1 Ɛkɔndɔ

11 Oma laasɔ, ase Isariyɛlɛ tshɛ wakasangana le Davidɛ la Hɛbɛrɔna,+ ko wakate vate: “Eenda, sho tekɔ weka ayɛ ndo emunyi ayɛ.*+ 2 Lo nshi yakete, lam’aki Saolo nkumekanga, wɛ kakalɔmbɔlaka Isariyɛlɛ lo ata.*+ Ndo Jehowa akakotɛ ate: ‘Wɛ ayolama wodja ami w’Isariyɛlɛ ndo wɛ ayonga ɔnɔmbɔdi w’Isariyɛlɛ.’”+ 3 Ko dikumanyi tshɛ dia l’Isariyɛlɛ wakaye le nkumekanga la Hɛbɛrɔna ndo Davidɛ akadje sheke kaamɛ la wɔ la Hɛbɛrɔna la ntondo ka Jehowa. Oma laasɔ, vɔ wakakite Davidɛ esɔ dia nde monga nkumekanga k’Isariyɛlɛ,+ lo ndjela ɔtɛkɛta wa Jehowa wakandate lo tshimbo ya Samuɛlɛ.+

4 L’ɔkɔngɔ diko, Davidɛ nde l’ase Isariyɛlɛ tshɛ wakatshu la Jɛrusalɛma, mbuta ate la Jɛbusɛ+ lɛnɛ ele ase Jɛbusɛ+ wakadjasɛka lo ɛtshi ka nkɛtɛ kakɔ. 5 Ase Jɛbusɛ wakasɔkɛ Davidɛ vate: “Wɛ hakomaki pondjo lanɛ!”+ Koko Davidɛ akaamamala la longele la Siɔna+ lele nshi nyɛ Osomba wa Davidɛ.+ 6 Ɔnkɔnɛ Davidɛ akate ate: “Ɔnɛ layotatɛ ndɔsha ase Jɛbusɛ kayonga owandji* ndo ɔlɔhɛ.” Jɔaba+ ɔna Zeruya akatshu ntondo, ko nde akayala owandji. 7 Oma laasɔ, Davidɛ akatodjasɛ lo longele lakɔ, diakɔ dialielɛwɔ Osomba wa Davidɛ. 8 Nde akatatɛ mbika osomba l’otshimbedi w’otondo oma la Milo* polo lo ahole wokidingi, ndo Jɔaba akalɔngɔsɔla ahole akina wa l’osomba. 9 Ɔnkɔnɛ, Davidɛ akatahamaka mpama tsho+ ndo Jehowa kanga lolembelembe aki kaamɛ la nde.

10 Ewandji w’andɔshi wa ta wa wolo waki Davidɛ wakoosukɛ wolo lo lowandji lande kaamɛ la Isariyɛlɛ w’otondo dia mbeetɛ nkumekanga lo ndjela ɔtɛkɛta wa Jehowa lo dikambo dia Isariyɛlɛ.+ 11 Andɔshi wa ta wa wolo waki Davidɛ vɔ anɛ: Jashobeama+ ɔna Hakimɔni, ɔtɛ w’asato.+ Nde akoke dikɔnga diande, ko akadiake anto 300 mbala ɔtɔi.+ 12 Oma lalende ko Eleazara+ ɔna Dodo ose Ahɔhi.+ Nde aki l’atei w’andɔshi wa ta wa wolo 3. 13 Nde aki kaamɛ la Davidɛ la Pasɛ-Damima+ lɛnɛ akasangana ase Filistiya dia ndɔ ta. Ekambɔ kɛmɔtshi kaki laawɔ kakalole tɔɔ la asami ko anto wakalawɔ l’ɔtɛ w’ase Filistiya. 14 Koko nde akemala l’atei w’ekambɔ kakɔ, akakikokɛ ndo akatetemala ndjaka ase Filistiya, ko Jehowa akadje otshumba*+ wa woke.

15 Anto 3 l’atei w’ewandji 30 wakaholɔ otsha lo dive le Davidɛ lo wooko wa Adulama+ etena kakake asɔlayi w’ase Filistiya mpango kawɔ lo Okidi* wa Rɛfayima.+ 16 L’etena kɛsɔ, Davidɛ aki lo longele ndo olui w’asɔlayi w’ase Filistiya waki la Bɛtɛlɛhɛma. 17 Ko Davidɛ akakɛnɛmɔla nsaki kaki la nde ate: “Otomonga la akoka wa nnɔ yema y’ashi wele lo difuku di’ashi diele suke la soko dia Bɛtɛlɛhɛma lee!”+ 18 Ko andɔshi wa ta wa wolo 3 wakete lo mpango k’ase Filistiya la wolo, wakatotahola ashi lo difuku di’ashi diele suke la soko dia Bɛtɛlɛhɛma, ko wakela le Davidɛ; koko Davidɛ akatone mbanɔ ndo akawatsholɛ Jehowa. 19 Nde akate ate: “Nzambi le, dimi bu la kanyi ya nsala dui dia nganɛ! Onde dimi pombaka nnɔ dikila di’apami anɛ wakatshwe todja nsɛnɔ*+ yawɔ lo waale? Nɛ dia vɔ wakadji nsɛnɔ* yawɔ lo waale dia toya la wɔ.” Ko nde akatone mbanɔ. Akambo asɔ mbakasale andɔshi ande wa ta wa wolo 3.

20 Abishai+ ɔnango Jɔaba+ aki owandji w’andɔshi wa ta wa wolo akina 3. Nde akoke dikɔnga diande, ko akadiake anto 300 ndo nde aki la lokumu lele oko la andɔshi wa ta wa wolo akɔ 3.+ 21 L’atei w’andɔshi wa ta wa wolo akina 3, nde kakaleke 2 akina ndo nde kaki owandji awɔ, koko nde kokoma l’ɔnɔngɔ w’andɔshi wa ta wa wolo 3 wa ntondo.

22 Bɛnaya+ ɔna Jɛhɔyada aki pami ka dihonga* kakasale akambo efula wa diambo la Kabizɛlɛ.+ Nde akadiake ana w’apami 2 wa Ariyɛlɛ wa la Mɔaba, ko nde akaholɔ lo difuku di’ashi lushi laki loonge l’ekama, ko akadiake ntambwɛ.+ 23 Nde akadiake ndo pami kɛmɔtshi k’ose Edjibito ka dikongote dia mamba kaki la otale wa kubita 5.*+ Kaanga mbaki ose Edjibito akɔ la dikɔnga diele oko osembe w’osadi w’adiba lo lonya lande,+ nde akatshu la okalemba dia tɔɔlɔsha ndo akahɔtɔla ose Edjibito akɔ dikɔnga diaki lo lonya lande, ko akoodiake la dikɔnga diande hita.+ 24 Akambo asɔ mbakasale Bɛnaya ɔna Jɛhɔyada, ndo nde aki la lokumu lele oko l’andɔshi wa ta wa wolo 3. 25 Kaanga mbakandaleke apami akina 30, nde kokoma l’ɔnɔngɔ w’andɔshi wa ta wa wolo 3.+ Koko Davidɛ akɔɔsɔnɛ owandji w’alami ande.

26 Asɔlayi waki andɔshi wa ta wa wolo vɔ anɛ: Asahɛlɛ+ ɔnango Jɔaba, Elehanana ɔna Dodo ose Bɛtɛlɛhɛma,+ 27 Shamɔta ose Harɔrɛ, Helɛzɛ ose Pelɔna, 28 Ira+ ɔna Ikɛshɛ ose Tekoa, Abiɛzɛrɛ+ ose Anatɔta, 29 Sibekai+ ose Husha, Ilai ose Ahɔhi, 30 Maharai+ ose Netɔfa, Helɛdɛ+ ɔna Baanahɛ ose Netɔfa, 31 Itai ɔna Ribai ka la Ngibɛa k’aseka Bɛnjamina,+ Bɛnaya ose Piratɔna, 32 Hurai wa l’okidi w’ashi* wa Ngashɛ,+ Abiyɛlɛ ose Arba, 33 Azɛmavɛta ose Bahurima, Eliyaba ose Shalabɔna, 34 ana w’apami wa Hashɛma ose Ngizona, Jɔnatana ɔna Shange ose Hararɛ, 35 Ahiyamɛ ɔna Sakara ose Hararɛ, Elifala ɔna Ura, 36 Hefɛrɛ ose Mɛkɛra, Ahidja ose Pelɔna, 37 Heziro ose Karamɛlɛ, Narai ɔna Ezibai, 38 Jɔɛlɛ ɔnango Natana, Mibihara ɔna Hangiri, 39 Zɛlɛkɛ ose Amɔna, Naharai ose Berɔtɛ, ɔmɛmbi wa dihomɔ dia ta diaki Jɔaba ɔna Zeruya; 40 Ira ose Itiri, Ngarɛba ose Itiri, 41 Uriya+ ose Hiti, Zabada ɔna Alai, 42 Adina ɔna Shiza oseka Rubɛna laki owandji w’aseka Rubɛna ndo anto 30 waki kaamɛ la nde; 43 Hanana ɔna Maaka, Jɔshafata ose Mitini, 44 Uzia ose Ashitarɔta, Shama nde la Jeyɛlɛ, ana wa Hɔtama ose Aroɛrɛ; 45 Jɛdiyaɛlɛ ɔna Shimiri, ndo Joha ɔnango ose Tizi; 46 Eliyɛlɛ ose Mahava, Jɛribai nde la Jɔshaviya ana wa Elenama, ndo Itima ose Mɔaba; 47 Eliyɛlɛ, Ɔbɛdɛ ndo Jasiyɛlɛ ose Mezɔba.