Jɛrɛmiya
29 Ɔnɛ ele ɛtɛkɛta wa lo mukanda wakatome omvutshi Jɛrɛmiya oma la Jɛrusalɛma otsha le atshikadi wa dikumanyi dia l’atei w’anto wakawatɔlɛ mfumbe, ɛlɔmbɛdi, amvutshi ndo anto tshɛ wele Nɛbukadinɛza akaatɔlɛ lo lɔhɔmbɔ oma la Jɛrusalɛma otsha la Babilɔna, 2 l’ɔkɔngɔ wa nkumekanga Jɛkɔniya,+ nyango nkumekanga,*+ ɛnɛnɛ wa laka nkumekanga, ewandji wa la Juda ndo wa la Jɛrusalɛma, etshudi ndo etshudi wa yaandjo* ntomba oma la Jɛrusalɛma.+ 3 Nde akatome mukanda lo anya wa Elasa ɔna Shafana+ ndo Ngɛmariya ɔna Hilikiya, wanɛ wele Zɛdɛkiya+ nkumekanga ka Juda akaatome la Babilɔna le Nɛbukadinɛza nkumekanga ka Babilɔna. Mukanda akɔ wakataka ɔnɛ:
4 “Jehowa kanga lolembelembe, Nzambi k’Isariyɛlɛ katɛ anto tshɛ wakawatɔlɛ mfumbe, wanɛ wakamasale dia vɔ ntshɔ lo lɔhɔmbɔ oma la Jɛrusalɛma otsha la Babilɔna ɔnɛ: 5 ‘Nyoke mvudu ndo nyodjasɛ lɔkɔ. Nyokambe dikambɔ ndo nyole elowa w’oma lɔkɔ. 6 Nyotshuke wadi ndo nyote ana w’apami ndo ana wa wamato; nyotshukee ananyu w’apami wadi ndo nyotshukanya ananyu wa wamato dia vɔ la wɔ mbota ana w’apami ndo wa wamato. Nyofulane lɛkɔ ndo tanyokitakitake. 7 Nyoyange wɔladi wa osomba wakamanyɔtɔlɛ lo lɔhɔmbɔ, ndo nyɔlɔmbɛ Jehowa lo wahɔ awɔ, nɛ dia lo wɔladi awɔ mbayonyonga la wɔladi.+ 8 Nɛ dia Jehowa kanga lolembelembe, Nzambi k’Isariyɛlɛ kata ate: “Tanyetawɔke dia amvutshi anyu ndo asadi anyu wa diendja wele l’atei anyu+ nyokesa ndo tanyohokamɛke alɔ wɛnawɔ. 9 Nɛ dia ‘vɔ wekɔ lo nyotɛ prɔfɛsiya ya kashi lo lokombo lami. Dimi kombatoma,’+ mbata Jehowa.”’”
10 “Nɛ dia Jehowa kata ate: ‘Etena kayonyokotsha ɛnɔnyi 70 la Babilɔna, dimi layonyodja yimba+ ndo layokotsha daka diami lo nyokaloya lo dihole nɛ.’+
11 “‘Nɛ dia dimi mbeyaka dimɛna tokanyi takanyiyami dikambo dianyu,’ mbata Jehowa, ‘tokanyi ta wɔladi, koko aha ta mpokoso,+ dia nyosha nshi yayaye ndo elongamelo.+ 12 Nyu nyayombelɛ, nyayoya ndo nyayɔnɔmba, ko dimi layonyohokamɛ.’+
13 “‘Nyu nyayonyanga ndo nyayontana,+ nɛ dia nyu nyayonyanga la etema anyu tshɛ.+ 14 Dimi layetawɔ dia nyu tanami,’+ mbata Jehowa. ‘Ndo dimi layotshumanya anto anyu wele mfumbe, ko layonyotshumanya kaamɛ oma lo wedja tshɛ ndo ahole wakamanyodianganya,’+ mbata Jehowa. ‘Ndo dimi layonyokaloya lo dihole diakamasale dia nyu mimɔ oma lɛkɔ ko ntshɔ otsha lo lɔhɔmbɔ.’+
15 “Koko nyu nyambota ɔnɛ: ‘Jehowa ambototondjiyɛ amvutshi la Babilɔna.’
16 “Nɛ dia Jehowa katɛ nkumekanga kodjashi lo kiti ka lowandji ka Davidɛ+ ndo anto tshɛ wadjasɛ lo osomba ɔnɛ, anangɛnyu waki kotshɔ la nyu lo lɔhɔmbɔ ɔnɛ: 17 ‘Jehowa kanga lolembelembe kata ate: “Dimi layanga mbatomɛ lokuwa la ta, ndjala ka kasha, elando*+ ndo dimi layowaetɛ oko fingo yambɔhɔnda* yele kɔlɔ efula yahakoke ndɛma.”’+
18 “‘Ko dimi layowayela la lokuwa la ta,+ la ndjala ka kasha, la elando ndo dimi layowaetɛ ɛngɔ ka wɔnɔnyi le waolelo tshɛ wa la nkɛtɛ+ ndo mananu la ɛngɔ ka diambo, ɛngɔ ka mbidɛ ekoko, ndo lɔtɛngɔ+ l’atei wa wedja tshɛ wamomaadianganya,+ 19 nɛ dia vɔ kompokamɛ ɛtɛkɛta ami wakamaatomɛ le ekambi ami amvutshi,’ mbata Jehowa, ‘lakawatomaka mbala la mbala.’*+
“‘Koko nyu kompokamɛ,’+ mbata Jehowa.
20 “Ɔnkɔnɛ, nyohokame ɔtɛkɛta wa Jehowa, nyu anto tshɛ wele mfumbe, wanɛ wakamatome oma la Jɛrusalɛma otsha la Babilɔna. 21 Jehowa kanga lolembelembe, Nzambi k’Isariyɛlɛ kata lo dikambo dia Ahaba ɔna Kɔlaya ndo lo dikambo dia Zɛdɛkiya ɔna Maseya, wanɛ wanyotɛ prɔfɛsiya ya kashi lo lokombo lami ɔnɛ:+ ‘Dimi layanga mbakimɔ lo anya wa Nɛbukadinɛza* nkumekanga ka Babilɔna, ko nde ayowadiaka lo washo anyu. 22 Ndo kɛnɛ kayowakomɛ kayonga mananu kayodjanaka ase Juda tshɛ wakɔsama mfumbe oma la Juda otsha la Babilɔna ɔnɛ: “Jehowa aketɛ oko Zɛdɛkiya ndo oko Ahaba, wanɛ wele nkumekanga ka Babilɔna akaatshumbe lo dja!” 23 nɛ dia vɔ wambosala akambo wa nsɔnyi lo Isariyɛlɛ,+ lo nsala loseka la wadi w’asekawɔ ndo lo mbuta ɛtɛkɛta wa kashi lo lokombo lami wakimi kombadjangɛ.+
“‘“Dimi kele Ɔnɛ leya, ndo dimi lekɔ ɔmɛnyi,”+ mbata Jehowa.’”
24 “Kote ndo Shemaya+ ose Nɛhɛlama ɔnɛ: 25 ‘Jehowa kanga lolembelembe, Nzambi k’Isariyɛlɛ kata ate: “Lam’ele wɛ akatome mikanda lo lokombo layɛ le anto tshɛ wele la Jɛrusalɛma, le Zɛfaniya+ ɔna Maseya, ɔlɔmbɛdi ndo le ɛlɔmbɛdi tshɛ ɔnɛ: 26 ‘Jehowa amboketɛ ɔlɔmbɛdi lo dihole dia ɔlɔmbɛdi Jɛhɔyada dia monga omendji wa luudu la Jehowa, dia namaka kanga dadi tshɛ lasala akambo oko omvutshi ndo mbodja lo lowete ndo lo mɔlɔla;*+ 27 ko lande na kahayahangwe Jɛrɛmiya ose Anatɔta,+ lasala akambo oko omvutshi dikambo dianyu?+ 28 Nɛ dia nde akatotomɛ ndo dui la Babilɔna ɔnɛ: “Ayonga etena k’otale! Nyoke mvudu ndo nyodjasɛ lɔkɔ. Nyokambe dikambɔ ndo nyole elowa w’oma lɔkɔ,+ . . .”’”’”
29 Etena kakadia ɔlɔmbɛdi Zɛfaniya+ mukanda ɔsɔ lo atoyi w’omvutshi Jɛrɛmiya, 30 ɔtɛkɛta wa Jehowa wakaye le Jɛrɛmiya ɔnɛ: 31 “Tomɛ anto tshɛ wele mfumbe dui ɔnɛ: “Jehowa kata lo dikambo dia Shemaya ose Nɛhɛlama ate: “Lam’ele Shemaya akanyotɛ prɔfɛsiya etena kele dimi kombotoma, ndo nde akahembe nyokonya dia nyu ndjaɛkɛ lo awui wa kashi,+ 32 ɔnkɔnɛ Jehowa kata ate: ‘Dimi layanga mbidja Shemaya ose Nɛhɛlama ndo tokanula tande yimba. Ndooko onto ande ɔtɔi layoka l’atei w’anto anɛ, ndo nde hɛɛna ɔlɔlɔ wayomosalɛ anto ami,’ mbata Jehowa, ‘nɛ dia nde ambokeketsha anto dia tɔmbɔkwɛ Jehowa.’”’”