1 Nkumi ya dikanga

22 Ta komonga lam’asa ase Suriya l’ase Isariyɛlɛ l’edja k’ɛnɔnyi 3. 2 L’ɔnɔnyi wa 3, Jɛhɔshafata+ nkumekanga ka Juda akatshu le nkumekanga k’Isariyɛlɛ.+ 3 Ko nkumekanga k’Isariyɛlɛ akatɛ ekambi ande ate: “Shi nyu mbeyaka dia Ramɔta-Ngiliyadɛ+ ekɔ osomba aso? Koko taakengenga dia mbowɔsa oma le nkumekanga ka Suriya.” 4 Oma laasɔ, nde akatɛ Jɛhɔshafata ate: “Onde wɛ ayotshɔ kaamɛ la mi dia tɔlɔsha Ramɔta-Ngiliyadɛ?” Jɛhɔshafata akakadimola nkumekanga k’Isariyɛlɛ ate: “Dimi lekɔ oko wɛ. Anto ami wekɔ oko anto ayɛ. Mfalasa yami yekɔ oko mfalasa yayɛ.”+

5 Koko Jɛhɔshafata akatɛ nkumekanga k’Isariyɛlɛ ate: “Lam’alangayɛ, tokotambodi+ ntondo kanyi ya Jehowa.”+ 6 Ko nkumekanga k’Isariyɛlɛ akatshumanya amvutshi, apami oko 400 ko akawambola ate: “Onde ntshu tɔlɔsha Ramɔta-Ngiliyadɛ, kana ntshike?” Vɔ wakate vate: “Tshɔka, Jehowa ayowokimɔ lo anya wa nkumekanga.”

7 Oma laasɔ, Jɛhɔshafata akate ate: “Onde ndooko omvutshi okina wa Jehowa lanɛ kele tombole Nzambi kanyi lo tshimbo yande?”+ 8 Ko nkumekanga k’Isariyɛlɛ akatɛ Jɛhɔshafata ate: “Onto 1 kambotshikala lakokaso mimbola Jehowa kanyi,+ koko dimi mbohetshaka,+ nɛ dia nde hataka prɔfɛsiya y’ɛlɔlɔ lo dikambo diami, paka ya kɔlɔ tsho.+ Lokombo lande ko Mikaya ɔna Imila.” Koko Jɛhɔshafata akate ate: “Nkumekanga hahombe mbuta dui dia ngasɔ.”

9 Ko nkumekanga k’Isariyɛlɛ akelɛ ɔnɛnɛ ɔmɔtshi ko akawotɛ ate: “Tshɔka toye la Mikaya ɔna Imila yema esadi.”+ 10 Nkumekanga k’Isariyɛlɛ nde la Jɛhɔshafata nkumekanga ka Juda wakadjasɛ onto l’onto lo kiti kande ka lowandji, wɔlɔtshi ahɔndɔ wa lowandji lo dihole di’esuswelo dia lo ɛɔtwɛlɔ ka soko dia Samariya ndo amvutshi tshɛ wakataka prɔfɛsiya la ntondo kawɔ.+ 11 Ko Zɛdɛkiya ɔna Kɛnana akayasalɛ nseke ya mbolo ko akate ate: “Jehowa kata ate: ‘La diangɔ nɛ kayoyohomuya* ase Suriya polo lam’ayoyaashila oshiki.’” 12 Amvutshi akina tshɛ wakataka prɔfɛsiya kakɔ kaamɛ vate: “Tshɔka la Ramɔta-Ngiliyadɛ, ko wɛ ayotɔlɛndja. Jehowa ayokikimɔ lo anya wa nkumekanga.”

13 Ko ɔkɛndji wakatshu dia telɛ Mikaya akawotɛ ate: “Eenda, amvutshi tshɛ wekɔ lo nsanga lolemi dia nkumekanga ntshɔ. Lam’alangayɛ, kɛnɛ kayoyota kɔtɔne la kɛnɛ katawɔ ndo kote awui w’amɛna.”+ 14 Koko Mikaya akate ate: “Lo mɛtɛ oko wele Jehowa la lɔsɛnɔ, kɛnɛ tshɛ kayombutɛ Jehowa kayomota.” 15 Oma laasɔ, nde akɔtɔ le nkumekanga, ko nkumekanga akawombola ate: “Mikaya, onde totshu dia tɔlɔsha Ramɔta-Ngiliyadɛ, kana totshike?” Mbala kakɔ ɔtɔi nde akakadimola ate: “Tshɔka, ko wɛ ayotɔlɛndja. Jehowa ayokikimɔ lo anya wa nkumekanga.” 16 Ko nkumekanga akawotɛ ate: “Mbala ngana yahombami kotshibia dia wɛ mbutɛmi paka kɛnɛ kele mɛtɛ lo lokombo la Jehowa?” 17 Ko nde akate ate: “Lekɔ lo mɛna ase Isariyɛlɛ tshɛ wambohandjɔnɛ lo akona+ oko ɛkɔkɔ waha la olami. Jehowa akate ate: ‘Vɔ keema la owandji. Onto l’onto akalole lo luudu lande la ki.’”

18 Oma laasɔ, nkumekanga k’Isariyɛlɛ akatɛ Jɛhɔshafata ate: “Onde dimi hakote nte: ‘Nde hatota prɔfɛsiya k’ɔlɔlɔ lo dikambo diami, paka ka kɔlɔ’?”+

19 Ko Mikaya akate ate: “Ɔnkɔnɛ, hokamɛ ɔtɛkɛta wa Jehowa: Dimi lakɛnyi Jehowa odjashi lo kiti kande ka lowandji+ ndo alembe tshɛ wa l’olongo wemadi suke la nde, lo lonya lande l’omi ndo lo lonya lande la lɔmɔsɔ.+ 20 Oma laasɔ, Jehowa akate ate: ‘Akɔna ayokesa Ahaba dia nde ntshɔ kele atovu la Ramɔta-Ngiliyadɛ?’ Ko ɔnɛ ate nganɛ ndo okina ate nganɛ. 21 Ko nyuma*+ kɛmɔtshi akatombe ndo akemala la ntondo ka Jehowa, ko akate ate: ‘Dimi layowokesa.’ Jehowa akawombola ate: ‘Ngande wayoyosala dui sɔ?’ 22 Nde akakadimola ate: ‘Dimi layotshɔ, ko layonga nyuma ka lokeso lo enyɔ w’amvutshi ande tshɛ.’+ Ko nde akate ate: ‘Wɛ ayowokesa ndo kɛnɛ koleki ele, wɛ ayotondoya. Tshɔka, tosale ngasɔ.’ 23 Wonya ɔnɛ, Jehowa akadjisha nyuma ka lokeso lo enyɔ w’amvutshi ayɛ anɛ tshɛ,+ koko Jehowa akewoya mpokoso lo dikambo diayɛ.”+

24 Ko Zɛdɛkiya ɔna Kɛnana akasukana, akakɔmɔla Mikaya lo tama ndo akate ate: “Lo mboka kakɔna komwe nyuma ka Jehowa oma le mi dia ntɛkɛta la yɛ?”+ 25 Mikaya akakadimola ate: “Eenda, wɛ ayɛna mboka kakɔ lushi layoyɔtɔ lo luudu loleki l’etei dia ndjashɛ.” 26 Ko nkumekanga k’Isariyɛlɛ akate ate: “Ɔsa Mikaya, kaloyande le Amɔna owandji w’osomba ndo le Jɔashi ɔna nkumekanga. 27 Tɛwɔ wate: ‘Nkumekanga kata ate: “Nyodje ɔlɔngɔ ɔnɛ lo lokanu+ ndo nyowoshake yema ya mapa tshitshɛ la ashi wa nnɔ polo lam’ayomokalola la ki.”’” 28 Koko Mikaya akate ate: “Naka wɛ nkalola la ki, kete Jehowa hatɛkɛtshi la mi.”+ Ko nde akakotsha ate: “Anto tshɛ nyodje yimba lo dikambo sɔ.”

29 Ko nkumekanga k’Isariyɛlɛ nde la Jɛhɔshafata nkumekanga ka Juda wakadɛ otsha la Ramɔta-Ngiliyadɛ.+ 30 Nkumekanga k’Isariyɛlɛ akatɛ Jɛhɔshafata ate: “Dimi layanga ntshikitanya ɛnamelo kami kele ntshu lo ta, koko wɛ kɔlɔtɛ ahɔndɔ ayɛ wa lowandji.” Ɔnkɔnɛ, nkumekanga k’Isariyɛlɛ akatshikitanya ɛnamelo kande,+ ko akatshu lo ta. 31 Nkumekanga ka Suriya akadjangɛ ɛnɔmbɔdi ande 32 wa pusupusu ate:+ “Tanyɔlɔshake onto okina tshɛ, oyadi la tshitshɛ kana la woke, paka nkumekanga k’Isariyɛlɛ.” 32 Kam’akɛnyi ɛnɔmbɔdi wa pusupusu Jɛhɔshafata, vɔ wakatanɛ vate: “Ndooko onyake ongo kele nkumekanga k’Isariyɛlɛ.” Ko vɔ wakakadimɔ dia mbɔlɔsha ndo Jɛhɔshafata akatatɛ ndela dia nyanga ekimanyielo. 33 Lam’akɛnyi ɛnɔmbɔdi wa pusupusu dia aha nde kele nkumekanga k’Isariyɛlɛ, mbala kakɔ ɔtɔi vɔ wakatshike mboyela.

34 Koko pami kɛmɔtshi akoke dikuwa diande wokoka,* ko diakatotshieta nkumekanga k’Isariyɛlɛ lam’asa asɔnga wa dikɔti diande dia mbolo dia mposo mposo. Ko nkumekanga akatɛ ɔnɛ lakatakɛndjakɛndjaka pusupusu kande ate: “Kadimɔ kele ominya oma lo ta,* nɛ dia lambohomɔ wolo.”+ 35 Ta diaki wolo lushi lɔsɔ l’otondo ndo wakasungukadia nkumekanga lo pusupusu, mbɛlanɛ l’ase Suriya. Dikila diakakɛlaka oma lo mpota diakakɔka l’etei ka pusupusu ka ta, ko nde akavu la dikɔlɔ.+ 36 Wonya otsha la todja, wakawelɛ lo mpango k’otondo ɔnɛ: “Onto tshɛ akalole lo osomba ande! Onto tshɛ akalole lo ɛtshi kande ka nkɛtɛ!”+ 37 Ɔnkɔnɛ, nkumekanga akavu ko wakɔɔtɔlɛ la Samariya. Vɔ wakakundɛ nkumekanga la Samariya. 38 Lam’akawasole pusupusu ka ta lo difuku di’ashi dia la Samariya, mfɔ yakalɔmbɔla dikila diande ndo numba yakɔkɛ laawɔ,* lo ndjela ɔtɛkɛta wakate Jehowa.+

39 Lo kɛnɛ kendana l’etenyi kekina k’ɔkɔndɔ wa Ahaba, kɛnɛ tshɛ kakandasale, luudu* la ewanga+ lakandake ndo esomba tshɛ wakandake, shi awui asɔ fundama lo dibuku di’ɔkɔndɔ wa tena dia nkumi ya dikanga y’Isariyɛlɛ? 40 Oma laasɔ, Ahaba aketama dia momuya kaamɛ la watshɛnde.+ Ko ɔnande Ahaziya+ akayala nkumekanga lo dihole diande.

41 Jɛhɔshafata+ ɔna Asa akayala nkumekanga ka Juda lo ɔnɔnyi wa 4 w’ɛlɔmbwɛlɔ ka Ahaba nkumekanga k’Isariyɛlɛ. 42 Jɛhɔshafata aki la ɛnɔnyi 35 lam’akandayala nkumekanga ndo nde akolɛ l’edja k’ɛnɔnyi 25 la Jɛrusalɛma. Nyango lokombo lande Azuba, ɔna Shilihi. 43 Nde akakɛndakɛndaka lo mboka tshɛ yaki Asa+ wa she. Nde kontakɔ mboka kakɔ ndo nde akasalaka kɛnɛ kaki ɔlɔlɔ lo washo wa Jehowa.+ Koko ahole wa la diko kominyɛma ndo anto wakatetemala nambola ndo ntshumba elambo lo ahole wa la diko.+ 44 Jɛhɔshafata aki la diɔtɔnganelo dia wɔladi lam’asande la nkumekanga k’Isariyɛlɛ.+ 45 Lo kɛnɛ kendana l’etenyi kekina k’ɔkɔndɔ wa Jɛhɔshafata, akambo wa wolo wakandasale ndo woho wakandalɔsha ta, shi awui asɔ fundama lo dibuku di’ɔkɔndɔ wa tena dia nkumi ya dikanga ya Juda? 46 Ndo nto, nde akanya numba y’apami+ ya lo tɛmpɛlɔ oma lo wodja, yakatshikala lo nshi ya Asa wa she.+

47 Oma laasɔ, ndooko nkumekanga kaki lo Ɛdɔmɛ.+ Kapita kɛmɔtshi kakalɔmbɔlaka oko nkumekanga.+

48 Jɛhɔshafata akasale ndo masuwa wa Tarashishi* dia ntshɔ otsha la Ɔfira dikambo dia paonyi,+ koko vɔ kotshɔ nɛ dia masuwa akɔ wakahandjɔ la Eziɔna-Ngɛbɛrɛ.+ 49 L’etena kɛsɔ mbakatɛ Ahaziya ɔna Ahaba Jɛhɔshafata ate: “Etawɔ dia ekambi ami ntshɔ kaamɛ la ekambi ayɛ lo masuwa,” koko Jɛhɔshafata kombetawɔ.

50 Oma laasɔ, Jɛhɔshafata aketama dia momuya kaamɛ la watshɛnde+ ko wakokundɛ lale watshɛnde l’Osomba wa Davidɛ dia tshɛnde. Ko ɔnande Jɛhɔrama+ akayala nkumekanga lo dihole diande.

51 Ahaziya+ ɔna Ahaba akayala nkumekanga k’Isariyɛlɛ la Samariya lo ɔnɔnyi wa 17 w’ɛlɔmbwɛlɔ ka Jɛhɔshafata nkumekanga ka Juda, ko nde akolɛ Isariyɛlɛ ɛnɔnyi 2. 52 Nde akasalaka kɛnɛ kaki kɔlɔ lo washo wa Jehowa ndo akakɛndakɛndaka lo mboka ka she+ la nyango,+ ndo lo mboka ka Jɛrɔbɔama ɔna Nebatɛ lakakonya Isariyɛlɛ dia nsala pɛkato.+ 53 Nde akatetemala kambɛ Baala+ ndo akookusamɛka ndo nde akatetemala mbokiya Jehowa Nzambi k’Isariyɛlɛ nkɛlɛ,+ oko wakasale she.