Jɛrɛmiya
30 Ɔtɛkɛta wakaye le Jɛrɛmiya oma le Jehowa ɔnɛ: 2 “Jehowa Nzambi k’Isariyɛlɛ kata ate: ‘Funda ɛtɛkɛta tshɛ wakotɛmi lo dibuku. 3 Nɛ dia “eenda, nshi yekɔ lo ndjaye,” mbata Jehowa, “yayomotshumanya anto ami wele mfumbe, Isariyɛlɛ ndo Juda,”+ mbata Jehowa, “ko dimi layowakaloya lo wodja wakamasha watshɛwɔ ndo vɔ wayonga akanga awɔ nto.”’”+
4 Ɔnɛ ele ɛtɛkɛta wakatɛ Jehowa Isariyɛlɛ ndo Juda.
5 Jehowa kata ate:
“Sho tamboka mindjo y’adidimu;
Wɔma wekɔ, koko aha wɔladi.
6 Lam’alanganyu, nyombole kana pami koka mbota.
Ko lande na kɛnami pami tshɛ kele la wolo aahɛ anya ande lo dikundju* diande
Oko womoto latata lɔɔnɔ?+
Lande na kaya elungi tshɛ ɔkɛsɛ?
7 Hayii! Nɛ dia ɔsɔ ekɔ lushi la diambo.*+
Ndooko lushi lele oko lɔ,
Etena ka paa le Jakɔbɔ.
Koko nde ayoshimbamɛ oma lɔkɔ.”
8 “Ndo lushi lɔsɔ,” mbata Jehowa kanga lolembelembe, “dimi layohembola osembe oma lo nkingo kayɛ ndo dimi layohembola eya* ayɛ lo 2; ndo angɛndangɛnda* hawotowetɛ* mfumbe kawɔ nto. 9 Vɔ wayokambɛ Jehowa Nzambi kawɔ ndo Davidɛ nkumekanga kawɔ, ɔnɛ layomaatondjiyɛ.”+
10 “Ndo wɛ okambi ami Jakɔbɔ, tokake wɔma,” mbata Jehowa,
“Ndo Isariyɛlɛ le,+ tosakake lokomba.
Nɛ dia dimi layokoshimbɛ oma l’etale
Ndo tokanula tayɛ oma lo wodja wakawandama mfumbe.+
Jakɔbɔ ayokalola, ayonga lo ki, ndooko onto layowofukutanya,
Ko ndooko onto layowaotsha wɔma.”+
11 “Nɛ dia dimi lekɔ kaamɛ la yɛ,” mbata Jehowa, “dia koshimbɛ.
Koko dimi layoshila oshiki wedja tshɛ l’atei wa wɛnɛ wakamakodianganya lɛkɔ;+
Koko wɛ, dimi halokoshila oshiki.+
12 Nɛ dia Jehowa kata ate:
“Ndooko ɛkɔnwɛlɔ lo wɔkwɛlɔ ayɛ.+
Mpota kayɛ hakoke nkɔnɔ.
13 Ndooko onto lakɔtɛkɛtɛ,
Ndooko okanga wa nkɔnɔla mpota kayɛ.
Ndooko ɛkɔnwɛlɔ dikambo diayɛ.
14 Wanɛ tshɛ wakooka ngandji k’efula wambokohɛ.+
Vɔ hawoyokoyanga nto.
Nɛ dia la lofimbɔ laki otunyi mbakamakɔkɔmɔla,+
La dilanya dia kanga esehe,
L’ɔtɛ wa onongo ayɛ wa shaka ndo pɛkato yayɛ y’efula.+
15 Lande na kadayɛ ekoko l’ɔtɛ wa wɔkwɛlɔ ayɛ?
Paa kayɛ hatɔkɔnɔ!
L’ɔtɛ wa onongo ayɛ wa shaka ndo pɛkato yayɛ y’efula+
Mbakamakosalɛ dui sɔ.
Wanɛ wamba diangɔ diayɛ, wayowamba ndo diawɔ,
Ndo dimi layokimɔ wanɛ tshɛ wakova lo evelo.”+
17 “Koko dimi layokaloya yoonge yayɛ ya dimɛna ndo layɔkɔnɔya mpota yayɛ,”+ mbata Jehowa,
“Kaanga mbakawakelɛ wɛ ɔsɛkami ɔnɛ:
‘Siɔna, lele ndooko onto lakoyanga.’”+
18 Jehowa kata ate:
“Dimi layanga ntshumanya mfumbe ya lo mvudu y’apɛma ya Jakɔbɔ,+
Ndo dimi layoka tabɛrnaklɛ yande kɛtshi.
Osomba wayohikama nto lo okundjikundji awɔ,+
Ndo tshoto yodingami la mpele yayemala lo dihole diayɔ diahombama.
19 Ndo oma le wɔ mbayoya eokelo ka losaka la mindjo ya tɔɔla.+
Dimi layowafudia ndo vɔ hawotonga yema tshitshɛ;+
Dimi layowaetɛ efula,*
Ndo vɔ hawotonga anto w’anyanya.+
20 Anande wayoyala woho wakiwɔ ntondo,
Ndo la ntondo kami olui ande w’anto wayoshikimala nge.+
Dimi layendana la wanɛ tshɛ wɔhɛnyahɛnya.+
21 Ɔnɛnɛ ande ayonga onto ande ɔmɔtshi hita,
Ndo oma l’atei ande kayotomba ɔnɔmbɔdi ande.
Dimi layosala dia nde ndja suke ndo nde ayosukana la mi.”
“Nɛ dia naka aha ngasɔ, akɔna akoka nsombɔ* nsukana la mi?” mbata Jehowa.
22 “Ko nyu nyayonga anto ami+ ndo dimi layoyala Nzambi kanyu.”+
23 Eenda, lɔpɛpɛ la wolo la Jehowa layɔpɛpa la nkɛlɛ;+
Lɔhɛlɛdi la wolo, lapɛpa lo ɛtɛ w’akanga wa kɔlɔ.
24 Nkɛlɛ kadɔdɔ ka Jehowa hatokitakita
Edja ndo nde ambosala ndo ambokotsha kɛnɛ kasangoyande lo otema ande.+
Nyu nyayoshihodia dui sɔ+ lo etena k’ekomelo ka nshi.