1 Samuɛlɛ

20 Oma laasɔ, Davidɛ akalawɔ oma la Nayɔta ka la Rama. Koko nde akatshu le Jɔnatana ndo akate ate: “Amomosala?+ Munga kakɔna kamomosala ndo pɛkato kakɔna kamomosalɛ papa kayɛ kayangande lɔsɛnɔ* lami?” 2 Ko Jɔnatana akawotɛ ate: “Dimi haafɔnya!+ Wɛ hatovɔ. Papa hatosala ndooko dikambo, oyadi dia tshitshɛ kana dia woke ko nde hambisholediɔ. Lande na katombishɛ papa dikambo dia ngasɔ? Dui sɔ hadiotosalema.” 3 Koko Davidɛ akatshibe nto ate: “Lo mɛtɛ, papa kayɛ mbeyaka dia dimi lambohomɔ lokolo l’ɔlɔ lo washo+ ayɛ ndo nde ayota ate: ‘Jɔnatana hahombe mbeya dikambo nɛ, nɛ dia diɔ diayowotshindja wɔɔngɔ.’ Koko lo mɛtɛ oko wele Jehowa la lɔsɛnɔ ndo oko weyɛ* la lɔsɛnɔ, ambontshikalɛ paka nna 1 to dia dimi mvɔ!”+

4 Ko Jɔnatana akatɛ Davidɛ ate: “Kɛnɛ tshɛ kayoyombutɛ,* dimi layokosalɛtɔ.” 5 Davidɛ akatɛ Jɔnatana ate: “Loyi ekɔ valelo ya ngɔndɔ+ ndo wekɔ lo nongamɛ l’eshikikelo tshɛ dia dimi layodjasɛ kaamɛ la nkumekanga dia ndɛ. Wɛ pombaka ndawoyami kele ntoyashɛ l’oswe polo la dikɔlɔ dia lushi la 3. 6 Naka papa kayɛ aya la ohomba ami, ko wɛ mbotɛ wate: ‘Davidɛ akanɔmbɛ lotshungɔ dia nde ntshɔ yema esadi l’osomba awɔ wa Bɛtɛlɛhɛma+ dia tolambola olambo w’ɔnɔnyi l’ɔnɔnyi nde la nkumbo+ kande k’otondo lɛkɔ.’ 7 Naka nde ambokadimola ate: ‘Ekɔ dimɛna,’ kete wɔladi wekɔ le okambi ayɛ. Ko naka nde ambomala, kete eya dia nde ambɔsa yɛdikɔ ya salɛmi kɔlɔ. 8 Ɛnya okambi+ ayɛ ngandji ka kɔlamelo, nɛ dia wɛ+ akadje la okambi ayɛ sheke la ntondo ka Jehowa. Ko naka dimi lekɔ la onongo,+ kete ondjake wɛmɛ. Lande na katoyonkaloya le papa kayɛ?”

9 Ko Jɔnatana akate ate: “Haafɔnya dia dikambo dia ngasɔ koka kokomɛ! Naka lambeya dia papa ambɔsa yɛdikɔ ya kosalɛ kɔlɔ, shi layokotɛ?”+ 10 Oma laasɔ, Davidɛ akatɛ Jɔnatana ate: “Akɔna ayombutɛ dia kana papa kayɛ ambokosha okadimwelo wa kɔlɔ?” 11 Jɔnatana akatɛ Davidɛ ate: “Yete totshu otsha l’oswe.” Ko vɔ akɔ 2 wakatshu l’oswe. 12 Jɔnatana akatɛ Davidɛ ate: “Jehowa Nzambi k’Isariyɛlɛ onge ɔmɛnyi dia dimi layombola papa loyi kana lushi la 3 oya lo wonya ɔnɛ. Naka nde kɔngɛnangɛnaka, shi dimi layokotomɛ dui ndo layokosholɛ dikambo sɔ? 13 Ko naka papa ekɔ lo nkongɛ dia kosalɛ kɔlɔ, Jehowa kambisha dilanya dia wolo naka dimi hankoshole dui sɔ ndo hankolawoyisha la ki. Jehowa onge kaamɛ la yɛ,+ oko wakinde kaamɛ la papa.+ 14 Shi wɛ ayɔmɛnya ngandji ka kɔlamelo kaki Jehowa etena kekemi la lɔsɛnɔ ndo kaanga lam’ayomovɔ?+ 15 Tonyake ngandji kayɛ ka kɔlamelo oma le ase luudu+ lami pondjo, oyadi kaanga Jehowa amboshila atunyi wa Davidɛ tshɛ oshiki oma la nkɛtɛ.” 16 Ko Jɔnatana akadje sheke nde la luudu la Davidɛ, ata ate: “Jehowa ayokoya l’atunyi wa Davidɛ.” 17 Jɔnatana akatshibia Davidɛ nto lo ngandji kakandawokaka, nɛ dia nde akoolangaka oko wayalangande.*+

18 Oma laasɔ, Jɔnatana akawotɛ ate: “Loyi ekɔ valelo ya ngɔndɔ+ ndo wayonga l’ohomba ayɛ, nɛ dia dihole diayɛ diayonga hwe. 19 Lushi la 3, wayoleka monga l’ohomba ayɛ ndo wɛ pombaka ndja lo dihole diakayayashɛ lushi lokina* ndo ntshikala suke la dive diele lanɛ. 20 Oma laasɔ, dimi layoka mpito shato lo lɛkɛ lɔmɔtshi la dive diakɔ oko onto latshieta ɛngɔ kɛmɔtshi. 21 Lam’ayomotoma okambi, layowotɛ nte: ‘Tshɔka tɔshi mpito.’ Naka lambotɛ okambi akɔ nte: ‘Eenda, mpito yekɔ lo wedi ɔnɛ, ɔsayɔ,’ kete wɛ mbeyaka nkalola, nɛ dia lo mɛtɛ oko wele Jehowa la lɔsɛnɔ, dui sɔ nembetshiyaka dia awui tshɛ wekɔ dimɛna le yɛ ndo ndooko waale. 22 Ko naka lambotɛ okambi akɔ nte: ‘Eenda, mpito yekɔ la ntondo kayɛ,’ ko wɛ ntshɔ, nɛ dia Jehowa ambokolawoya. 23 Lo kɛnɛ kendana la daka diambotolakana+ dimi la yɛ, Jehowa onge lam’asaso pondjo pondjo.”+

24 Ko Davidɛ akayashɛ l’oswe. Lam’akakoke valelo ya ngɔndɔ, nkumekanga akadjasɛ la mɛsa dia ndɛ.+ 25 Nkumekanga akadjasɛ lo nkɔsa kande katondodjasɛka suke la ehele. Jɔnatana akɛlanɛ la nde ndo Abinɛrɛ+ akadjasɛ lo wedi wa Saolo, koko dihole dia Davidɛ diaki hwe. 26 Saolo kombuta ndooko dui lushi lɔsɔ, nɛ dia nde akataka l’otema ande ate: ‘Ondo dikambo dimɔtshi diakatombi, diakɔ diende keema pudipudi.+ Eelo, nde ekɔ la dia monga mindo.’ 27 La wedi a pindju wa lushi la valelo ya ngɔndɔ, lushi la 2, dihole diaki Davidɛ diakatetemala monga hwe. Ko Saolo akambola ɔnande Jɔnatana ate: “Lande na kele ɔna Jɛse+ haye lo oleelo loyi ndo ɛlɔ?” 28 Jɔnatana akakadimola Saolo ate: “Davidɛ akanɔmbɛ lotshungɔ la ntshɔ la Bɛtɛlɛhɛma.+ 29 Nde akate ate: ‘Lam’alangayɛ, ombisha lotshungɔ la dimi ntshɔ, nɛ dia nkumbo kaso pombaka nambola olambo l’osomba akɔ ndo ɔnalengo akambelɛ. Ɔnkɔnɛ, naka lambohomɔ lokolo l’ɔlɔ lo washo ayɛ, ontshike nsɛlɔ dia tenda analengo.’ Diakɔ diahandaye lo mɛsa wa nkumekanga.” 30 Ko Saolo akomalɛ Jɔnatana nkɛlɛ k’efula ndo akawotɛ ate: “Wɛ ɔnaki womoto l’ɔtɔmbɔki, onde wɛ fɔnyaka dia dimi haleye dia wɛ ambɔsɔna dia mbeta lo wedi w’ɔna Jɛse? Shi dui sɔ diayokosha nsɔnyi ndo diayosha nyɔ nsɔnyi?* 31 Edja tshɛ kele ɔna Jɛse la lɔsɛnɔ la nkɛtɛ, oyadi wɛ kana lowandji layɛ, ndooko kayoshikimala nge.+ Laasɔ, toma onto ɔmɔtshi atombelande, nɛ dia nde pombaka mvɔ.”*+

32 Koko Jɔnatana akatɛ Saolo ka she ate: “Lande na kahombande ndjakema?+ Osadinde?” 33 Ko Saolo akawoke dikɔnga dia mbɔkɔmɔla,+ ko Jɔnatana akeye dia she ambɔsa yɛdikɔ ya ndjaka+ Davidɛ. 34 Jɔnatana akonɛɛ mbala kakɔ ɔtɔi oma lo mɛsa la nkɛlɛ k’efula ndo nde kɔɔndɛ diangɔ nto lushi la 2 l’ɔkɔngɔ wa valelo ya ngɔndɔ, nɛ dia nde akayakiyanyaka efula lo dikambo dia Davidɛ+ ndo lo woho wakawosha she nsɔnyi.

35 Jɔnatana akatshu l’oswe la pindju lo dihole diakandokana la Davidɛ ndo ɔlɔngɔ ɔmɔtshi waki okambi ande aki kaamɛ la nde.+ 36 Ko nde akatɛ okambi ande ate: “Lam’alangayɛ, lawɔ tɔshi mpito yayangami mboka.” Okambi akɔ akalawɔ, ko Jɔnatana akoke lohito etale la ntondo kande. 37 Lam’akakome okambi lo dihole diakoke Jɔnatana lohito, Jɔnatana akawelɛ okambi akɔ ate: “Shi lohito lekɔ la ntondo kayɛ?” 38 Jɔnatana akawelɛ okambi akɔ nto ate: “Samanya! Tshɔka esadi! Totshimbatshimbake!” Ko okambi wa Jɔnatana akatɔngɔna mpito yakɔ, ko akakalola le nkumɛnde. 39 Okambi wa Jɔnatana koshihodia ndooko dui, paka Jɔnatana nde la Davidɛ ato mbakeyaka kɛnɛ kakandalangaka mbuta. 40 Oma laasɔ, Jɔnatana akasha okambi ande dihomɔ diande dia ta ndo akawotɛ ate: “Tshɔka toditshike l’osomba.”

41 Lam’akatshu okambi akɔ, Davidɛ akatombe oma lo dihole dia suke diaki lo lɛkɛ la sidɛ. Oma laasɔ, nde akayakɔsha ekukumadi ndo akakusama mbala 3, ko vɔ wakashana bizɛ ndo wakalele, koko Davidɛ akaleke ndela. 42 Jɔnatana akatɛ Davidɛ ate: “Tshɔka la ki, nɛ dia sho akɔ 2 takatshibe+ lo lokombo la Jehowa shate: ‘Jehowa onge lam’asami dimi la yɛ ndo lam’asa tokanula* tami la tokanula* tayɛ pondjo pondjo.’”+

Oma laasɔ, Davidɛ akonɛɛ ndo akatshu, ko Jɔnatana akakalola l’osomba.