,
Lo pedu k’ashi w’efula.
16 Dimi lakoke ndo lakasake lokomba l’etei;*
Ɛlɔmɔ ami wakadidima la dui diande.
Ɛhɔndɛlɔ kakɔtɔ lo weka+ ami;
Ekolo ami wakasake lokomba.
Koko dimi lambɔlɛmbɔhala, lakongɛɛ lushi la sui,+
Nɛ dia lɔ lekɔ lo ndjaye le wanɛ watɔlɔsha.
17 Kaanga mbahakoke osongo wa fingo mɔnga,
Ndo mbakoka monga ko elowa bu lo ɛkɔdi wa vinyɔ;
Kaanga mbakoka osongo w’ɔlivɛ nkɔ,
Ndo mbakoka monga ko dikambɔ* hadiɔngɔnyisha diangɔ;
Kaanga mbakoka dongalonga nshila lo lokoto,
Ndo mbakoka ngɔmbɛ nshila lo nkoto;
18 Koko le mi, dimi layɔngɛnangɛnaka le Jehowa;
Dimi layokaka ɔlɔ w’efula le Nzambi ka panda+ kami.
19 Nkum’Olongo Nkumadiɔndjɔ Jehowa ekɔ wolo+ ami;
Nde ayetɛ ekolo ami oko ekolo wa lofumbɔ
Ndo ayosala dia dimi nkɛndakɛnda lo ahole+ wa la diko.
Le ɔnɔmbɔdi; la dihomahoma diami di’eshinga.