2 Nkumi ya dikanga
22 Jɔsiya+ aki l’ɛnɔnyi 8 lam’akandayala nkumekanga ndo nde akolɛ l’edja k’ɛnɔnyi 31 la Jɛrusalɛma.+ Nyango lokombo lande Jedida ɔna Adaya ose Bozɛkata.+ 2 Nde akasalaka kɛnɛ kaki ɔlɔlɔ lo washo wa Jehowa, akakɛndakɛnda lo mboka tshɛ ya Davidɛ tshɛnde,+ ndo nde kotakɔ mboka lo ntshɔ lo lonya l’omi kana la lɔmɔsɔ.
3 L’ɔnɔnyi wa 18 w’ɛlɔmbwɛlɔ ka nkumekanga Jɔsiya, nkumekanga akatome Shafana laki ofundji, ɔna Azaliya ɔna Meshulama otsha lo luudu la Jehowa,+ ata ate: 4 “Tshɔka le Hilikiya+ ɔlɔmbɛdi a laadiko kele towote asanganya falanga tshɛ yele lo luudu la Jehowa+ yakakɔngɔla alami w’asoko oma le anto.+ 5 Wayisha wanɛ wele la ɔkɛndɛ wa nɔmbɔla elimu wa lo luudu la Jehowa kele vɔ la wɔ watoyisha wanɛ wakamba elimu lo luudu la Jehowa, wanɛ wahomba nɔngɔsɔla ahole wambolana* luudu,+ 6 mbuta ate etshudi, ambiki ndo waa masɔ. Vɔ kawokambe la yɔ dia nsomba esongo ndo ave wa lɔkɔlɔnga dia nɔngɔsɔla luudu+ lakɔ. 7 Koko hawotosala la wɔ owadi la falanga yawashawɔ, nɛ dia vɔ wekɔ anto wakoka mbɛkɛ otema le wɔ.”+
8 L’ɔkɔngɔ diko, Hilikiya ɔlɔmbɛdi a laadiko akatɛ Shafana laki ofundji+ ate: “Lamboshola dibuku di’Ɛlɛmbɛ+ lo luudu la Jehowa.” Ko Hilikiya akasha Shafana dibuku diakɔ ndo nde akatatɛ diadia.+ 9 Oma laasɔ, ofundji Shafana akatshu le nkumekanga ndo akatowotɛ ate: “Ekambi ayɛ wambotondja falanga yaki lo luudu la Jehowa ndo wamboyisha wanɛ wele la ɔkɛndɛ wa nɔmbɔla elimu wa lo luudu la Jehowa.”+ 10 Ofundji Shafana akatɛ nkumekanga nto ate: “Ɔlɔmbɛdi Hilikiya akambisha ndo dibuku+ nɛ.” Ko Shafana akatatɛ diadia la ntondo ka nkumekanga.
11 Kam’akoke nkumekanga awui waki lo dibuku di’Ɛlɛmbɛ, nde akaatshatsha ahɔndɔ ande.+ 12 Oma laasɔ, nkumekanga akadjangɛ ɔlɔmbɛdi Hilikiya, Ahikama+ ɔna Shafana, Akɛbɔrɛ ɔna Mikaya, Shafana laki ofundji ndo Asaya laki okambi wa nkumekanga ate: 13 “Nyotshu nyotombole Jehowa kanyi lo dikambo diami, lo dikambo dia wodja ndo lo dikambo dia Juda y’otondo lo kɛnɛ kendana la dibuku nɛ diambɛnama, nɛ dia nkɛlɛ ka Jehowa kadɔdɔ katokande kekɔ efula+ dikambo watshɛso kokitanyiya awui wele lo dibuku nɛ lo ndjela kɛnɛ tshɛ kofundami lɔkɔ lo dikambo diaso.”
14 Ko ɔlɔmbɛdi Hilikiya, Ahikama, Akɛbɔrɛ, Shafana ndo Asaya wakatshu le Huluda omvutshi wa womoto.+ Nde aki wadi aki Shaluma ɔna Tikiva ɔna Harasɛ laki la ɔkɛndɛ wa ntɛla ahɔndɔ ndo nde akadjasɛka lo Ɛtshi ka nkɛtɛ ka 2 ka la Jɛrusalɛma, ko vɔ wakatosawola la nde lɛkɔ.+ 15 Womoto akɔ akawatɛ ate: “Jehowa Nzambi k’Isariyɛlɛ kata ate: ‘Nyotote pami kakanyotomi le mi nyate: 16 “Jehowa kata ate: ‘Dimi layanga mbela mpokoso lo dihole nɛ ndo le anto wodjashi lɔkɔ, awui tshɛ wele lo dibuku diambadia nkumekanga ka Juda.+ 17 Lam’ele vɔ wambomboka ɔkɔngɔ ndo wekɔ lo tshumbɛ tozambizambi+ tokina elambo dia mbotshami nkɛlɛ la elimu w’anya awɔ+ tshɛ, nkɛlɛ kami kadɔdɔ kayoya lo dihole nɛ ndo tɔ hatokitakita.’”+ 18 Koko kanyote nkumekanga ka Juda lakanyotomi dia ndjombola Jehowa kanyi nyate: “Jehowa Nzambi k’Isariyɛlɛ kata ate: ‘Lo kɛnɛ kendana l’awui wamboyoka, 19 lam’ele otema ayɛ wambonandema* ndo wɛ amboyakitshakitsha+ la ntondo ka Jehowa lam’okiyɛ kɛnɛ kakamate lo dikambo dia dihole nɛ ndo di’anto wodjashi lɔkɔ nte: Vɔ wayonga ɛngɔ ka lɔsɔkɔ ndo ka mananu, ko wɛ ambatshatsha ahɔndɔ+ ayɛ ndo ambolela la ntondo kami, dimi lawɔ lambokooka, mbata Jehowa. 20 Diakɔ diele dimi layosala dia wɛ ndjela watshɛyɛ* ndo wɛ ayetama lo diombo diayɛ la ki, ndo washo ayɛ hawotɛna mpokoso tshɛ yayomela lo dihole nɛ.’”’” Ko vɔ wakatɔlɛ nkumekanga okadimwelo akɔ.